Kwamamaza

Kubona imbuto zizewe biracyari ikibazo ku bahinga indabo, imboga n’imbuto

Yanditswe kuya 14-10-2016 saa 21:24' na Tombola Felicie


Abahinzi bibumbiye mu makoperative akora ubuhinzi bw’indabo, imboga n’imbuto, bavuga ko nta cyizere bagirira imbuto batera bitewe n’uko bagenda bazitoragura hirya no hino, ibyo bigatuma n’umusaruro wabo ukemangwa ubuziranenge.

Ibyo bibazo byo kutagira ibyangombwa byerekana ko ibyo bahinze byujuje ubuziranenge, abahinzi babigaragarije mu nama y’umunsi umwe yateguwe n’Umuryango uteza imbere ubuhinzi butabangamiye ibidukikije, yari inateraniyemo abakozi ba Minisiteri y’Ubuhinzi n’Ubworozi, abakozi b’ikigo gishinzwe kohereza mu mahanga ibikomoka ku buhinzi,NAEB n’abandi bafatanyabikorwa b’uyu muryango kugira ngo buri ruhande rwose rwumve igikwiriye gukorwa.

Ndashyikirwa Medard uhagarire Koperative Tuzamurane ihinga inanasi mu karere ka Kirehe, yavuze ko nubwo bahinga inanasi nta mbuto yizewe bateye, ahubwo ngo buri wese yagiye ayikura aho yiboneye.

Ati” Haracyari ikibazo cyo kumenya ngo ni hehe hashakirwa imbuto nzima, nkatwe tujya gukora koperative buri wese yaragendana akazana imbuto tugatera nta kuvuga ngo iyi ni yo mbuto yemewe kuko ntaho tuzi bayikura.

Ibyo bintu byo kutagira ibyangombwa rero twasanze biduteza igihombo kuko usanga iyo tubonye amasoko ngo abantu batugurire ingemwe z’inanasi nabo bajye gutera, batubaza ibyangomba tukabibura, ayo amafaranga tukaba turayahombye.”

Si abo mu Karere ka Kirehe gusa kuko na Nyirandikubwimana Marie Louise wari waturutse mu Karere ka Muhanga, yemeza ko nubwo bo baguriye ingemwe ku muntu ufite hegitari nini ahingaho inanasi, batazi niba hari ibyangombwa yari afite.

Ati” Ntabwo ibyo kuvuga ngo imbuto igomba kuba ifite ibyagombwa tubizi, iyo umuntu abonye aho agurira aragura agatera, nkatwe twaguze imbuto z’inanasi mu karere ka Karongi, ni umuntu baturangiye ariko nta byangombwa twamubajije.”

Landouard Semukera, Umuyobozi w’Umuryango uteza imbere ubuhinzi butabangamiye ibidukikije (Safe), yatangaje ko impamvu y’iyi nama ari ukugira ngo abahinzi bamenye ko gupfa guhinga gusa nta musaruro mwiza bitanga kandi ko bitabateza imbere ku isoko mpuzamahanga.

Ati” Aho u Rwanda rugeze ntabwo ari ugupfa guhinga, urabona ko mu Rwanda hagenda haza amahoteli mpuzamahanga. Umukiriya hari ubwo avuga ko mbere yo kumugaburira bamwereka icyangombwa cyerekana ubutaka igihingwa cyahinzwemo, imbuto iyo ariyo, amafumbire yakoreshejwe, imiti kugeza ku musaruro ugiye gutekwa.

Ibyo rero nibidatangira kwitabwaho ntabwo ayo mafaranga abahinzi b’imbere mu gihugu bashobora kuyabona n’ubundi yajya yigira hanze.”

Yavuze kandi ko uretse kubona ingemwe nziza n’ibindi byose byo gukurikirana ibihingwa ngo bigomba kwitabwaho n’ababizobereyemo kuko bitabaye bityo umusaruro mwinshi wajya uguma imbere mu gihugu gusa kuko kujyana ibicuruzwa hanze bisaba ko ibihingwa bigira ubuziranenge.

Yakomeje avuga ko imyanzuro iri bufatirwe muri iyi nama izashyikirizwa inzego zose kugira ngo umuhinzi amenye aho kubonera imbuto runaka akeneye kandi abone n’ibyangombwa bigaragaza ko ifite ubuziranenge.

Ku ruhande rwa Minisiteri y’Ubuhinzi n’Ubworozi, Uwumukiza Beatrice, umuyobozi mukuru ushinzwe ubugenzuzi no gutanga inyemezabuzima, yatangaje ko ibyangombwa bitangwa neza kuko haba hari abatubuzi bemewe na RAB ngo ahubwo ikibazo cyaba gihari ni uko abahinzi baba batabazi.

Ati”Abatubuzi batanga imbuto bemewe n’Ikigo cy’igihugu gishinzwe guteza imbere Ubuhinzi n’Ubworozi,RAB, barahari hirya no hino mu gihugu ahubwo keretse abahinzi niba batabazi, ubwo niho hashyirwamo imbaraga.”

Yavuze kandi ko abahinzi na bo bakwiye kugira igenamigambi kugira ngo niba hakenewe imbuto nyinshi nk’ibinyomoro, inanasi, indabo runaka byo guhinga ku buso bunini habeho igihe cyo kuzitegura kuko zitaboneka ako kanya.

Umuryango Safe, urwanya inzara, ubukene n’ihindagurika ry’ikirere, ukorera ubuvugizi abahinzi kugira ngo bakore ubuhinzi burambye bubaha umusaruro mwiza kandi bukorwa hatabayeho kwangiza ibidukikije.

Ni umuryango washinzwe n’abahoze ari abanyeshuri ba Kaminuza Nkuru y’u Rwanda mu Ishamiry’ubuhinzi mu mwaka wa 2002.

Ndashyikirwa avuga ko Koperative yabo ihinga inanasi zivuye hirya no hino kandi zidafite icyangombwa cy'ubuziranenge
Abafatanyabikorwa mu by'ubuhinzi bifuza ko abahinzi bajya bakoresha imbuto zifite ibyangombwa
Semukera avuga ko bagamije gufasha abahinzi guhinga ku buryo umusaruro wabo ugera ku isoko mpuzamahanga

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved