Kwamamaza

Kimihurura yahigiye kwegukana igihembo cy’ikamyo binyuze mu kwesa imihigo y’isuku

Yanditswe kuya 18-10-2016 saa 22:28' na Tombola Felicie


Abahagarariye amahoteli ,resitora, utubari,amashuri, amavuriro n’amagaraje mu murenge wa Kimihurura, umwe igize akarere ka Gasabo bagaragarijwe ko baramutse bubahirije amabwiriza agenwa n’Umujyi wa Kigali na Polisi mu by’isuku n’umutekano bahesha umurenge bakoreramo kwegukana igihembo cy’imodoka y’ikamyo izatangwa na polisi.

Mbere yo gusinya amasezerano mu by’isuku, ubuyobozi bw’umurenge wa Kimihurura bweretse abitabiriye uwo muhango ko imodoka umurenge wabo wahembwe kubera kwesa imihigo y’isuku n’umutekano mu mwaka wa 2014 yatumye uyu murenge urengera amafaranga asaga miliyoni yakoreshwaga ku kwezi mu gukodesha imodoka yo gutwara abahangana n’abakora ubucuruzi butemewe ndetse no gufasha mu gukora igenzura ry’isuku mu mahoteli, resitora utubari n’ibindi, bityo bakaba bakeneye no kwegukana indi modoka yisumbuyeho.

Murekatete Patricia, Umunyamabanga Nshingwabikorwa w’Umurenge wa Kimihurura yavuze ko kwegukana icyo gihembo bishoboka igihe cyose abo bireba bakubahiriza amabwiriza.

Ati “Impamvu habayeho gusinya aya amasezerano yo kubahiriza isuku ahahurira abantu benshi ni ukugira ngo uwo bireba wese ashyiremo imbagara kugira ngo nihabaho igenzura ajye amenya amanota ahawe, impamvu ayabonye ndetse n’utujuje ibisabwa amenye ibyo atubahirije n’impamvu yabihaniwe.”

Yakomeje avuga ko icyo bagendereye cyane atari uguhana ahubwo ari ukubereka gusa ko baramutse bubahirije ibisabwa byatuma akazi kabo kagenda neza kandi uyu murenge ukegukana igihembo nyamukuru.

Ati “Turashaka kuba twakongera gutsindira imodoka kuko iyo twahawe mu marushanwa ya 2014 yarengeye amafaranga menshi umurenge watangaga asaga miliyoni buri kwezi mu gukodesha imodoka, ubu rero ayo mafaranga akoreshwa ibindi.Turamutse tuyegukanye yadufasha kugera ku bikorwa byinshi bitandukanye biteza imbere abaturage bacu.”

Bagwaneza Theopiste wari uhagarariye resitora Better Life ikorera mu murenge wa Kimihurura yatangaje ko ibikubiye mu masezerano basinyanye n’Umurenge wabo basanzwe babyubahiriza ariko bagiye kurushaho kunoza isuku yo mu gikoni n’aho bogereza ibikoresho.

Furaha Marie Sharon wari uhagarariye ivuriro Africa Health Care Network yatangeje ko kwa muganga isuku ari ngombwa kandi umukozi wese azajya asoma agatabo karimo amabwiriza akubariza ibisabwa.

Ubuyobozi bw’umurenge bwongeye kwibutsa abarebwa no kubahiriza isuku bose guhozaho kuko buri wa kane abakozi b’umurenge, polisi n’izindi nzego zihitamo aho ziri busure haba mu mavuriro, hoteli, amagaraje n’ahandi batakigombera kujyayo nyuma y’amezi atatu.

Iyi mihigo imirenge yose isabwa kubahiriza yasinywe ku itariki ya 8 Kanama 2016 hagati y’Umuyobozi mukuru wa Polisi y’u Rwanda IGP Emmanuel Gasana n’Umuyobozi w’Umujyi wa Kigali, Mukaruliza Monique mu izina ry’inzego bayobora.

Irimo ibijyanye no kunoza isuku no kurengera ibidukikije, kunoza imicungire y’ibishingwe, kunoza isuku rusange n’iy’abantu ku giti cyabo, gukomeza gutera ubusitani aho butari no gufata neza ubuhari n’ibindi.

Inzego z'Umurenge, Akarere n'Umutekano zari zitabiriye iki gikorwa
Abakorera mu Murenge wa Kimihurura basabwe kunoza isuku
Basinye amasezerano buri ruhande rugomba kubahiriza
Bagwaneza Theopiste wari uhagarariye resitora Better Life
Patricia Murekatete, Umunyamabanga Nshingwabikorwa w'Umurenge wa Kimihurura

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved