IGIHE.com > Amakuru > U Rwanda
Kwimurira Akarere mu Murenge wa Gacurabwenge, inyungu ku batuye Kamonyi yose

Kwimurira Akarere mu Murenge wa Gacurabwenge, inyungu ku batuye Kamonyi yose


Yanditswe kuya 8-07-2013 - Saa 17:30' na Gilbert H. Mwizerwa

Nyuma y’aho byemejwe n’Inama Njyanama y’Akarere ka Kamonyi ko kagomba kwimuka aho kakoreraga mu Murenge wa Rukoma kakimukira mu Murenge wa Gacurabwenge, ubuyobozi bw’aka karere buratangaza ko bizaba ari ukugabanya ingendo ku baturage batuye mu Mirenge yose uko ari 12 bafite.

Umuyobozi w’Akarere ka Kamonyi Jacques Rutsinga, avuga ko iyi nyubako izaba igizwe n’amagorofa atatu kandi yujuje ibyangombwa byose, ikaba iherereye ahatagoye kugera.

Rutsinga agira ati "Iyi nyubako ijyanye n’igihe kandi izorohera benshi kubona serivise zitangwa n’Akarere kuko aho twakoreraga hasaga n’ahitaruye cyane umuhanda kandi ari na hato, bityo bikagora abaturage bacu. Ubu tugiye kugashyira hagati ahashobora korohera buri wese aho ava hose mu Mirenge 12 igize aka Karere."

Akomeza avuga ko muri uyu mwaka w’ingengo y’imari bagiye gutangira kubaka kuko bafite amafaranga y’igice cya mbere agera kuri miliyoni 400 azava ku ngengo y’imari 2013-2014.

Uretse ibi kandi byo korohereza abaturage babegereza ubuyobozi bw’Akarere, Umuyobozi w’Akarere ka kamonyi yatangarije IGIHE, ko mu rwego rwo gutinyura abashoramari no kureshya ba mukerarugendo hagiye gutangira kubakwa inzu y’abashyitsi (Guest house) izatwara miliyoni 150 ahitwa ku Ijuru rya Kamonyi, hazwi cyane mu mateka y’igihugu nk’ahantu ndangamateka. Aho hatuye Umwami Yuhi wa III Mazimpaka n’abamukurikiye kugeza kuri Yuhi Musinga. Ni naho hari hatuye Nyomberi, umurashi w’umuheto w’icyamamare wo mu ngabo za Mazimpaka.

Ibi byose kandi biri gukorwa nyuma y’ibindi bikorwa by’indashyikirwa bigenda byesa imihigo mu Karere ka Kamonyi aho ku mwanya wa 2 mu gihugu n’amanota 95.1%.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO