Kwamamaza

‘Kitabi Tea Factory’, uruganda rufatiye runini abahinzi b’icyayi

Yanditswe kuya 18-10-2016 saa 14:38' na Kwizera Prudence


Icyayi ni kimwe mu bihingwa, u Rwanda rwohereza hanze, gifite uruhare runini mu kuzamura ubukungu bw’Igihugu, binyuze ku isoko gifite mu mahanga n’uburyo gikunzwe ku rwego ruhambaye bitewe n’uburyohe bwacyo.

Mu marushanwa mpuzamahanga, icyayi cy’u Rwanda cyane icyo mu misozi miremire ni cyo gikunze kwiharira ibikombe.

Mu gihembwe cya mbere cya 2016, umusaruro w’icyayi u Rwanda rwohereje mu mahanga ungana na miliyoni 18.8 z’amadorali, amafaranga asaga miliyari 14.9 nkuko Ikigo cy’Igihugu gishinzwe kohereza mu mahanga ibikomoka ku buhinzi n’ubworozi (NAEB) cyabigaragaje.

Iyi ntego igerwaho hashingiwe ku bufatanye hagati y’inganda zitunganya icyayi, abahinzi bacyo ndetse n’inzego zitandukanye.

Kitabi Tea Factory (KTF), ni rumwe mu nganda zihinga icyayi, zikanagitunganya ku buryo abakiriya baryoherwa nacyo haba mu Rwanda ndetse no hanze yarwo.

Uru ruganda rutunganya ibiro by’icyayi bigera kuri miliyoni ebyiri ku mwaka, ruherereye mu Mudugudu wa Kintobo, Akagari ka Kagano, Umurenge wa Kitabi, mu Karere ka Nyamagabe, ruhinga icyayi ku buso bwa hegitari 950, mu gihe abaturage bakorana narwo bahinga kuri hegitari zigera kuri 900.

Umuyobozi wa Kitabi Tea Factory, Jean H. Mutabazi, avuga ko uburyohe bw’icyayi bugendana n’uburyo cyitaweho kuva kikiri mu murima aho gihinze.

Ati “Icyo dukora cya mbere ni ugushaka imbuto nziza y’icyayi tukayitubura, ubundi tugaha abahinzi ingemwe nziza kandi tugakomeza kubigisha uburyo buboneye bwo kwita ku cyayi kugira ngo babone umusaruro mwinshi kandi mwiza.

Uyu muyobozi akomeza avuga ko icyayi gihingwa n’uruganda, ndetse n’igihingwa n’abahinzi basanzwe nta tandukaniro rinini rihari mu bwiza kubera ko abahinzi nabo bigishwa uburyo bwo kugihinga neza no kucyitaho.

Icyayi gihingwa ku butaka bwiza

Ubutaka bwo mu Karere ka Nyamagabe, by’umwihariko mu Mirenge ya Kitabi, Tare n’Uwinkingi burasharira ku buryo bukunda kweraho icyayi ugereranyije n’ibindi bihingwa.

Abatuye muri iki gice bavuga ko ahanini batunzwe no guhinga icyayi kandi kibazanira amafaranga bakabasha kwigurira ibindi byangombwa bakeneye, byose babikesha kuba bafite uruganda hafi yabo aho bagurisha icyayi bakabona amafaranga.

Ibice bigize uruganda n’imikorere yabyo

Kitabi Tea Factory ni uruganda rugizwe n’ibice bitandukanye birimo aho icyayi cyakirirwa kigapimwa, aho cyumukirizwa ndetse n’imashini zigituganya kugeza kigeze ku rwego rwo gushyirwa ku isoko.

Désiré Kabeja, umwe mu bakozi b’uru ruganda ushinzwe gukurikirana uko icyayi gikorwa, avuga ko bakora amasaha 24 kuri 24 kandi bashobora gutunganya toni 10 ku munsi kandi bakora ibishoboka byose kugira ngo icyayi kigumane umwimerere wacyo.

Ati “Ku munsi dushobora gukora nka toni 10 z’icyayi giseye kandi kimeze neza mu moko atandukanye, ariko iyo ari mu gihe cy’izuba umusaruro uragabanuka, naho mu gihe cy’imvura uriyongera”.

Muri uru ruganda hagaragara imashini zitandukanye bitewe n’akazi zagenewe mu gutunganya icyayi.

Imashini isya icyayi ibikora mu buryo butandukanye kuko ifite utuyunguruzo twinshi, harimo utuyungurura icyayi cyo mu rwego rwa mbere bita “umwikamire” kitanoze cyane, n’ikindi cyo mu rwego rwa kabiri kinoze cyane.

Abakozi ba Kitabi Tea Factory mu kwirinda impanuka

Umuyobozi wa Kitabi Tea Factory, Jean H. Mutabazi, avuga ko mu rwego rwo kwita ku bakozi, bashyizeho uburyo bwo kubarinda impanuka, aho uwinjira mu kazi wese aba yambaye imyambaro yabugenewe, ndetse bashyiraho n’igice bagomba kwerekezamo igihe bacyetse ko hari ikibazo gishobora kuba.

Yagize ati “Twateguye ahantu twise “General Assembly” ku buryo haramutse habaye nk’inkongi y’umuriro cyangwa ikindi kibazo, inzogera iravuga abakozi bose bagasohoka mu ruganda bakajya hariya, kandi buri shami riba rifite aho ryateganyirijwe, ku buryo duhita tumenya niba ahari umukozi wagize ikibazo imbere mu ruganda, agahita ahabwa ubutabazi.

Akomeza avuga ko bateganyije n’ibindi bikoresho nka Kizimyamwoto bishobora kwitabazwa igihe habaye inkongi y’umuriro.

Abahinzi baravuga imyato Kitabi Tea Factory

Bamwe mu bahinzi bagemura icyayi kuri Kitabi Tea Factory bemeza ko uru ruganda rubafatiye runini, kuko babona aho bagurisha umusaruro wabo bakabona amafaranga.

Aba bahinzi babifashijwemo n’uruganda bibumbiye hamwe muri Koperative yitwa KOBACYAMU, ibafasha kungurana ibitekerezo no guhuza imikorere kugira ngo icyayi bahinga kibagirire akamaro ntawe usigaye inyuma.

Pascal Nsabimana, umwe muri aba bahinzi avuga ko abayobozi b’uruganda bakorana nabo umunsi ku wundi kandi buri mwaka habaho n’ubusabane abahinzi bahize abandi bagahabwa ishimwe.

Ati “Uruganda rutuba hafi kuko buri kwezi abayobozi barwo baramanuka bakadusanga tukaganira ku mikorere n’imikoranire, ikindi ni uko tugira umunsi wo guhura rimwe mu mwaka tugakora ubusabane, hagashimwa n’abahinzi babaye intangarugero bakorozwa inka, bakabaha n’ibikoresho nk’ingorofani n’ibindi byabafasha mu buhinzi.”

Abahinzi b’icyayi bagera kuri 50 bamaze korozwa inka n’Uruganda rwa Kitabi Tea Factory, kandi zimwe zamaze no kubyara ku buryo bagenda boroza n’abandi.

Abatuye mu Murenge wa Kitabi, Tare n’Uwinkingi baganiriye na IGIHE bavuga ko indi nyungu bazaniwe n’Uruganda ari uko rubaha akazi, kaba agahoraho cyangwa ako bakora mu gihe gito.

Ubuyobozi bwa Kitabi Tea Factory buvuga ko kugeza ubu bakoresha abakozi 35 bahoraho n’abandi barenga ibihumbi bibiri bakora munsi bitewe n’akazi gahari.

Ku bijyanye n’amafaranga umuhinzi ahabwa ku kiro cy’icyayi, ubuyobozi bw’uruganda buvuga ko bigenda bihinduka bitewe n’ibiciro biri ku isoko mpuzamahanga.

Kitabi Tea Factory ni rumwe mu nganda esheshatu za Rwanda Mountain Tea Ltd zihinga zikanatunganya icyayi. Rukunze kuza mu za mbere zigira icyayi kiryoshye kandi gikunzwe ku masoko yo mu Rwanda, muri Afurika no mu bindi bihugu byo hakurya y’amazi magari.

Abayobozi b'uruganda n'abaguzi b'icyayi basura ahatuburirwa ingemwe
Aho abakozi bose bahurira iyo hagize ikibazo kivuka mu ruganda
Ahandikwa icyayi cyasaruwe buri munsi n'agace cyaturutsemo
Aho icyayi cyakirirwa mbere yo kujyanwa gupimwa no gutoranwa
Aho icyayi cyumukirizwa
Bimwe mu bigega bibikwamo icyayi
Désiré Kabeja, umwe mu bakozi ba Kitabi Tea Factory, ushinzwe gukurikirana uko icyayi gikorwa,asobanurira umunyamakuru wa IGIHE, Kwizera Prudence(iburyo) imikorere y'uruganda Kitabi Tea Factory
Jean H. Mutabazi, Umuyobozi wa Kitabi Tea Factory aganira na Ian Brabbin, Umuyobozi w’Ikompanyi Harrogate ikorera mu Bwongereza, ikaba n’umuterankunga n’umuguzi w’icyayi cya Kitabi
Umuyobozi wa Kitabi Tea Factory, Jean H. Mutabazi
Kitabi Tea Factory itunganya icyayi kiri mu bwoko butandukanye
Imashini ipima icyayi
Ukinjira mu ruganda uhasanga amabwiriza agenga abashaka kuhasura
Basura ingemwe z'icyayi zatubuwe
Inzira icyayi kinyuramo kiva mu mashini kijya mu zindi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved