Kicukiro: Abahanzi basabwe kwita ku bihangano byunga ubumwe bw’abanyarwanda

Yanditswe na Ishimwe Israel
Kuya 8 Ukwakira 2016 saa 02:09
Yasuwe : XX
0

Abahanzi batandukanye bo mu Karere ka Kicukiro mu Mujyi wa Kigali basabwe kwita no gushyira umwete mu guhanga ibihangano bishimangira ubumwe n’ubwiyunge bw’Abanyarwanda.

Ibi aba bahanzi babisabwe kuri uyu wa Gatanu tariki ya 7 Ukwakira 2016, mu muhango wo gusoza icyumweru cy’Ubumwe n’Ubwiyunge, banahemba abitwaye neza mu marushanwa y’indirimbo, ibisigo n’imivugo.

Umuyobozi wungirije ushinzwe Iterambere n’Imibereho y’abaturage mu Karere ka Kicukiro, Baingana Emmanuel yagize ati “ Icyo tubasaba ni ugukomeza kwita ku guhanga ibihangano yaba indirimbo n’imivugo bifite inyigisho zigisha zikanashyigikira ubwiyunge bw’abanyarwanda.”

Abahanzi 28 barimo abaririmbyi 14 nibo bitabiriye ayo marushanwa. Uwa mbere mu baririmbye indirimbo nziza ifite insanganyamatsiko yigisha ku bwiyunge bw’abanyarwanda yahawe miliyoni imwe, uwa mbere mu banditse ibisigo ahabwa ibihumbi 500.

Ngubana Ernest wegukanye miliyoni imwe y’amafaranga y’u Rwanda yabwiye IGIHE ko yishimye cyane nyuma y’uko indirimbo ye ibaye iya mbere ndetse ko agiye kongera imbaraga mu guhanga indirimbo zunga ubumwe bw’abanyarwanda.

Yagize ati “ Nishimye cyane kandi byandenze kuba hari ubutumwa nageneye igihugu cyanjye bukaba bwaje ku mwanya wa mbere rwose ni ibyo kwishimira.”

Mukakibibi José w’imyaka 24 utuye mu Murenge wa Masaka wegukanye ibihumbi 500 nyuma y’uko igisigo cye aricyo kibaye icya mbere yatangaje ko ayo amafaranga yahawe azamufasha byinshi mu buzima bwe.

Yagize ati “ Ndishimye cyane ariko aya mafaranga ntabwo ari make ku buryo ngo nahita mvuga ngo ngiye kuyakoresha iki n’iki, ahubwo ngiye kubanza mbitekerezeho nitonze icyo nzayakoresha kugira ngo nyabyaze umusaruro ufatika.”

Icyumweru cy’Ubumwe n’Ubwiyunge cyatangijwe ku mugaragaro mu gihugu hose kuya 1 Ukwakira 2016, mu Karere ka Kicukiro cyaranzwe n’ibiganiro bitandukanye ndetse n’amarushanwa y’indirimbo n’ibisigo.

Tariki ya 1 Ukwakira ifite amateka akomeye ku Rwanda kuko mu 1990, nibwo hatangijwe urugamba rwo kubohora u Rwanda. Mu by’Abanyarwanda bibohoye harimo ingoyi y’amacakubiri, irondakoko n’irondakarere n’ibindi bibazo byari bibangamiye umuryango nyarwanda.

Mu bushakashatsi bwakozwe na Komisiyo y’Igihugu y’Ubumwe n’Ubwiyunge ku gipimo cy’ubwiyunge mu Rwanda muri 2015, bwerekanye ko Abanyarwanda bateye intambwe ishimishije cyane mu bwiyunge ku kigereranyo cya 92.5%, bavuye kuri 82.3% muri 2010.

Icyumweru cy’Ubumwe n’Ubwiyunge cyatangiye kwizihizwa muri 2008, cyabaga ku nshuro ya 9 muri uyu mwaka cyari gifite insanganyamatsiko igira iti “Dukomere ku gihango dufitanye n’u Rwanda turinda ibyagezweho’’.

Abahanzi baririmba mu njyana gakondo ntibatanzwe
Bamwe mu bavuze ibisigo
Umuhango wo gusoza icyumweru cy'Ubumwe n'Ubwiyunge mu Karere ka Kicukiro witabiriwe n'abantu b'ingeri zose barimo n'abakuze
Abantu benshi bari babukereye
Mukakibibi José yegukanye ibihumbi 500 nyuma y’uko igisigo cye kibaye icya mbere
Ngubana Ernest yegukanye miliyoni imwe
Umuyobozi wungirije ushinzwe Iterambere n’Imibereho y’abaturage mu Karere ka Kicukiro, Baingana Emmanuel yasabye abahanzi guhanga ibihangano bishimangira Ubumwe n'Ubwiyunge bw'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza