Koreya yahaye u Rwanda inkunga yo guhugura abarimu ibihumbi 43 mu ikoranabuhanga

Yanditswe na Emma-Marie Umurerwa
Kuya 7 Ukuboza 2017 saa 08:22
Yasuwe :
0 0

Koreya y’Epfo yageneye u Rwanda inkunga ya miliyoni zirindwi z’amadolari (agera 5,880, 000,000 Frw) azifashishwa mu guhugura abarimu ibihumbi 43 mu bijyanye n’ikoranabuhanga.

Iyi nkunga izifashishwa mu gihe cy’imyaka itatu mu guhugura abarimu bo mu mashuri abanza n’ayisumbuye mu turere twose tw’igihugu.

Amasezerano y’iyo nguzanyo yasinywe kuri uyu wa Kane, hagati ya Minisitiri w’Imari n’Igenamigambi, Amb. Gatete Claver na Ambasaderi wa Koreya mu Rwanda, Kim Eung Joong.

Amb. Gatete yavuze ko iyi nkunga izafasha abarimu kunguka ubumenyi kugira ngo bigishe abanyeshuri ibyo bumva.

Yagize ati “Bazareba uburyo abarimu nabo bakunguka ubumenyi mu ikoranabuhanga kuko ni ngombwa guhera ku mwarimu uzigisha abana. Mu minsi yashize ubwo twatangira gahunda ya One Laptop per Child wahaga mudasobwa umwana ukanayiha mwarimu, umwana agatanga umwarimu kubimenya ariko uyu munsi turashaka guha ubushobozi n’abarimu kugira ngo bayobore abanyeshuri bigisha.”

Yakomeje avuga uburezi bufite ireme ari bwo buzageza u Rwanda ku cyerecyezo 2050 rwihaye.

Yagize ati “Nta bundi buryo twagera kubyo twiyemeje hatari uburezi. Ibi kandi bifite akamaro mu kongera ireme ry’ibyo twigisha abana bacu, n’ireme basohokana mu mashuri.”

Ambasaderi wa Koreya mu Rwanda, Kim Eung Joong, yatanze ubuhamya bw’uburyo igihugu cye iyo kidashyira ingufu mu burezi kitari kugera mu biteye imbere ku isi.

Yagize ati “Uburezi nta gushidikanya ko ari yo nkingi y’iterambere. Ubuhamya bwa Koreya bwerekana ingufu z’uburezi, aho Koreya yavuye ku musaruro mbumbe w’amadolari 709 ku muturage mu mwaka 1961 ikagera ku madolari ibihumbi 26 mu 2016. Koreya si igihugu gikize ku mutungo kamere ahubwo igendera ku baturage bayo nk’uko mu Rwanda bimeze, ariko uburezi niyo ntwaro ya mbere Koreya yashyize imbere mu kubona abakozi bashoboye ibikenewe ku isoko ry’umurimo.”

Koreya ni kimwe mu bihugu bikomeye ku isi mu ikoranabuhanga. Niho habarizwa ibigo bikomeye muri urwo rwego nka Sumsung ikora amatelefone, Hyundai ikora imodoka, sosiyete ya LG n’izindi.

Uretse abarimu, hazanahugurwa abayobozi 446 bashinzwe uburezi mu turere no mu mirenge, bakurikirana imyigishirize mu bice bashinzwe kureberera.

Amahugurwa azajya atangirwa ahantu (sites) habiri hatoranyijwe muri buri karere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza