Karongi: Abajyanama b’ubuzima biyubakiye inzu y’ubucuruzi ya miliyoni 350 Frw

Yanditswe na Evariste Nsengimana
Kuya 22 Nzeri 2017 saa 02:10
Yasuwe :
0 0

Abajyanama b’ubuzima bo mu Karere ka Karongi bibumbiye muri koperative 22 bujuje inzu y’ubucuruzi yatwaye amafaranga miliyoni 350, bakuye mu kwizigama.

Buri koperative yagiye itanga miliyoni 9 n’ibihumbi 100 Frw kugira iyo nzu yubakwe.

Umuyobozi w’abajyanama b’ubuzima mu Karere ka Karongi, Mazimpaka Patience, yatangaje ko iyi nzu izabafashe gukomeza kwiyubaka mu gihe kizaza ndetse ko bazakomeza kugaragaza ubudasa mu kazi kabo.

Abayobozi batandukanye batashye iyi nyubako kuri uyu wa Gatanu, tariki ya 22 Nzeri, barimo Minisitiri w’ubuzima, Dr Diane Gashumba; Umunyamabanga wa Leta ushinzwe imibereho myiza y’abaturagre, Dr. Alvera Mukabaramba; Minisitiri ushinzwe ibiza no Gucyura Impunzi, Debonheur Jeanne d’Arc; Guverineri w’intara y’Uburengerazuba, Munyantwari Alpfonse, n’abandi bashimiye ukwishyira hamwe kw’abajyanama b’ubuzima bagakagera ku gikorwa gikomeye cy’iterambere.

Uretse gutaha iyo nzu y’ubucuruzi, aba bajyanama bahawe na Minisiteri y’ubuzima ibikoresho by’imirasire bifite agaciro k’asaga miliyari 1.5 Frw muri gahunda yo kubafasha kugira urumuri aho batuye.

Dr Gashumba yavuze ko Minisiteri yita ku bajyanama b’ubuzima kuko ibikorwa bakora bituma amahanga yifuza kubyigira ku Rwanda.

Yagize ati “Abanyamahanga baza kutwigiraho kuko twagabanyije impfu z’ababyeyi kandi ni mwe mwabigizemo uruhare. Muzakomereze aho.”

Yakomeje asobanura ko ayo mashanyarazi azabafasha gucana aho baba mu gihe bavura abarwayi n’ikindi gihe ndetse agafasha abana babo kwiga.

Guverineri Munyantwari yavuze ko iyo nzu ari rimwe mu mashami y’ibyo bakora byo kwita ku buzima bw’abanyarwanda, anabasaba ko bazacunga neza umutungo uzayivamo buri wese akamenya uko ukoreshwa.

Akarere ka Karongi gafite abajyanama b’ubuzima 1611, muro bo 1348 bahawe amashanyarazi akomoka ku mirasire y’izuba, 70 ntibaragerwaho n’urumuri mu gihe abandi bacana amashanyarazi asanzwe bishyiriye mu nzu. Aba bajyanama bakorera mu bigo nderabuzima 23, poste de santé icyenda n’ibitaro bikuru bitatu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza