KIM yibutse Jenoside yakorewe Abatutsi inagaragaza uburyo ifashamo abanyeshuri barokotse

Yanditswe na Habimana James
Kuya 7 Kamena 2019 saa 02:47
Yasuwe :
0 0

Ubuyobozi bwa Kigali Institute of Management, KIM, bwagaragaje ko mu rwego rwo kwibuka barushaho kwiyubaka, bufasha abanyeshuri bayigamo barokotse Jenoside yakorewe Abatutsi ku buryo bazaba abaturage babereye u Rwanda.

Byagarutsweho kuri uyu wa Kane ubwo ubuyobozi bw’iyi Kaminuza, abanyeshuri, inzego zitandukanye bifatanyaga mu kwibuka ku nshuro ya 25 Jenoside yakorewe Abatutsi.

Ni igikorwa cyabereye ku cyicaro gikuru cya KIM, kibanzirirwa n’urugendo rwo kwibuka abazize Jenoside, rwahereye ku kibuga cy’indege i Kanombe, ruca kuri La Palisse i Nyandungu rusorezwa ku cyicaro cy’iri shuri.

Umuyobozi ushinzwe abanyeshuri muri KIM, Kagame Geoffrey, yavuze ko iki ari igikorwa bateguye bafatanyije n’Umuryango w’Abanyeshuri barokotse Jenoside yakorewe Abatutsi muri 1994, AERG-Inkumburwa.

Yavuze ko iyi kaminuza ikora ibikorwa bitandukanye kugira ngo igendane na gahunda yo Kwibuka ariko abanyarwanda bakomeza kwiyubaka.

Ati "KIM ikora ibikorwa bikomeye byo gufasha abanyeshuri barokotse Jenoside biga hano, ubusanzwe iyo urebye izindi Kaminuza zigenga ubona ko bigorana ko zaha abanyeshuri amacumbi bari muri AERG cyangwa se barihirwa na FARG ariko twe tugerageza ibishoboka byose kuko tubaha amacumbi babamo mu kigo kandi ku mafaranga make, ajyanye na buruse yabo nayo idahagije, tubagaburira ku manywa na nijoro n’ibindi byose bishoboka tukabibafasha kugira ngo babashe kubigeraho."

“Tubafasha kandi mu myigire nko kubona ubufasha mu kwiga amasomo y’umwuga, tukabafasha kwiga amasomo y’abacungamari b’umwuga (Certified Public Accountant, CPA) n’ibindi.”

Yavuze ko nk’uko insanganyamatsiko ari ukwibuka twiyubaka, ikibazo gihari ari uko usanga abanyarwanda benshi bataramenya ibijyanye no kwiga amasomo y’umwuga, ko niba umunyeshuri yiga muri Kaminuza wenda akaba yiga ibaruramari aba atazi ko kugira ngo yemerwe ku rwego rw’Isi, bimusaba kugira ngo yige CPA n’andi.

Aha niho agira ati “Nka KIM dufata umwanya tukazenguruka mu ntara zose ndetse n’abanyamuryango ba FARG tukabageraho tukabashishikariza kwiga aya masomo y’umwuga, aha muri KIM ntitugira CPA yonyine ahubwo buri somo twigisha tuba dufite n’uburyo bwo kuryigamo mu buryo bwa kinyamwuga.”

Iyi Kaminuza ibafasha kubarihira ku kigero cya 50%, mu gihe kwiga aya masomo biba bihenze cyane.

Umuyobozi wungirije wa Kaminuza ya KIM, Prof Danson Musyoki, yavuze ko imyaka 25 ishize habaye Jenoside, ubuyobozi bwa KIM bwifatanyije n’Abanyarwanda mu kwibuka Abatutsi barenga miliyoni imwe bishwe mu gihe cy’iminsi ijana.

Ati “KIM ntifite inshingano gusa yo gutanga ubumenyi ahubwo ifite n’inshingano yo gutanga uburere no kwibutsa abanyeshuri ko bagomba kurwanya ingengabitekerezo ya Jenoside, KIM izakomeza gufasha abanyeshuri barokotse Jenoside mu buryo bwose no kubaha ubumenyi buzabafasha kwiteza imbere mu gihe kiri imbere.”

Umuyobozi w’Urubyiruko rwibumbiye mu Muryango w’Abanyeshuri barokotse Jenoside yakorewe Abatutsi, AERG muri KIM, Ntawukuriryayo Emmanuel, yashimiye ingabo zahagaritse Jenoside avuga ko bafitanye igihango, ko ibyo bakoze ubu ntawaza kubisenya. Yashimangiye ko biyemeje kwitangira igihugu cyabo ku buryo kitazongera gusubira mu icuraburindi nk’iryo cyaciyemo.

Habanje urugendo rwo Kwibuka abazize Jenoside
Habaye umwanya wo gucana urumuri rw'icyizere
Hacanywe urumuri rw'icyizere
Abanyeshuri bo muri KIM bagaragaje ko barimo guharanira kwiyubaka
Abayobozi mu nzego zitandukanye bifatanyije na KIM mu kwibuka ku nshuro ya 25 Jenoside yakorewe Abatutsi
Umuyobozi ushinzwe abanyeshuri muri KIM, Kagame Geoffrey, yavuze ko bafasha abanyeshuri bahiga mu buryo bushoboka
Umuyobozi w’Urubyiruko rwibumbiye mu Muryango w'Abanyeshuri barokotse Jenoside yakorewe Abatutsi, AERG muri KIM, Ntawukuriryayo Emmanuel yashimiye ingabo zabarokoye muri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza