Kutohereza abakoze Jenoside mu Rwanda ku Bafaransa si igitangaza- Nkusi

Yanditswe na Uwishyaka Jean Louis
Kuya 30 Ukwakira 2016 saa 08:47
Yasuwe :
0 0

Umuvugizi w’Ubushinjacyaha bukuru bw’u Rwanda, Faustin Nkusi, yatangaje ko ubutabera bw’u Bufaransa bwiyemeje kutohereza mu Rwanda abakekwaho kugira uruhare muri Jenoside yakorewe Abatutsi, bityo ngo kuba bukomeje uwo mugambi nta we byatungura.

Muri iki Cyumweru Urukiko rusesa imanza mu Bufaransa rwafashe umwanzuro wo kutohereza mu Rwanda, Padiri Hitayezu Marcel ukekwaho kugira uruhare muri Jenoside yakorewe Abatutsi mu 1994 rwitwaje ko icyaha cya Jenoside akurikiranyweho kitari mu gitabo cy’amategeko ahana ibyaha mu Rwanda igihe cyakorwaga.

Ubushinjacyaha bukuru mu Rwanda butangaza ko butatunguwe n’icyo cyemezo, bitewe n’uko ngo atari ubwa mbere bubikoze.

Nkusi aganira na RBA yagize ati “Twebe turumva nta gitangaza mu by’ukuri ku gufata icyemezo nk’iki, kubera ko hari n’ibyemezo byinshi bimaze gufatwa n’urukiko rusesa imanza rwo mu Bufaransa cyo kutohereza abantu basize bakoze Jenoside yakorewe abatutsi mu Rwanda. Ni umurongo bafashe kandi biyemeje."

Yakomeje agira ati “Kugeza ubu nta gitangaza tubona kuko hari imanza zigera kuri 17 zamaze gufatwaho icyemezo n’urukiko rusesa imanza mu Bufaransa ruvuga ko abakurikiranywe batagomba koherezwa mu Rwanda, kandi mu by’ukuri hari impapuro zakozwe n’ubushinjacyaha bw’u Rwanda busaba ko boherezwa."

Nkusi yavuze ko mu gihe ubwo butabera budashaka kubohereza mu Rwanda bwagakwiye kubakurikirana mu bundi buryo.

Ati “Kutabohereza na none ubwo ni uburenganzira bwabo niba ari umurongo bafashe, ariko hari inshingano bafite nk’igihugu zo kuba banababuranisha.”

Nkusi yakomeje avuga ko Padiri Hitayezu yagombye kuburanishwa ku byaha bya Jenoside n’ibyibasiye inyokomuntu akekwaho, kuko ari mpuzamahanga bireba abantu bose.

Padiri Hitayezu akomoka i Mubuga mu Karere ka Karongi, ari n’aho ibyaha akekwaho yabikoreye.

Ubushinjacyaha bukuru bw’u Rwanda bwanditse inyandiko zisaba u Bufaransa kumwohereza kuburanira mu Rwanda muri 2015.

Urwo rwego rumaze koherereza u Bufaransa inyandiko zo kohereza mu Rwanda abantu 39, ariko nta n’umwe icyo gihugu kirohereza nkuko bimwe mu bindi bihugu by’amahanga bigenda bibigaragaza.

Nkusi yavuze ko impamvu ubutabera bw’u Bufaransa buheraho bwanga kohereza mu Rwanda abakekwaho kugira uruhare muri Jenoside nta shingiro zifite, kuko ‘kwitwaza ko ibyaha abo bantu bakurikiranyweho bitari mu mategeko y’u Rwanda igihe byakorwaga atari byo.

Akaba yavuze ko u Rwanda rwasinye amasezerano akumira akanahana icyaha cya Jenoside mu 1948 ndetse runayashyira mu mategeko yarwo mu 1975.

Ibihugu birimo Leta Zunze Ubumwe za Amerika, Canada, Repubulika Iharanira Demukarasi ya Congo byateye intambwe yo kohereza mu Rwanda abanyarwanda bakekwaho ibyaha bya Jenoside kugira ngo baburanishirizwe aho bakoreye icyaha.

Uherutse koherezwa mu Rwanda ni Dr Léopord Munyakazi uherutse kugezwa i Kigali aturutse muri Leta Zunze Ubumwe za Amerika, aho yari amaze imyaka 12, ndetse ubu yatangiye kuburanishwa n’urukiko rw’ibanze rwa Nyarugunga.

Nkusi asaba ko mu gihe u Bufaransa buba bwanze kohereza mu Rwanda abakekwaho Jenoside bwajya bubaburanisha

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza