Kigali: Afunzwe akekwaho gufungira abaturanyi amazi agamije kuyacuruza ku giciro gihanitse

Yanditswe na Thamimu Hakizimana
Kuya 17 Gashyantare 2017 saa 07:15
Yasuwe : XX
1

Umugabo wo mu Murenge wa Kigarama mu Karere ka Kicukiro yatawe muri yombi akurikiranyweho kwiba amazi y’ikigo cy’Igihugu gishinzwe amazi n’isukura WASAC.

Ku wa Kane tariki ya 16 Gashyantare 2017, ni bwo uyu mugabo yatawe muri yombi n’inzego z’umutekano nyuma yo gufatirwa mu cyuho ari gufunga imiyoboro y’amazi iherereye aho atuye.

Uyu mugabo ucuruza amazi, arashinjwa kuba yarafungaga impombo z’amazi zo mu duce dutandukanye kugira ngo abaturage bajye kuyagura iwe, ku buryo iyo yaburaga ijerekani imwe yayigurishaga amafaranga 300 nk’uko byatangajwe n’abaturanyi be.

Uwitwa Bugingo Theogene wo mu Kagari ka Karugira yagize ati “ Ubundi twe twari dufite ikibazo cy’amazi atagera ku baturage nk’uko bikwiye kubera umuntu wayafungaga agamije kuyacuruza ku buryo byatumaga dukora ibirometero bigera kuri bitatu tujya kuyavoma mu Rwampara.”

Yakomeje avuga ko bishimiye cyane kuba uwo muturage yatawe muri yombi kuko batazongera kubura amazi igihe kirekire nk’uko byari bimeze.

Umuyobozi w’ishami rya WASAC mu Karere ka Kicukiro Jeanne Mutamba, na we yabwiye IGIHE ko uwo mugabo yatawe muri yombi kubera ko yibaga amazi agatuma abandi baturage batayabona nk’uko bikwiye.

Yagize ati “ Yafunzwe kubera kwangiza cyangwa se kuvogera impombo zacu aho dufunga n’aho dufungurira amazi ajya mu duce dutandukanye kugira ngoabe ari we uzajya uyagurisha abaturage ku biciro byo hejuru.”

Yongeyeho ko iki gikorwa, yakoze cyahesheje isura mbi WASAC kuko hari abaturage benshi bari basigaye babahamagara bakababaza impamvu batajya bahabwa amazi nk’uko bikwiye.

Yakomeje agaragaza ko WASAC yatangiye ubugenzuzi kugira ngo ifate n’abandi baba bakora bene ubwo bujura cyane cyane ko byagaragaye ko ari bwo buryo bushobora kuba bukoreshwa n’abantu bacuruza amazi mu duce dutandukanye kugira ngo bunguke.

Bivugwa ko abanyerondo bo mu Murenge wa Kigarama ari bo bafashe uyu mugabo ahagana saa munani z’ijoro ari gufunga uruhombo ruri muri ruhurura yo muri ako gace.

Impombo uyu mugabo yafunguraga akayobya amazi
Agace uyu mugabo yafatiwemo
Umuturage watanze amakuru ku buriganya bwakorwaga n'uyu mugabo
Umuyobozi w'Ishami rya WASAC mu karere ka Kicukiro, Jeanne Mutamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza