IGIHE.com > Amakuru > U Rwanda
Kigali: Ahitwa

Kigali: Ahitwa "Bannya he" biracyagoranye kubona imisarane


Yanditswe kuya 13-11-2013 - Saa 07:59' na Thamimu Hakizimana

Nubwo mu minsi yashize abayobozi bigeze kwamagana izina "Bannya he" rihabwa agace gacucitse kari i Nyarutarama, bisa n’aho imva no y’iryo zina igihari kuko mu ngo zirenga 2000, hari imisarane itarenze 100 kandi nayo itujuje ibikenewe.

Mu mudugudu wa Kangondo mu Kagari ka Nyarutarama mu murenge wa Remera mu karere ka Gasabo hakunze kwitwa "Bannya he?" kubera ikibazo cy’isuku nke gikomeje guterwa n’uko benshi mu baturage nta bwiherero bagira bitewe n’imiterere mibi yako gace.

Nk’uko binagaragazwa n’imibare IGIHE yahawe n’Umuyobozi ushinzwe isuku mu mudugudu wa Kangondo, Kamirindi Vincent, benshi mu baturage bahatuye banavuga ko bugarijwe n’ikibazo gikomeye cy’umwanda kuko imiterere yaho ari mibi; ngo ntibashobora gucukura ubwiherero burengeje metero ebyiri z’ubujyakuzimu kubera ko bahita bagera ku mazi, dore ko ako gace kegereye igishanga.

Karisa Antoine, umwe mu baturage bahatuye, yabwiye IGIHE ati: "Impamvu ya mbere itara agace kacu umwanda, ni uko dutuye hejuru y’amazi ku buryo tutajya turenza metero 2 cyangwa eshatu iyo turi gucukura umusarane; duhita duhura n’amazi."

Nsengiyumva Ereste w’imyaka 43 akanagira abana batatu, nawe yabwiye IGIHE ko impamvu ikomeye ibatera kutagira ubwiherero ari uko batuye mu kajagari kandi mu bucucike aho biba bitoroshye kuba umuturage yagira ikibanza cy’inzu ngo anabone aho gushyira ubwiherero.

Kamirindi Vicent, umuyobozi ushinzwe isuku mu mudugudu wa Kangondo nawe yabwiye IGIHE ko kuba muri uwo mudugudu hataba imisarane ihagije bituma bamwe mu baturage bituma mu nzira cyangwa bakahihagarika.

Kamirindi yagize ati: "Impamvu twugarijwe n’isuku nke biterwa n’uko abaturage cyangwa inzu nyinshi zaha zitagira ubwiherero kandi umudugudu wacu uri ahantu habi ndetse unubatse mu bucucike."

Yakomeje avuga ko kuba batuye hejuru y’igishanga bituma ubwiherero bwuzura vuba bakabura aho bacukura ubundi n’ubucucike bukabije.

Uwimbabazi Georgette, Umunyamabanga nshingwabikorwa w’Akagari ka Nyarutarama nawe yunze mu ry’abaturage, avuga ko impamvu mu mudugudu wa Kangondo hakiri ikibazo cy’ubwiherero buke ari uko uwo mu dugudu uherereye ahantu habi kuko ari hejuru y’amazi.

Uwimbabazi yagize ati: "Ikibazo cy’ubwiherero buke rwose turakizi ariko giterwa n’uko umudugudu wa Kangondo uri hejuru y’amazi aho kenshi nta ucukura ubwiherero burengeje metero ebyiri cyangwa eshatu kuko ahita agera ku mazi."

Yakomeje avuga ko nyuma y’icyo kibazo cy’ubwiherero umwanda unaterwa ahanini no kuba abaturage batuye mu kajagari n’ubucucike kandi mu mwanya muto ku buryo n’iyo ubwiherero bwa bamwe bwuzuye, bakunze kubura aho bacukura ubundi.
Gusa avuga ko nubwo isuku nke ikirangwa muri ako gace, nk’ubuyobozi, badahwema gukangurira abaturage kugira ubwiherero.

Aka gace kazwi ku izina rya "Bannya he?" gatuwe n’ingo zirenga 2000 kandi abenshi mu baturage bako bari mu rwego ruciriritse.

Kamirindi Vincent, Umuyobozi ushinzwe isuku mu mudugudu wa Kangondo
Zimwe mu nzu zo muri "Bannya he" zicucikiye hafi y'igishanga
Nubwo imwe mu misarane ishaje kandi iba iteye ubwoba, ntibibuza bamwe kuyikoresha
Imwe mu misarane yaruzuye ariko iracyakoreswa n'abava mu tubari two muri ako gace
Abaturage babwiye IGIHE ko hari aho bajya kwiherera bafite impungenge
Agace ka "Bannya he" karangwa n'uamazu yubatse acucitse
Hagizwe ubwiherero kuko banyiraho nta wundi mwanya bafite wo kugucukura ubundi. Baracyahihagarika nubwo huzuye

thamimu@igihe.com

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO