Kigali: Umuyobozi w’Akagali yaguwe gitumo muri ‘Lodge’ ari kumwe n’abana b’abakobwa babiri

Yanditswe na Rabbi Malo Umucunguzi
Kuya 18 Kamena 2017 saa 11:31
Yasuwe :
0 0

Umunyamabanga Nshingwabikorwa w’Akagali ka Ngeruka, Umurenge wa Ngeruka mu Karere ka Bugesera, Ntabahwana Gerard yafatiwe mu Mujyi wa Kigali kuri uyu wa Gatandatu akekwaho ko yari aryamanye n’abakobwa babiri bataruzuza imyaka y’ubukure.

Amakuru yizewe agera kuri IGIHE ni uko uyu Muyobozi w’Akagali ka Ngeruka, ashinjwa “gusambanya abana no kubaha inzoga”, aho yafatiwe mu nzu icumbikira abagenzi iri mu Karere ka Kicukiro mu Mujyi wa Kigali.

Abo bana b’abakobwa bikekwa ko basambanyijwe ni abanyeshuri mu Ishuri Gatolika rya Nyamata, bombi bakaba bigaga mu mwaka wa Gatanu w’amashuri yisumbuye. Gusa haracyategerejwe ibyangombwa by’amavuko yabo ngo hemezwe mu buryo ntakuka ko batarageza ku myaka y’ubukure.

Umuvugizi wa Polisi mu Mujyi wa Kigali, Supt Hitayezu Emmanuel, yemeje aya amakuru y’itabwa muri yombi ry’uwo mugabo, anogeraho ko hanafashwe umukozi ushinzwe kwakira abakiriya kuri "Lodge".

Supt Hitayezu yavuze ko abakira abashyitsi mu byumba bibacumbikira, iyo bakiriye abana baryozwa icyaha kimwe n’abahazanye.

Igitabo cy’amategeko ahana cy’u Rwana giteganya ko icyaha cyo gusambanya umwana cyakozwe n’umubyeyi we cyangwa ushinzwe kumurera, uhagarariye ubutegetsi, uhagarariye idini, ushinzwe umutekano, ukora umwuga w’ubuvuzi, ukora umwuga w’uburezi, uwitoza umwuga n’abandi bose bishingikirije umwuga bakora cyangwa ububasha bafite ku mwana, uwagikoze ahanishwa igifungo cya burundu cy’umwihariko n’ihazabu y’amafaranga y’u Rwanda kuva ku 100.000 Frw kugeza ku 500.000 Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza