Kigali Innovation City, umushinga usa n’igitangaza ku hazaza h’u Rwanda

Yanditswe na Philbert Girinema
Kuya 13 Gashyantare 2017 saa 07:40
Yasuwe :
2 3

Magingo aya, umwe mu mishinga itaravuzwe cyane ariko ishobora kuzafata u Rwanda ukarutereka ku ruhando rw’ibindi bihugu bikomeye ku Isi ni Kigali Innovation City.

Kigali Innovation City, ni umushinga ukomeye ariko kuwumva bisaba ibisobanuro birambuye. Byonyine wumvise izina ryawo, ushobora gutekereza ku mushinga w’inzu z’akataraboneka zigerekeranyije inshuro mirongo, ukumva imihanda isa neza n’ibindi bikorwa remezo byo ku rwego rwo hejuru.

Gusa uyu mushinga ugomba kuba washyizwe mu bikorwa mu 2020, nyuma y’imyaka icumi ukaba umusemburo w’iterambere rya Afurika kubera ibishashi bya Kigali, wakorerwa no mu ihema ariko ibivuyemo bigakwira ku Isi hose.

Ni ibishimangirwa na Steve Mutabazi wanosoye uyu mushinga kuva mu mizi wagize ati “Kigali Innovation City nubwo twagira amazu adasa neza nta kibazo icyo dukeneye ni ukugira ibikorwa biduha abahanga bakomeye muri Afurika kurusha ibindi bihugu byose ku mugabane. Mu bijyanye na Engineering, imibare, ubumenyi (science) n’ibijyanye no guhanga umurimo.”

Mu nama ya World Economic Forum yabereye i Kigali muri Gicurasi 2016 niho iki gitekerezo cyatangarijwe, u Rwanda ruvuga ko rutangije umugambi wo guhinduka igicumbi cy’ikoranabuhanga ariko rigera ku bihugu byose by’Isi kandi rukaba aho abahanga n’intiti mu bumenyi n’ikoranabuhanga bakomoka.

Ibi byaje bikurikira ikindi cyiciro cyari cyarabanje cyo gukwiza umuyobora wa 4G mu gihugu cyose. Ni intambwe nayo yatewe benshi batayumva kuko byonyine gukwiza internet ya 4G ni ibintu byari nk’inzozi.

Mu 2009 nibwo mu gihugu cyose hatangiye gukwizwa ‘fibres optiques’, 2013 rusinyana amasezerano na Korea Telecom, iminsi mike nyuma y’uwo munsi ibikorwa biratangira; mu 2014, 4G ihita itangira kugeragezwa muri Kigali. Gukwirakwiza 4G byari kuzafata nibura imyaka 15, ariko intumbero y’igihugu niyo yatumye intego iba imyaka itatu.

Iyo ukigera muri Kigali Special Economic Zone ugaterera amaso ahari kubakwa Carnegie Mellon University

Ibisa n’ibitangaza muri Kigali Innovation City

Uyu mushinga ugamije kurerera u Rwanda n’Isi abahanga mu bumenyi n’ikoranabuhanga.

Impuguke zigaragaza ko mu bigo bikomeye byo ku Isi mu bijyanye n’ikoranabuhanga nibura 2% aribo bahanga iterambere ryabyo riba rishingiyeho, ari nabo bategura imishinga y’ibitangaza nyuma y’iminsi igakwira Isi twese tuyoboka.

Kigali Innovation City igamije kubaka ubushobozi bw’abantu nk’abo, intumbero y’u Rwanda ikaba ko rubasha kuzamura umubare w’abahanga bakaba bakava kuri 2% bakaba 10%.

Aha niho Steve Mutabazi, Umuyobozi ushinzwe guteza imbere ikoranabuhanga n’ikoreshwa ryaryo mu Kigo cy’Igihugu gishinzwe Iterambere, (RDB), wanonosoye uyu mushinga kuva mu mizi yahereye abwira IGIHE ati “nicyo gitangaza cya Kigali Innovation City”.

Ibi bitangaza Mutabazi avuga bizakorerwa ku buso bungana na hegitari 60 muri Kigali Special Economic Zone i Ndera mu Karere ka Gasabo.

Aha hatangiye kubakwa ibikorwa birimo kaminuza zo ku rwego rwo hejuru zisanzwe ziza mu myanya ya mbere ku Isi.

Izi zirimo Carnegie Melon iherutse kugenerwa na leta miliyari zirindwi zo kubaka ishuri rigezweho aho byitezwe ko uyu mwaka rizatahwa ritwaye miliyari izisaga icumi z’amafaranga y’u Rwanda.

Harimo ikigo Nyafurika gishinzwe guteza imbere ubumenyi bushingiye ku mibare AIMS-NEI (The African Institute for Mathematical Sciences –Next Einstein Initiative); igishinzwe guteza imbere ubugenge, International centre for theorical phyisics; na African Leadership University iyoborwa n’uwari umugore wa Nelson Mandela, Graça Machel.

Izi kaminuza uko ari enye zigiye gutangira gukorera mu Rwanda zitanga impamyabushobozi y’icyiciro cya gatatu cya Kaminuza (Master’s).

Mutabazi akomeza ati “Turi mu rugendo rwo kuba aba mbere muri Afurika. Tuzabigeraho kuko mu Rwanda dufite kaminuza zihagije dukuramo abantu benshi b’abahanga ariko hari urundi rwego tugomba kubagezaho.”

“Urwego rutuma ibigo bivuye mu mahanga n’izo dusanganywe hano mu Rwanda z’ikoranabuhanga zibona aribo bantu bakomeye muri Afurika kugirango bitume ibyo bigo biza hano bitagiye mu bindi bihugu.”

Iri shuri rizuzura ritwaye asaga miliyari 10 z'amafaranga y'u Rwanda

Uko bizakorwa

Izi kaminuza uko ari enye zizubaka amashuri muri Kigali hanyuma zijye zakira abanyeshuri batsinze neza mu zo mu Rwanda no mu karere, iki gihugu kibe n’ikusanyirizo ry’ubuhanga.

Nyuma y’ibyo, ibigo bikomeye birimo nka Cisco, IDM na Ericson, ikompanyi ikora ibijyanye n’ikoranabuhanga kuva mu 1918, Microsoft ya Bill Gates n’ibindi bizaza bifate abakozi bo muri Kigali Innovation City bibahugure, aho kugira ngo bajye guhaha ubumenyi mu mahanga bakenera mu kazi ka buri munsi.

Ubundi kugira ngo bagire ubushobozi bakeneye, ibyo bigo byajya bibohereza mu mahanga. Ku ikubitiro ibi bigo bizatangira bikorera mu nyubako yo hejuru ya Carnegie Mellon, nyuma bizubakirwe aho bizajya bikorera ubwabyo.

Abanyeshuri bizaba byakiriye, muri bo 20% bizajya bibaha akazi batangire bakore porogaramu, ndetse n’ibindi bikoresho ibi bigo byajyaga bitunganyiriza mu mahanga bicuruzwe mu Rwanda no mu Karere.

Abandi banyeshuri 80% bazaba barize muri za kaminuza uko ari enye na Kaminuza y’u Rwanda, bazahabwa amahugurwa ngiro mu masomo y’ubunyamwuga, babahe n’ubushobozi bwo kujya gufasha ibindi bigo kubaka imikorere yabo.

Harimo n’ibigo bikomeye ku Isi nka Accenture yo muri Ireland ku buryo bazaba impuguke mu bijyanye n’ubujyanama, gutegura imishinga n’ibindi.

Aba nibo bazabasha kubona akazi mu bihugu byo mu mahanga no mu bigo bindi bikomeye mu Rwanda.

Mutabazi ati “Akazi k’ibigo nka Accenture ni ugufata abantu nk’aba bagahabwa ubushobozi bwo gufasha ibindi bigo mu kuzamura ubukungu bwabyo.”

“Ibigo by’ikoranabuhanga bizafata 20% bavuye muri Kaminuza ziri hano muri Kigali Innovation City, 80% bagende bakorere ibyo bigo ndetse bajye no mu bindi bigo byo mu Rwanda abenshi bajye mu bigo by’umwihariko nka Accenture kubera ko bakorera Accenture nibwo buryo abo bantu bazava hano mu Rwanda bajya gukorera mu bindi bihugu ariko batuye mu Rwanda.”

Steve Mutabazi aganira n'Umunyamakuru wa IGIHE

Usibye amafaranga leta y’u Rwanda yahaye Carnegie Mellon University, nta yandi izatanga ahubwo ibi bikorwa byose bizakorwa n’abikorera ku giti cyabo ku buryo ubaze ayo bishobora gutwara ari muri miliyoni 900 z’amadolari ya Amerika.

Leta yo yafashe icyemezo cyo gutegura imihanda muri KIC, igashyiramo umuriro w’amashanyarazi, amazi na Internet ibindi bikaba akazi k’abikorera.

Izi kaminuza hafi ya zose zahisemo kuza mu Rwanda zisize ibindi bihugu ku mugabane wa Afurika nk’aho nka The African Institute for Mathematical Sciences yari isanzwe ifite icyicaro i Cape Town muri Afurika y’Epfo yimuriye icyicaro cyayo mu Rwanda, naho International Centre for Theoretical Physics igahitamo kuzana ishami ryayo rya Kabiri nyuma y’iriri i Trieste mu Butaliyani.

Kigali Innovation City izaba ari inyungu ikomeye ku Rwanda kuko izatuma u Rwanda rutanga abakozi bo ku rwego rwo hejuru no kugeza no muri Afurika yose, aho kuba rwo rwajya kubashakayo.

Muri iki gihe nibura abanyeshuri basaga ibihumbi 12 nibo barangiza muri Kaminuza zisanzwe mu Rwanda. Uyu mushinga wa Kigali Innovation City uzatuma u Rwanda rwongera kuri uyu mubare nibura abahanga 600 buri mwaka bizamura ubushobozi bw’abarangije kaminuza bose muri rusange cyane iyo bahuriye mu kazi.

Uko Carnegie Mellon University izaba imeze niyuzura
Igice cyo hejuru cya Carnegie Mellon mu minsi ya mbere kizakorerwamo n'ibigo by'ikoranabuhanga
U Rwanda rwasinyanye amasezerano n'iyi kaminuza ngo ize gukorera mu gihugu, muri yo harimo ko rugomba gutanga umusanzu mu kubaka inyubako zayo. Niyo mpamvu mu ngengo y'imari Carnegie Mellon yagenewe amafaranga
Umushinga wa Kigali Innovation City uzakorerwa ku buso bwa hegitari 60
Leta yemeye gushyira imihanda, amazi, amashanyarazi na internet muri iki gice, ibindi bikazakorwa n’abikorera
Inyubako ziteganyijwe muri Kigali Innovation City zibarizwa muri miliyari 900 z’amadolari ya Amerika
Carnegie Mellon iri hafi kuzura
Ikigo cy'ubwubatsi cyo mu Bushinwa nicyo kiri kubaka iri shuri
Biteganyijwe ko izatahwa uyu mwaka
Yari isanzwe ikorera mu nyubako ya Telecom House, izahita yimukira muri Kigali Economic Zone

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza