“Kuba Umwami Kigeli V yatangiye imahanga ni ibyago ariko si igitangaza”

Yanditswe na Philbert Girinema
Kuya 17 Ukwakira 2016 saa 08:37
Yasuwe :
0 0

Kuri iki Cyumweru tariki 16 Ukwakira 2016, nibwo hasakaye inkuru y’itanga ry’Umwami Kigeli V Ndahindurwa wari ufite imyaka 80 y’amavuko, waguye muri Leta Zunze Ubumwe za Amerika azize uburwayi bw’izabukuru.

Uwari Umukarani n’Umuvugizi w’Umwami Kigali V Ndahindurwa, Boniface Benzinge, yavuze ko bategereje kuzasobanurirwa n’abaganga ibirenzeho ku itanga rye, ariko icyemezo ku ishyingurwa ry’Umwami kigomba gufatwa n’abajyanama be.

Mu kiganiro yagiranye na Radio Ijwi rya Amerika, Benzinge yavuze ko gutangira ishyanga k’Umwami ari ibyago bikomeye.

Ati ‘‘Ni ibyago cyane kuko twararuhanye, tumaranye n’igihe kirekire kuva ndetse mu ishuri. Twize hamwe mu ishuri rya Astrida mu Bafureri b’Urukundo, ni naho twamenyaniye, kuva uwo munsi kugeza ubu.’’

‘‘[Kuba yatangiye imahanga] ni ibyago twagize ariko si igitangaza, umuntu yatangiye aho Imana yamugeneye, si we wihitiramo ngo azatangire ahangaha. Aho Imana yamutegetse niko bigenda kandi tugomba kwemera kuko nawe azi Imana.’’

“Yari sanzwe arwaye ariko bitari bikabije, ni uburwayi bw’ubukuru ndetse yabugendanaga, ariko si uburwayi bw’indwara yamufashe none.’’

Kigeli V atanze agifite icyizere cyo kugaruka mu Rwanda

Benzinge yavuze ko Umwami Kigeli V atanze yari agifite icyizere cyo gutaha mu Rwanda nk’igihugu yavukiyemo, ati ‘‘kandi yabyifuje igihe kinini ariko ni uko bitagiye bishoboka.’’

Yavuze ko Umwami Kigeli V Ndahindurwa yari umuntu wiyoroheje kandi ukunda Imana, akaba asize umurage azibukirwaho wo gukunda Imana no kuba yaraharaniye ubwigenge bw’u Rwanda kandi akabugeraho.

Ati ‘‘Ikindi twamwibukiraho ni uko ubwigenge bw’u Rwanda niwe tubukesha, niwe wabwicaje mu Muryango w’Abibumbye, akaba ari nacyo cyatumye Ababiligi bamwirukana mu gihugu. Mu kuri ni nacyo yazize rwose kugira ngo ajye mu buhungiro kuko nta Munyarwanda wigeze wirukana Umwami Kigeli V, yirukanwe n’Ababiligi.’’

Nyuma y’itanga ry’Umwami Mutara III Rudahigwa kuwa 25 Nyakanga 1959, nyuma y’iminsi itatu nibwo Kigeli V Ndahindurwa yimitswe ategeka kugeza tariki 28 Mutarama 1961.

Umwami Kigeli n'Umuvugizi we Benzige

Ubutegetsi bwe mu Rwanda bwashyizweho iherezo na kamarampaka yemeje ko ingoma ya cyami isezererwa hakimikwa Repubulika, asimburwa na Mbonyumutwa Dominiko ubwo we (Kigeli V) yari yagiye i Kinshasa, agomba kubonana n’Umunyamabanga Mukuru w’Umuryango w’Abibumbye, Dag Hammarskjöld, kuva ubwo ntiyagaruka mu Rwanda.

Ndahindurwa wari warabatijwe Jean Baptiste, yakomeje ahunga anyura muri Tanzania, Uganda na Kenya, akomereza muri Leta Zunze Ubumwe za Amerika aho yabonye ubuhungiro mu 1992, atura mu Mujyi muto wa Oakton muri Leta ya Virginia, aho yari abayeho mu buzima buciriritse.

Benzige yakomeje agira ati ‘‘N’aho Umuryango w’Abibumbye wemezaga ko agomba gutaha ngo bazatange ubwigenge ari mu Rwanda, Ababiligi babirenzeho bagira repubulika kandi bitari muri gahunda y’Umuryango w’Abibumbye.’’

‘‘Uburakari rero bari bafite iteka, ni uko abakoloni bose muri icyo gihe ntabwo bashakaga gutanga ubwigenge muri Afurika, ariko Kigeli ni umwe mu babusabye kandi barabubona, akaba ari cyo cyarakaje Ababiligi bakamuvana mu gihugu.’’

Benzinge (wa kabiri ibumoso mu bahagaze), hamwe n'Umwami Kigeli V Ndahindurwa wicaye
Kuwa 29 Mata 2016 Itsinda ry'umwami Kigeli riyobowe n'umuvugizi we Benzige (wa gatatu uturutse ibumoso) bagiye muri Malta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza