Kwamamaza

RISD n’abafatanyabikorwa bunguranye ibitekerezo ku kuvugurura imiturire

Yanditswe kuya 23-11-2016 saa 10:54' na Philbert Hagengimana


Umuryango Nyarwanda uharanira iterambere rirambye, RISD (Rwanda Initiative for Sustainable Development) wagiranye inama n’abafatanyabikorwa bawo muri gahunda igamije kuvugurura utujagari yatangiriye mu Mujyi wa Kigali.

Inama yo kuri uyu wa 22 Ugushyingo yari igamije guhuza abafatanyabikorwa barimo sosiyete sivile n’inzego zigenga, basangira ibitekerezo ku byagaragaye mu cyiciro cy’igerageza ryo gushyira mu bikorwa Umushinga w’Agatare, no kumva ibigezweho muri gahunda ya leta yo kuvugurura imiturire, hagaragazwa n’uruhare rwa buri mufatanyabikorwa.

Gahunda ya Leta yo kunoza imiturire mu mijyi no kuvugurura utujagari yabanjirijwe n’igerageza mu Kagari k’Agatare mu Karere ka Nyarugenge ari na ho haturutse izina ryayo.

Iyo nama yateranye nyuma y’uko Umujyi wa Kigali usoje ibikorwa by’igerageza ry’uwo mushinga ryakorewe muri ako kagari ahahanzwe umuhanda ufite uburebure bwa metero 400 n’ubugari bwa metero esheshatu wuzuye muri uyu mwaka. Wubatswe himuwe abaturage bake, dore ko iyo gahunda inagamije kuvugurura imiturire ariko himuwe abaturage bake bashoboka.

RISD nk’umufatanyabikorwa muri iyo gahunda, ishinzwe gukurikirana uruhare rw’abaturage muri ibyo bikorwa bibakorerwa, babakangurira kubigiramo uruhare rufatika.

Guverinoma y’u Rwanda yagiye ifata ingamba zitandukanye zigamije kuvugurura imijyi, ndetse gahunda yayo ni uko abaturage batuye mu mijyi bakwiyongera kuva kuri 19% kugera kuri 35% mu 2020, ibyo kandi bikajyana n’iterambere mu bukungu n’irandurwa ry’ubukene mu bice by’imijyi.

Umuyobozi w’inama y’ubutegetsi ya RISD, Bishop Gasatura Nathan, yatangaje ko abaturage bishimira inyungu bakura mu kwagura imijyi no kuvugurura imiturire, ariko ko hakiri byinshi byo gukora kugira ngo basobanukirwe iby’iyi gahunda, mu rwego rwo kugera ku muhigo wo gutura neza u Rwanda rwiyemeje.

Ati “Uyu munsi abaturage bumva kandi bishimira inyungu babona mu guteza imbere imiturire, ariko haracyari imbogamizi ikomeye yo kuvugurura imyubakire y’akajagari nk’uko bisabwa kugira ngo umuhigo wo kugera kuri 35% uzabe wagezweho. Benshi bumva ko ibyo bigomba kujyana no kwimurwa kw’abaturage, nyamara si byo.”

Bishop Gasatura akomeza avuga ko ibyo bisaba ko hashyirwa imbaraga mu gufasha abaturage guhindura imyumvire, ku bufatanye n’imiryango itari iya Leta, kandi ngo na RISD yiteguye gukomeza kubikora.

Umuryango Nyarwanda utegamiye kuri Leta uharanira iterambere rirambye (RISD)watangiye gukora mu 1997, wibanda cyane mu gukemura amakimbirane ashingiye ku butaka. Ukorera mu turere 11 mu gihugu.

RISD n'abafatanyabikorwa bayo barebeye hamwe uruhare rwabo mu gushyira mu bikorwa gahunda yo kuvugurura imiturire

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved