Kimenyi na bagenzi be bahakanye ibyaha baregwa basaba kurekurwa

Yanditswe na Uwishyaka Jean Louis
Kuya 19 Kamena 2017 saa 12:23
Yasuwe :
0 0

Kimenyi Vedaste na bagenzi be bakurikiranyweho icyaha cyo konona no kunyereza umutungo w’Ikigo cy’Igihugu gishinzwe Ingufu (REG), bagejejwe imbere y’urukiko rw’ibanze rwa Rusororo kuri uyu wa Mbere, bahakana ibyo baregwa basaba kurekurwa bagakurikiranwa bari hanze.

Ibikoresho Kimenyi usanzwe ari n’Umuyobozi w’Umuryango wa Rayon Sports na bagenzi bakurikiranyweho konona ni ibyavuye mu bubiko bwa REG bijya kubakishwa umuyoboro w’amashanyarazi i Kayenzi mu Karere ka Kamonyi kandi Sosiyete ya BELECOM (yari yarahawe isoko na EGEBAD na yo yari ifitanye amasezerano na REG) yaragombaga kwigurira ibikoresho.

Ubushinjacyaha bushyira mu majwi Kimenyi ushinzwe kubakisha imiyoboro y’amashanyarazi muri REG ku rwego rw’igihugu, ku kuba ari we wemezaga ko iyo sosiyete ihabwa ibikoresho.

Niyotwizera Emmanuel wari ushinzwe imirimo yo kubaka imiyoboro mu Karere ka Kamonyi akaba anareganwa na Kimenyi, yavuze ko Kimenyi ubwe ari we wamuhaga amabwiriza yo guha umukozi wa BELECOM witwa Rudasingwa Assoumani ibikoresho bya REG. Yavuze ko bitewe n’uko Kimenyi yari amukuriye atari kurenga ku mabwiriza ye bityo ko iyo abikora byari kuba ari nko kumusuzugura.

Yashimangiye ko Kimenyi yasinyaga ku mabaruwa yemeraga ko ibyo bikoresho bosohorwa bigahabwa BELECOM, gusa Kimenyi yamaganye ibyo avuga ko nta mabwiriza yigeze atanga kuko ibikoresho byajyaga gusohoka mu bubiko byabanje kwemezwa n’umuyobozi w’umushinga ndetse n’ushinzwe ububiko kimwe n’umuhuzabikorwa muri REG, bityo rero ngo ntiyari gutanga uburenganzira wenyine.

Yavuze ko n’ibyo bikoresho yasinyiraga byabaga bigiye gukora ku miyoboro ya REG yubakwaga mu Murenge wa Kayenzi, agashimangira ko ibyo abamushinja bavuga ari ‘amatakirangoyi’ ahubwo ko babazwa uko bahabwaga ibikoresho nabo bakabiha abo bitagenewe.

Ubushinjacyaha kandi bwavuze ko abatangabuhamya bavuze ko Kimenyi na Benihirwe Arsène wari ushinzwe gukurikirana imiyoboro mu Ntara y’Amajyepfo, basuraga inshuro nyinshi ibyo bikorwa ndetse bakabona ibikoresho byifashihwa biriho ibirango bya REG ariko ntibagire icyo babikoraho. Benihirwe yavuze ko atigeze ajyana na Kimenyi gusura ibyo bikorwa nkuko bivugwa.

Yahakanye kandi ko yasabye ibikoresho byo guha BELECOM avuga ko ibyo yasinyiriga byabaga ari ibyo kujyana kuri site zakorwaga na REG muri ako gace. Gusa yazamuye inzitizi avuga ko hari ibaruwa yanditswe n’umukozi wa REG witwa Vincent yasabaga ibikoresho byo guha BELECOM yanditswe mu izina rye[Benihirwe] ndetse ayisinya atabimenyeshejwe kandi icyo gihe yari mu Rwanda.

Yavuze ko ubusabe bw’ibikoresho yasinyagaho bwabaga buriho aho bijyanywe ndetse ko ibyahawe BELECOM atabizi.

Kapiteni Bonaventure uyobora BELECOM nawe uri mu baregwa, yabwiye urukiko ko EGEBAD yamuhaye isoko muri Nyakanga 2016 nawe akaza kugirana amasezerano na Rudasingwa Assoumani yo kubakisha uwo muyoboro mu gihe cy’amezi atatu maze nyuma agahita ajya hanze y’igihugu, yagaruka akamubwira ko yakoresheje ibikoresho bya REG nawe akamusubiza ko nta kibazo bazabyishyura dore ko n’ubundi umishinga wari uwayo.

Yavuze ko adakwiye gukurikiranwaho icyaha kuko ibikoresho byatanzwe adahari kandi akaba nta ruhare yabigizemo.

Ubushinjacyaha bwavuze ko ibyo baregwa bigize impamvu zikomeye zibahamya icyaha bubasabira gufungwa iminsi 30 y’agateganyo.

Abaregwa bose bavuze ko nta mpamvu zifatika zatuma bafungwa ndetse ko batatoroka ubutabera bitewe n’uko na mbere yo gufatwa batigeze bagaragaza ko bashaka gutoroka.

Umwanzuro w’Urukiko uzasomwa ku wa Kane tariki ya 22 Kamena 2017.

Kimenyi Vedaste (uwa kabiri ibumoso) na bagenzi be bahakanye ibyo baregwa, basaba ko barekurwa bagakurikiranwa bari hanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza