Kwamamaza

Urubanza rw’abakekwaho iterabwoba rwakomeje binubira kuburanishirizwa mu muhezo

Yanditswe kuya 24-10-2016 saa 19:18' na Philbert Hagengimana


Umwe mu bantu 15 bashinjwa ibyaha by’iterabwoba yabwiye urukiko ko kubaburanishiriza mu muhezo ari ugutesha agaciro igihugu, mu gihe Ubushinjacyaha bwo bwari bumaze gusaba ko urubanza rwabo rutaburanishirizwa mu ruhame ku mpamvu z’umutekano.

Kuri uyu Mbere tariki ya 24 Ukwakira, Urukiko rwisumbuye rwa Gasabo rwaburanishije urubanza Ubushinjacyaha buregamo Nzayaha Mudi na bagenzi be ibyaha by’iterabwoba, Ubugambanyi no gushishikariza abandi gukora iterabwoba no kurema umutwe w’abagizi ba nabi.

Ubwo iburanisha ryajyaga gutangira, Umucamanza yabanje gusuzuma niba abaregwa bose bahari, maze ahamagara buri wese mu izina rye, ariko hitaba abantu 15 bahita bajya guhagarara imbere y’Inteko, abandi babiri ngo bararwaye, bakaba barimo Serugendo Djuma ufite ikibazo cy’uburwayi bwo mu mutwe.

Umucamanza ahaye ijambo Ubushinjacyaha ngo busobanure icyatumye buzana abaregwa mu rukiko, uwari ubuhagarariye muri iryo buranisha yahise asaba urukiko ko mbere yo kugira icyo bavugana, abanje gusaba ko urubanza rwashyirwa mu muhezo nk’uko byagenze mu maburanisha yabanje.

Yakomeje avuga ko yishingikirije ingingo ya 102 n’iya 105 mu Itegeko ry’imiburanishirize y’imanza z’inshinjabyaha, bityo asaba urukiko ko rutegeka ko abaregwa bafungwa by’agateganyo.

Umucamanza yahise aha ijambo abaregwa umwe umwe, maze benshi bahuriza ku gusaba ko baburanira mu ruhame kugira ngo imiryango yabo n’abandi bose baje gukurikirana urubanza, babashe kwiyumvira ukuri bityo bamenye urengana n’utarengana.

Umwe muri bo witwa Kalisa Sefu, yabwiye urukiko ko nta mpungenge ku mutekano w’igihugu kuko ucunzwe n’inzego zibikora kinyamwuga, anongeraho ko atari n’ubwa mbere baba baburaniye mu ruhame, maze asaba ko ubusabe bw’Ubushinjacyaha bwateshwa agaciro.

Mugenzi we yahise yunga mu rye, agira ati “Impamvu zatanzwe n’Ubushinjacyaha nta gaciro zikwiye guhabwa kuko si ubwa mbere twaba tuburaniye mu ruhame. Ikindi umutekano w’igihugu cyacu urizewe no mu ruhando rw’amahanga, bityo mvuze ko tuburaniye mu ruhame byahungabanya umutekano, kwaba ari ugutesha agaciro igihugu cyanjye.”

Sheikh Rubangisa Suleiman yahise agaragaza icyizere gike afitiye urukiko, avuga ko atizeye ko ibyo yasaba byahabwa agaciro mbere y’ibyasabwe n’Umushinjacyaha, ngo kuko igihe cyose “nabisabye ntibyahawe agaciro”.

Ibyo abaregwa basabye urukiko byanashimangiwe na Me Safari Ibrahim wunganira bamwe muri bo, wavuze ko bakwiye kuburanira mu ruhame cyane ko atari na bwo bwa mbere byaba bikozwe muri uru rubanza.

Nyuma yo gusuzuma ibyavuzwe n’ababuranyi hashingiwe ku byo amategeko ateganya, Urukiko rwasanze ibyaha Nzayaha Mudi na bagenzi be baregwa, kuba hari bamwe muri iryo tsinda batarafatwa, no kuba hari ababurana bemera ibyaha, impungenge z’ubushinjacyaha ku mutekano zifite ishingiro.

Urukiko rwahise rutegeka ko urubanza ruburanishirizwa mu muhezo, bityo imbaga y’abantu bari bari mu cyumba cy’iburanisha biganjemo abayoboke b’idini ya Islam, bahita basohoka.

Urubanza ku kongera igifungo cy’agateganyo rwakomereje mu muhezo, ruza gusubikwa hasigaye abantu babiri gusa muri 15, abo bakaba baza kuburanishwa kuri uyu wa 25 Ukwakira mu gihe icyemezo kuri icyo kiburanwa, kizasomwa kuwa 26 Ukwakira saa munani z’amanywa.

Urukiko Rwisumbuye rwa Gasabo
Abari bitabiriye iburanisha hanze y'urukiko nyuma y'uko urubanza rushyizwe mu muhezo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved