Kwamamaza

Kwihambiraho igisasu mu Rukiko Rukuru i Karongi

Yanditswe kuya 2-12-2016 saa 07:47' na IGIHE


Kwihambiraho igisasu ni imvugo imenyerewe ku byihebe bikoresha iterabwoba bikituritsa mu mbaga y’abantu bikabahitana bigamije gutera ubwoba ngo bihabwe ibyo bisaba. Mu Rwanda tugira amahirwe ko icyo cyorezo kitarahagera kandi nta n’aho kizamenera kuko Polisi y’u Rwanda iri maso.

Kwihambiraho igisasu ariko kandi ni n’imvugo ikoreshwa n’abaryi ba ruswa. Umuryi wa ruswa iyo umusabye gufata icyemezo cyica amategeko mu nyungu zawe ngo hari ubwo nawe akubwira ati ‘Uransaba ibigoye kabisa ariko ugize gutya ugatanga miliyoni imwe cyangwa nyinshi nakwemera nkihambiraho igisasu ikiba kikaba! Aho si ko amaherezo bizagenda i Karongi mu rubanza rwaburanwagamo Kampayana, Gasinzigwa n’akarere ka Karongi? Muti bimeze gute?

Ruswa yagorana mu rubanza rw’urucabana

Ubushize twabagejejeho inkuru y’ aho Akarere ka Karongi kashowe mu rubanza rw’amahugu hasabwa ko icyemezo Akarere kafashe mu 2008 cyo kwaka Kampayana na Gasinzigwa ikibanza bahawe ntibacyubake ntibanagisorere cyaseswa. Kanda aha usome iyo nkuru..

Mu guca urwo rubanza, umucamanza wo mu Rukiko Rwisumbuye ( TGI Karongi) yashyize mu gaciro maze avuga ko urwo rubanza rudashobora kwakirwa ku mpamvu zumvikana kandi zari zitezwe n’ushyira mu gaciro wese ushingiye ku mategeko akoreshwa muri bene izo manza zisaba iseswa ry’ibyemezo by’inzego z’ubutegetsi.

Ni mu gihe kandi kuko amategeko ateganya ko usaba iseswa ry’icyemezo cy’ubutegetsi agomba kuba yabikoze mu gihe kitarenze amezi atandatu uhereye igihe icyo cyemezo cyafatiwe. Icyo gihe hakurikizwaga itegeko n°18/2004 ryo kuwa 20/6/2004 . Ingingo ya 339 y’iryo tegeko (ryakurikijwe kugeza kuwa 16/7/2012), yateganyaga ko utishimiye icyemezo cyafashwe n’urwego rw’ubuyobozi , mbere yo kuregera urukiko, gutakambira urwego rwagifashe.

Iyo ngingo yanateganyaga ko urwo rwego rwagombaga kuba rwasubije mu gihe kitarenze amezi abiri, rwasubiza muri icyo gihe cyangwa rwaba rudasubije, unenga icyemezo yafatiwe akaba afite igihe cy’amezi atandatu cyo kuregera urukiko. Bivuze rero ko uburenganzira bwo kurega bwarangiye kuwa 8 Ukuboza 2009.

Itakamba rya mbere Kampayana na Gasinzigwa barikoze mu ibaruwa bandikiye Umuyobozi w’akarere ku itariki ya 8 Mata 2009. Nyamara Kampayana na Gasinzigwa baregeye urukiko bwa mbere muri 2015 ni ukuvuga nyuma y’imyaka 6 itakamba rya mbere ryabo ribayeho ari nayo mpamvu Urukiko rwisumbuye rwa Karongi rwakijije ko urwo rubanza rudashobora kwakirwa.

Ruswa ntishoboka kandi n’Ubuswa ntibwaba urwitwazo!

Ubusanzwe hari igihe umucamanza wakoze amakosa akabije bitewe na ruswa ahitamo gutakamba avuga ati rwose ni byo koko icyemezo nafashe ntigikwiye ariko nta ruswa nariye ahubwo icyo nakwemera ni uko harimo ubuswa! Aha ho ntibinashoboka kuko urukiko rwisumbuye mu mwanzuro warwo rwasobanuye bihagije impamvu ikirego kidakwiye kwakirwa ku buryo Umucamanza wo mu Rukiko Rukuru watesha uwo mwanzuro agaciro yabanza kugaragaza impamvu ibimuteye.

Kera ibya Leta byaribwaga nk’ibitagira nyirabyo

Ari kera ntibyari kugorana kuko iyo bavugaga ko umucamanza aruca uko arwumva mu bwigenge bwe. Kuri ubu ibintu byarahindutse. Perezida Paul Kagame yashoje impaka ku bwigenge butagira kigenzura bw’abacamanza ari nayo mpamvu na bo basigaye bagira ubugenzuzi bukanuye. Minisitiri Johnston Busingye nawe mu byo yahagurukiye harimo ko ababuranira Leta bakwiye kwirinda ikintu cyose cyatuma itsindwa by’amaherere ndetse aho bigaragaye ko hari ababigizemo uruhare bakaba bazi ko bashobora kubiryozwa.

Bumwe mu buryo bwajyaga bwifashisha mu gutsindisha Leta bwabaga ko uwabonye igihe cyaramurenganye yahitagamo kongera agasaba urwego rwafashe icyemezo ko rugikuraho maze rwamuhakanira agatangiza ubundi bujurure bw’icyemezo cya nyuma igihe gishya kitararenga. Muri uru rubanza bwo byaranze kuko uburanira Leta, Me Gahongayire Myriam, ntako atagize kuko yageze ubwo yifashisha ibyemezo byaciwe n’Urukiko rw’Ikirenga mu manza zisa nk’uru.

Yagaragaje mu myanzuro ye ko ikirego kije impitagihe kidashobora kwakirwa na gato. Yongeyeho ndetse ko Urukiko rw’Ikirenga rwasibiye amayira abajyaga birindagiza bakongera gusaba bundi bushya kuko mu rubanza KIST yaburangamo na Athanase Hafashimana no mu rubanza UNR yaburanagamo na Emmanuel Gakwaya Urukiko rw’Ikirenga rwakijije ko ‘iyo habayeho gutakamba kwinshi mu bihe bitandukanye, kubara iminsi yashize bibarwa haherewe ku itamba rya mbere. Bivuze ngo muri urubanza rwa Gasinzigwa na Kampayana ni ho kubara ya minsi bigomba guhera muri 2009’.

Igiteye amakenga

Ubundi amategeko agenga ubujurire bw’imanza avuga ko kugira ngo ubujurire bwandikwe uwajuriye agomba kugaragaza mu nyandiko ye y’ubujurire ko ababuranyi bose bahamagarwa mu bujurire yabashyikirije icyemezo cye cyo kujurira n’imyanzuro y’ubujurire. Ibyo iyo atabikoze rukaba ubujurire butagomba kwandikwa.

Nyamara Umwanditsi mu Rukiko rw’Ubujurire urugereko rwa Karongi we yahisemo kwandika ubujurire yirengagije ko Leta iregwa mu rubanza n’uwahawe icyo kibanza bagobokeshejwe batigeze na rimwe bamenyeshwa imyanzuro nk’uko ababahagarariye babigaragaje.

Inzira iracyari ndende

N’ubwo amakosa nk’aya akiboneka mu nkiko ntawe byatera kwiheba kuko Leta yahagarukiye guca ruswa mu bucamanza. Ubwo yatangizaga Umwaka w’ubutabera, Perezida Kagame yagarutse kuri iki kibazo cya ruswa kandi akoresha amagambo akarishye ku buryo byateye icyizere ko n’abarya ruswa bazajya bayirya bazi ingaruka zabyo.

Leta yashyizeho ubugenzuzi bw’inkiko buhora bwakira abanyarwanda babugaragariza amakosa y’abacamanza kandi hagakorwa iperereza. Amategeko yaravuguruwe ku buryo bimwe bya kera byo kuvuga ko iyo ruciwe mu rwego rwa nyuma icyemezo kiba ari ndakuka bitakibaho.

Ubu Umuvunyi n’Ubugenzuzi bukuru bw’Inkiko bahawe ububasha bwo gusuzuma imanza zagaragayemo akarengane gakabije gashingiye ku kwica amategeko nkana zikaba zasabirwa isubirwamo bitajyaga gushoboka cyera. N’ubwo ibi byose bitavanyeho burundu akarengane mu nkiko, ku buryo twavuga ndetse ko inzira ikiri ndende, ntawahakana ko ikivi cyasojwe kingana umusozi.

Gasinzigwa yabonye bikomeye akuramo akarenge

Akarere ka Karongi nako ntibazakihererane. Hazakoreshwe ukuri Leta nitsindwa itsindwe ariko nihabaho uburiganya bene bwo bakurikiranwe. Ndetse ikigaragara kandi umuntu yashima ni uko Gasinzigwa we yahisemo kwemera umwanzuro w’Urukiko rwisumbuye ku buryo mu bujurire hagiyemo Kampayana gusa. Urwo rubanza ruzaburanishwa ku itariki ya 20 Ukuboza.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved