Kwamamaza

Kigali Marriot Hotel yafunguwe ku mugaragaro (Amafoto)

Yanditswe kuya 5-10-2016 saa 09:07' na Ntakirutimana Deus


Leta y’u Rwanda yahaye ikaze Hotel Marriot yafunguye ibikorwa byayo mu Rwanda ku mugaragaro, iyisezeranya ko izakomeza gukora ibishoboka mu gushyiraho politiki zigirira akamaro abashoramari.

Iyi Hoteli yafunguwe ku mugaragaro kuri uyu wa kabiri tariki 4 Ukwakira 2016, ni iya sosiyete Marriot International isanzwe ifite ibikorwa nk’ibi hirya no hino ku isi.

Minisitiri w’Intebe Murekezi Anastase wafunguye iyi Hotel, yashimiye ubuyobozi bwa Marriot International bwahisemo gukorera mu Rwanda, igihugu cya mbere cyo munsi y’ubutayu bwa Sahara ikoreyemo.

Minisitiri w’Intebe Murekezi yavuze ko iyi sosiyete yahisemo neza, mu guhitamo u Rwanda. Ati “Mu guhitamo u Rwanda, Marriot Hotel yahisemo neza kandi mu gihe kiri imbere, turatekereza ko ibizakurikiraho ari byiza kubera impamvu nyinshi.”

Zimwe muri zo mpamvu harimo ko gukorera ubucuruzi mu Rwanda bijyana n’icyerekezo cy’igihugu cyo kuhagira ahantu hakurura abashoramari, icyerekezo u Rwanda rukesha imiyoborere myiza ya Perezida Paul Kagame yo guhindura u Rwanda igihugu gifite ubukungu buciriritse kugera muri 2020 n’izindi.

U Rwanda kandi ngo rufata gahunda rwihaye yo kwagura ubukerarugendo hibandwa ku kwakira ibiganiro, inama mpuzamahanga, nk’urufunguzo rw’ingenzi ruzazamura igihugu, rukanafasha kongera imirimo izatanga inyungu ziturutse hirya no hino.

Kugira ngo ibyo byose bigerweho, ngo biterwa n’uko igihugu cyihaye intego yo gukomera ku mutekano wacyo , gushyigikira no kongera ibikorwa remezo, ndetse no gushyigikira ishoramari ry’amahoteli nka Kigali Marriot Hotel.

U Rwanda kandi ngo ni igihugu cyiza cyo gushoramo imari nkuko byagiye bigaragazwa na raporo zitandukanye zirimo iy’ishoramari(Doing Business 2015) yarugaragaje nk’igihugu cyihuta ku bijyanye n’iterambere ry’ishoramari ndetse no korohereza abaza kurushoramo imari.

Minisitiri w’Intebe Murekezi yasabye Marriot Hotel gukomeza gutoza no guha akazi Abanyarwanda, kandi mu bikiorwa byayo igafasha mu guha agaciro ibikorerwa mu Rwanda, kuko bifasha mu kuzamura ba rwiyemezamirimo bato n’abaciriritse.

Umuyobozi Mukuru wa Sosiyete ya Marriot International ku Isi akaba na Perezida wayo, Arne Sorenson, yavuze ko u Rwanda ari igihugu kibereye ishoramari, bikaba ari na byo byabakuruye bigatuma bashora imari yabo mu Rwanda.

Yagize ati “ u Rwanda ni igihugu gifite ubukungu bugenda buhinduka , dutewe ishema no kugira uruhare muri iryo terambere.”

Yagarutse ku kamaro k’iyo hoteli n’uruhare izagira mu kuzamura Abanyarwanda, barimo abanyeshuri biga mu ishuri rya Akilah Institute of Women bafashwa n’iyo hoteli mu bikorwa byo kwimenyereza akazi ndetse ikanagaha bamwe muri bo.

Umuyobozi Mukuru w’Ikigo cy’Igihugu gishinzwe Iterambere, Francis Gatare, yavuze ko iyo hoteli itumye u Rwanda rutakongera kugira ikibazo cyo kubura aho rwakwakirira abashyitsi , kandi ko ibikorwa bya Kigali Marriot Hotel bizatuma u Rwanda rukomeza kugendererwa n’abantu batandukanye batikanga kubura amacumbi.

Gatare kandi yagarutse ku cyizere u Rwanda rwagiriwe n’iyo hoteli.

Ati “Iyi sosiyete yari itarafungura hoteli n’imwe muri Afurika uretse mu Misiri (Egypt) kuko batabonaga amahirwe ahagije yo kuba yateza imbere hoteli nk’iyo ng’iyo. Baragenzuye baza gusanga mu Rwanda hari ayo mahirwe bikaba ari cyo cyatumye bashora amafaranga yabo mu kuza hano mbere y’uko bajya no mu bihugu binini bikize nka Afurika y’Epfo, Nigeria n’ibindi.”

Yakomeje avuga ko babitewe no kubona ko u Rwanda ari igihugu kiri kugana ku iterambere rirambye, ndetse n’uburyo igihugu cyorohereza abashoramari gukora imirimo yabo bitababangamiye no kubona uburyo ubukerarugendo bukoresha amahoteli nk’ayo ngayo bugenda bwiyongera mu Rwanda.

Kigali Marriot Hotel ni hoteli y’inyenyeri eshanu igizwe n’ibyumba 254 birimo n’icyo ku rwego rw’aba Perezida.

Sosiyete ya Marriot International iherutse kugura ikindi kigo gikomeye muri uru rwego Starwood Hotels & Resorts Worldwide, bituma iba iya mbere mu bigo by’amahoteli bikunzwe kandi bifite abakiriya benshi ku Isi. Ifite ibikorwa bisaga 5, 700 mu bihugu 110, hose ihafite ibyumba bisaga miliyoni n’ibihumbi ijana.

Kigali Marriot Hotel niyo ya mbere ifunguwe mu bihugu byo muri Afurika yo munsi y'ubutayu bwa Sahara
Iyi Hoteli iri ku rwego rw'inyenyeri eshanu
Minisitiri w'Intebe Anastase Murekezi (ibumoso) aganira n'abayobozi banyuranye mu ifungurwa rya Marriot Hotel
Abitabiriye iki gikorwa basusurukijwe n'indirimbo z'abahanzi
Umuyobozi Mukuru wa Sosiyete ya Marriot International ku Isi, Arne Sorenson na Minisitiri w'Intebe, Anastase Murekezi bafungura ku mugaragaro Marriot Hotel
Minisitiri w'Intebe Anastase Murekezi asuhuzanya na Umuyobozi Mukuru wa Sosiyete ya Marriot International ku Isi, Arne Sorenson
Umuyobozi Mukuru wa Sosiyete ya Marriot International ku Isi akaba na Perezida wayo, Arne Sorenson
Minisitiri w'Intebe, Anastase Murekezi ageza ijambo ku bitabiriye igikorwa cyo gufungura ku mugaragaro Marriot Hotel
Umuyobozi Mukuru wa Sosiyete ya Marriot International ku Isi, Arne Sorenson aganira na Minisitiri w'Intebe n'abandi bayobozi
Minisitiri w'Intebe asuhuza Umuyobozi Mukuru w'Ikigo gishinzwe Iterambere(RDB), Francis Gatare
Minisitiri w'Intebe asuhuza abandi bitabiriye uyu muhango
Minisitiri w'Intebe, Anastase Murekezi n'abandi bayobozi mu nzego zitandukanye bitabiriye ifungurwa rya Marriot Hotel

Amafoto: Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved