Kayonza: Abayobozi batanu ba Koperative y’umuceri batawe muri yombi

Yanditswe na Uwishyaka Jean Louis
Kuya 5 Mutarama 2017 saa 09:02
Yasuwe : XX
0

Abayobozi batanu muri Koperative Duterimbere Murundi ibarizwamo abahinzi b’umuceri bo mu Murenge wa Murundi, mu Karere ka Kayonza, batawe muri yombi ku wa Kabiri bakekwaho kunyereza umutungo wayo.

Muri abo batawe muri yombi harimo Perezida wayo Evariste Niyireba; Umuyobozi Mukur u(manager), Pauline Mukashimwe n’Umunyamabanga Jérôme Uwihanganye. Abandi bafashwe harimo ushinzwe kugenzura ibijyanye n’umusaruro, Gido Nyandwi n’umujyanama Mary Hangayika, bose bashinjwa kunyereza umutungo wa Koperative ungana na miliyoni 8.5 z’amanyarwanda nkuko The New Times ibitangaza.

Umuvugizi wa Polisi y’u Rwanda mu Ntara y’u Burasirazuba, IP Emmanuel Kayigi, yemeje iby’aya makuru atangaza ko aba bose bafungiye sitasiyo ya polisi ya Rukara muri aka karere.

Ati “Aba bose uko ari batanu batanzweho amakuru na bamwe mu banyamuryango ba koperative ku wa 19 Ukuboza umwaka ushize, ariko twari dukeneye gukora iperereza kugira ngo twemeze neza ibyo bavuga. Twasabye Ikigo cy’Igihugu gishinzwe guteza imbere Amakoperative (RCA) gukoramo igenzura ndetse twanabonye raporo ku wa 3 Mutarama, kandi yagaragaje ko ayo mafaranga yaburiwe irengero.”

IP Kayigi yavuze ko abakekwaho ibi bikorwa bemeye ko bose bagize uruhare muri ayo manyanga.

Ati “Bamaze kwemera ibyo bashinjwa ndetse abenshi muri bo bagenda bashinjanya ibindi bintu.”

Jean de Dieu Mitali, Umuyobozi muri RCA ushinzwe kugenzura amakoperative yo mu Ntara y’u Burasirazuba, yatangaje ko bakimara gusabwa na Polisi gukora igenzura muri iyi koperative basanze hari ikinyuranyo mu bitabo byayo.

Duterimbere Murundi ifite abanyamuryango 1576, bose bahinga umuceri ku buso bwa hegitari 400 z’igishanga.

IP Kayigi yavuze ko abo bantu bose batanu bemeye icyaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE