Ku nshuro ya 20, hazirikanwe ubutwari bw’abanyeshuri b’i Nyange

Yanditswe na Mukaneza M.Ange
Kuya 19 Werurwe 2017 saa 02:07
Yasuwe :
0 0

Iyo uvuze abanyeshuri b’i Nyange, abenshi bumva vuba igikorwa cy’indashyikirwa bakoze ubwo bagabwagaho igitero n’abacengezi mu myaka 20 ishize, bakanga kwitandukanya bashingiye ku moko nk’uko bari babisabwe n’abo bagizi ba nabi.

Mu ijoro ryo kuwa 18 rishyira tariki ya 19 Werurwe 1997, nibwo habaye igitero kitazibagirana mu mitima y’Abanyarwanda by’umwihariko abigaga n’abarerega ku ishuri ryisumbuye ry’i Nyange, mu Karere ka Ngororero, ubwo bagabwagaho igitero n’abacengezi, bagasaba abanyeshuri bigaga mu mwaka wa gatanu n’uwa gatandatu kwitandukanya Abahutu bakajya ukwabo n’Abatutsi ukwabo. Barabyanze bashimangira ko ari Abanyarwanda.

Bamaze kwanga kwivangura, abo bacengezi babahutsemo babarasamo amasasu barindwi muri bo bahasiga ubuzima abandi barakomereka.

Icyo gikorwa cy’ubutwari cyatumye aba banyeshuri bashyirwa mu Ntwari z’u Rwanda zizirikanwa buri wa 1 Gashyantare mu cyiciro cy’Imena, bahuriyemo n’Umwami Mutara III Rudahigwa, Agathe Uwiringiyimana, Rwagasana Michel na Niyitegeka Felicité.

Uretse kwibukwa ku munsi w’Intwari, aba banyeshuri by’umwihariko banazirikanwa tariki 19 Werurwe. Kuri iki Cyumweru, ku nshuro ya 20, hazirikanywe ubutwari bwabo, igikorwa cyabanjirijwe n’igitambo cya misa yo kubasabira no gushyira indabo ku gicumbi cyabo kiri mu ishuri ryisumbuye rya Nyange.

Umuyobozi w’Ishyirahamwe Komezabutwari rihuje abantu 40 barokotse buriya bwicanyi, Sindayiheba Phanuel, yavuze ko kuba baranze kwitandukanya byaturutse ku nyigisho bahabwaga n’iri shuri n’ibyo babonye muri Jenoside yakorewe Abatutsi mu 1994, dore ko bose bari bakuru mu gihe yakorwaga.

Ati”Aya mateka tuyasubiramo tutagira ngo tubabare, ngo twicwe n’agahinda ahubwo ari ukugira ngo twishimire ko ya mbuto yabibwe hagati muri twe yo gukunda icyiza tukanga ikibi yatanze umusaruro, kuko twese turi Abanyarwanda.”

Umuyobozi w’Urwego rw’Igihugu rushinzwe intwari z’Igihugu, Imidari n’Impeta z’ishimwe (CHENO), Dr Pierre Damien Habumuremyi, yavuze ko imbuto zabibwe n’abo banyeshuri zikuhizwa ubuzima bwabo zeze.

Yakomeje asaba abanyarwanda gufatira urugero ku ntwari z’iki gihugu by’umwihariko abanyeshuri b’I Nyange.

Ati “Ndasaba buri munyarwanda wese kugira umutima wo gukunda igihugu no guharanira ubumwe nkuko abanyeshuri bo mu wa gatanu no mu wa gatandatu hano I Nyange babigenje mu myaka 20 ishize.”

Abayobozi bakuru mu nzego za leta n'abihayimana bitabiriye iki gikorwa cyo kuzirikana ubutwari bw'abanyeshuri b'i Nyange
Abanyeshuri biga ku ishuri ryisumbuye rya Nyange bazirikana bagenzi babo bazize kwanga kwitandukanya
Abayobozi mu nzego z'umutekano bashyira indabo kumva ku gicumbi cy'amateka aranga abo banyeshuri
Umunyamabanga Nshingwabikorwa wa Komisiyo y'Igihugu y'Ubumwe n'Ubwiyunge, Fidel Ndayisaba (uwa gatatu ibumoso) yari yitabiriye uyu muhango
Umuyobozi w'Urwego rw'Igihugu rushinzwe Intwari, imidari n'impeta z'ishimwe, Dr Pierre Damien Habumuremyi, yunamira abo banyeshuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza