Kwamamaza

Kigali: Abacungagereza 24 bari gukarishya ubwenge ku rwego mpuzamahanga

Yanditswe kuya 10-10-2016 saa 11:55' na Niyonsenga Schadrack


Abayobozi 24 baturutse mu magereza yo mu Rwanda, bateraniye i Kigali mu mahugurwa y’icyumweru kimwe agamije kubongerera ubumenyi mu kazi kabo ka buri munsi ko kwita ku mfungwa n’abagororwa.

Aya mahugurwa yatangiye kuri uyu wa 10 Ukwakira akazarangira ku wa 14, aho atangwa n’abakozi b’Umuryango Mpuzamahanga utabara imbabare CICR, mu rwego rwo kongerera ubumenyi abanyarwanda bakora mu nzego z’amagereza kugira ngo ibyo bakora bibe biri ku rwego mpuzamahanga.

Buri mwaka amahugurwa nk’aya yaberaga i Genève mu Busuwisi, ahari icyicaro cy’uyu muryango, u Rwanda rukoherezayo umuntu umwe. Uyu mwaka u Rwanda rwasabye ko yazabera mu Rwanda kugira ngo umubare w’abayitabira wiyongere.

Komiseri Mukuru w’Urwego rw’Igihugu rushinzwe imfungwa n’abagororwa (RCS), CGP George Rwigamba, yavuze ko aya mahugurwa ari ingenzi ku bacungagereza bo mu Rwanda bitewe n’uko abafasha gukora kinyamwuga kuko hari byinshi bayigiramo bibafasha gukora ibikorwa biri ku rwego mpuzamahanga.

Yagize ati “Ni amahugurwa y’abayobozi ku nzego zitandukanye z’urwego rw’igihugu rushinzwe imfungwa n’abagororwa, agamije kubaka ubushobozi bw’abacungagereza ku nzego zitandukanye kugira ngo bashobore kuba bakora neza akazi kabo.”

Akomeza agira ati “Ubusanzwe ntabwo aya mahugurwa yajyaga akorerwa mu Rwanda, twajyaga twohereza nk’umuntu umwe cyangwa babiri i Genève ariko ubu twasabye CICIR kugira ngo akorerwe mu Rwanda bityo dushobore kubona abahugurwa benshi kugira ngo tube twanakuramo abazasigara bigisha abandi.”

Brig Gen. George Rwigamba yemeza ko aya mahugurwa azafasha abacungagereza kurushaho gukora kinyamwuga bitewe n’uko abari kubahugura ari abantu bafite ubunararibonye bigendeye ku kuba barabyigiye ndetse bakaba baranakoze muri uru rwego.

Pascal Cuttat, Umuyobozi wa CICR mu Rwanda, akaba ari na we uyoboye itsinda ry’abari gutanga ayo mahugurwa, yavuze ko impamvu yayo ari uko ari ngombwa ko abacungagereza baba bari ku rwego mpuzamahanaga kugira ngo babashe gucunga neza imfungwa.

Cuttat avuga ko aba bagungagereza bahuguwe na bo bazagira uruhare mu guhugura bagenzi babo kugira ngo bongere ubumenyi, bazabashe kujya bakurikirana niba uburenganzira bwose imfungwa n’umugororwa bagenerwa babashije kububona.

Muri ubwo burenganzira harimo koroherezwa kubona ubuvuzi, gufashwa kubona ibyo bakeneye mu gihe baba bagiye kuburana, kubona uburenganzira bwo kubonana n’abo mu miryango yabo igihe babasuye n’ibindi.

Mu bari gutanga aya mahugurwa harimo n’abanyarwanda bahuguwe mu myaka ishize i Genève.

Umuryango mpuzamahanga wita ku mbabare CICIR niwo watanze inkunga y’abarimu n’amafaranga azakoreshwa muri aya mahugurwa. Ubusanzwe CICR yita ku mbabare, kuri ubu ifasha Urwego rw’Igihugu rushinzwe imfungwa n’abagororwa muri gahunda yayo yo kwita ku bantu hirindwa icyatuma habaho imbabare.

Abayobozi mu magereza atandukanye barahugurwa ku gukora kinyamwuga
Aya mahugurwa abereye mu Rwanda nyuma y'uko yaberaga i Geneve mu Busuwisi
CGP George Rwigamba avuga ko aya mahugurwa azatuma abanyarwanda bakora ibikorwa byo ku rwego mpuzamahanga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved