Amatora y’Umukuru w’Igihugu : “Nta matora atavugwa”

Yanditswe na Uwishyaka Jean Louis
Kuya 20 Mata 2017 saa 03:47
Yasuwe :
0 0

Ku nshuro ya gatatu nyuma ya Jenoside yakorewe Abatutsi muri Mata 1994, u Rwanda ruritegura amatora akomeye y’Umukuru w’Igihugu akurikira ayabaye muri 2003 na 2010 yose yegukanywe na Paul Kagame ku ntsinzi yo ku rwego rwo hejuru.

Kuva uwari Perezida w’u Rwanda, Juvenal Habyarimana yapfa ku “ya” 6 Mata 1994, abantu batatu nibo bamaze kuyobora u Rwanda, umwe muri bo niwe watowe n’abaturage, abandi bariho nk’abakuru b’igihugu muri Guverinoma y’inzibacyuho.

Habyarimana yagiye ku butegetsi mu 1973 ahiritse Grégoire Kayibanda, agenda atorwa mu matora yo mu 1978, 1983 na 1988, yose yabaga ari nko gutanga umugabo kuko yayiyamamazagamo wenyine.

Théodore Sindikubwabo yabaye Perezida w’u Rwanda w’agateganyo aho yamaze iminsi 102 kuri uyu mwanya, awuvaho wicarwaho na Pasteur Bizimungu waje kwegura mu 2000, Perezida Paul Kagame ayobora iyo guverinoma y’inzibacyuho kugeza aho abanyarwanda bamuhundagajeho amajwi mu matora ya 2003.

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza, yabwiye IGIHE ko bitari gushoboka ko jenoside ikirangira hategurwa amatora ya Perezida bitewe n’uko abenshi bari bakiri mu buhungiro ndetse no mu gihugu umutekano wari utaragaruka neza.

Ati "Ntabwo byari gukunda ko amatora [ya Perezida] aba bitewe n’ingaruka za jenoside, abanyarwanda benshi bari bapfuye, abandi bari barahunze igihugu, abari barahunze kera nibwo bari bagitahuka, abari mu gihugu nabo ntibari batekanye, bari hirya no hino ku misozi ntawari iwe, umutekano muke, ibibazo byinshi bitari gutuma icyo gihe haba amatora kuko akorwa muri sosiyete itekanye kandi ibanye neza."

Yakomeje agira ati "Niyo mpamvu hagiyeho ubuyobozi bw’inzibacyuho yari igamije gushyira ibintu mu buryo hagarurwa umutekano, umutuzo mu banyarwanda, gutuza abantu, gucyura impunzi nyinshi zari zarahunze no kureba uko buzamura imibereho n’ubukungu by’igihugu. Ibyo byose nibyo byakozwe kugeza mu 2003 [hakorwa amatora]."

Amatora ya mbere y’Umukuru w’Igihugu kuva Jenoside yakorewe Abatutsi yarangira, yabaye kuwa 25 Kanama 2003 asiga Perezida Kagame ayatsinze ku majwi 95.05% ahigitse Faustin Twagiramungu wabonye 3.62% na Nayinzira Jean Népomuscène wagize 1.33%.

Ayo yakurikiwe n’andi yo mu 2010 nayo yegukanywe na Paul Kagame wabonye amajwi 93.08% kuri 5.15% ya Dr Jean Damascène Ntawukuriryayo, 1.37% rya Higiro Prosper na Dr Alvera Mukabaramba wabonye 0.40%.

Aya matora yose yakurikiwe n’inenge z’abanyamahanga

Abanyamahanga batandukanye bikomye amatora y’Umukuru w’Igihugu bavuga ko atakozwe mu mucyo ndetse ko yibwe, ko hari abagiye bahatirwa umukandida bagomba gutora; ibyo Munyaneza yemeza ko bisa n’ikimwaro cyabo cy’uko ibyo baba bifuza biba bitagezweho.

Ati “Buriya nta matora atavugwa; cyane abanyamahanga buri gihe baba bashakisha muri ibi bihugu byacu bigitera imbere, ntibabura ibyo bayanenga n’aya yacu barayanenze mu buryo bumwe cyangwa ubundi, ariko igikuru ni uko Abanyarwanda baba bazi ukuri, uko batoye, uburyo bunyuze mu mucyo tuyoboramo amatora."

Yakomeje agira ati "Ikibabaje ni uko usanga abo batunenga bumva ko ibyabo tutagira icyo tubivugaho, ndetse tumaze igihe tubibona iwabo w’abo baba bigisha za demokarasi, batunenga ko hariyo ibibazo, barakora amatora bakarwana, bakajya mu mihanda kandi biriya mu Rwanda ntibijya bibaho. U Rwanda tumaze kugera ku rwego rwiza rushobora kuba ruruta urwa bimwe muri ibyo bihugu bitunenga."

Ashimangira ko Abanyarwanda bamaze kugera ku rwego rushimije mu mitekerereze n’imyumvire ku buryo batora bitewe n’amahitamo ajyanye n’ibyo baba bifuza kugeraho.

Amatora yo muri Kanama 2017

Ingengo y’Imari y’amatora y’Umukuru w’Igihugu mu 2017 ingana na miliyari 5.5 z’amafaranga y’u Rwanda, akaba yaragabanutseho miliyoni 500 ugereranyije n’ayakoreshejwe mu matora ya 2010 ariko na none yikuba birenze kabiri ku yakoreshejwe mu ya 2003 kuko yanganaga na miliyari 2.3 z’amafaranga y’u Rwanda.

Mu matora ateganyijwe uyu mwaka, kwakira kandidatire ku mwanya wa Perezida wa Repubulika byahawe iminsi 10 hagati y’itariki 5 na tariki 14 Kamena 2017, bikazakurikirwa no gutangaza kandidatire zemejwe by’agateganyo bizaba kuwa 22 Kamena, nyuma y’iminsi nk’itanu hakaba gutangaza lisiti ntakuka y’abakandida bemejwe bizakorwa kuwa 27 Kamena.’

Ku banyarwanda bemerewe gutora bazatorera mu gihugu, itora rizaba ku itariki 04 Kanama 2017, azaba ari kuwa Gatanu. Undi munsi ni Abanyarwanda bari mu mahanga bo bazatora mbere, kuwa Kane tariki ya 3 Kanama 2017.’

Kwiyamamaza bizaba hagati ya tariki 14 Nyakanga bikagera ku itariki ya 3 Kanama imbere mu gihugu, mu gihe hanze bizarangira ku itariki ya kabiri kubera ko bazaba bagomba gutora ku itariki ya gatatu.

Perezida Kagame ubwo yitabiraga amatora y'Umukuru w'Igihugu mu 2010

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244