Kwamamaza

Kutitabwaho kw’inganda ntoya mu bikomeje kubangamira gahunda ya ‘Made in Rwanda’

Yanditswe kuya 19-12-2016 saa 21:57' na Mukaneza M.Ange


COMMENTS: 3

Nubwo Leta y’u Rwanda ikomeje gushyira imbaraga mu bikorwa bigamije guteza imbere umuco wo gukoresha ibikorerwa imbere mu gihugu binyuze muri gahunda ya ‘Made in Rwanda’, bamwe mu bafite inganda nto bavuga ko kutitabwaho no kudahabwa ubufasha bakeneye biri mu bituma intego bihaye itagerwaho.

‘Made in Rwanda’ ni gahunda yatangijwe na leta y’u Rwanda mu myaka ibiri ishize, nk’igisubizo mu gukuraho icyuho kiri hagati y’ibitumizwa n’ibyoherezwa mu mahanga.

Inyigo yakozwe na Ministeri y’Ubucuruzi, Inganda n’Ibikorwa by’Umuryango wa Afurika y’Iburasirazuba(MINEACOM) igaragaza ko Made in Rwanda izatuma igihugu kizigama 18% by’amadovize yatangwaga hatumizwa ibicuruzwa hanze.

Mu nama yahuje MINEACOM n’abikorera ku itariki ya 19 Ukuboza 2016, abafite inganda ntoya bagaragaje zimwe mu mbogamizi bahura na zo zirimo no kuba nta mahirwe y’umwihariko bahabwa atuma babasha kwiyubaka.

Nshimyumuremyi Cephas washinze uruganda rukora amavuta yitwa Uburanga yagize ati” Gutangiza inganda n’ibintu biba bikomeye, nubwo tubyita gutangirira ku nganda ntoya, ariko usanga amabwiriza yo kuzitangiza ari amwe mu Rwanda. Ari biriya bigo bireba ubuziranenge, imisoro byose usanga ari bimwe.”

Yakomeje avuga ko iyo witegereje usanga inganda ntoya aho koroherezwa, amahirwe menshi ahabwa abafite inganda nini aho bagenda basonerwa ibintu bitandukanye birimo n’imisoro.

Nshimyuremyi avuga ko we asanga leta yagakwiye kuvugurura amabwiriza n’amategeko agenga ubucuruzi no gutangiza inganda kugira ngo n’abandi bafite imishinga bifuza gushyira mu bikorwa babigereho.

Ibi kandi abahurijeho n’abandi banyenganda barimo na Ngirente Militon ufite uruganda rutunganya amata n’ibiyakomokaho wavuze ko asanga gahunda ya ‘Made in Rwanda’ isa n’iyahereye ku mutwe, aho guhera hasi ku mizi.

Ngirente yakomeje avuga ko leta ikwiye gukora isesengura ikamenya impamvu imishinga itangira ihagaze neza ndetse igahabwa ibihembo ariko hashira igihe gito ugasanga ba nyirayo bafunze imiryango.

Minisitiri wa Minecacom, François Kanimba na we yavuze ko koko abagitangiza inganda ntoya bakunze guhura n’imbogamizi zirimo n’ikibazo cy’amafaranga kandi ugasanga ikigega BDF na banki zidafite ubushobozi bwo kubibakemurira.

Ati” Umwe mu myanzuro yagezweho ni ukongera kwisuzuma tukareba uburyo inzego za leta zigamije gutanga ubufasha ku bantu bakihangira imirimo zubatswe, ahantu tubona tugifite intege nkeya tukareba uburyo zakongerwa.”

Kanimba kandi yavuze ko mu bigaragara, abagitangira inganda ntoya bakwiye kwitabwaho by’umwihariko kuva bagitangira, ibi bikazakorwa binyuze mu Kigo cy’igihugu gishinzwe Ubushakashatsi n’iterambere mu byerekeye inganda’ (NIRDA).

Mu bindi bibazo byagaragajwe harimo kuba hari gahunda zimwe na zimwe leta igenda ishyiraho ariko ugasanga abagenerwabikorwa ntibigeze babimenya, ahandi ugasanga amategeko yashyizweho ntakurikizwa.

Iyi nama yabaye mu gihe kuva ku itariki ya 14 Ukuboza 2016, i Gikondo habereye imurikagurisha ry’ibikorerwa mu Rwanda ‘Made in Rwanda Expo’. Iri murikagurisha riri kuba ku nshuro ya kabiri rizasozwa ku itariki ya 20 Ukuboza 2016.

Bamwe mu bitabiriye inama yahuje MINEACOM n’abikorera ku itariki ya 19 Ukuboza 2016

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 11 Mutarama 2017
Copyright © 2009 -2014 - IGIHE Ltd - All Rights Reserved