Kwamamaza

Leta igiye gutangira kwaka umusoro ku igurishwa n’ihererekanya ry’imitungo itimukanwa

Yanditswe kuya 31-10-2016 saa 08:27' na Rabbi Malo Umucunguzi


Umushinga mushya w’itegeko rigena imisoro itaziguye ku musaruro uri kuganirwaho mu Nteko Ishinga Amategeko, uteganya umusoro wa 5% ku giciro kigurishijwe umutungo utimukanwa kimwe no ku gaciro k’umutungo uhererekanyijwe ku buntu, bikozwe n’umuntu ku giti cye.

Uyu mushinga w’itegeko ugena isoreshwa ry’imitungo irimo inzu cyangwa ubutaka, ufite ingingo zireba ibikorwa bisanzwe bisoreshwa, n’umwihariko wo gusoresha iyi mitungo itimukanwa igurishijwe cyangwa ihererekanyijwe ku buntu bikozwe n’ umuntu ku giti cye, mu gihe byasoreshwaga iyo ari umutungo utimukanwa w’ikigo runaka.

Nuramuka utowe nk’itegeko, uzasimbura itegeko N° 16/2005 ryo ku wa 18/08/2005 rigena imisoro itaziguye ku musaruro.

Uyu mushinga w’itegeko ugena ko umutungo utimukanwa ugurishijwe cyangwa ugahererekanwa ku buntu, urebwa n’umusoro wa 5%, ukamenyekanishwa kandi ukishyurwa n’uwaguze mu minsi 15 ikurikira ukwezi igurishwa ryabayemo.

Ku mutungo wahererekanyijwe ku buntu, umusoro uzajya ubarwa hagereranyijwe agaciro k’umutungo wahererekanyijwe, ukamenyekanishwa kandi ukishyurwa n’uwakiriye, mu mezi atandatu nyuma y’ukwezi ihererekanya ryakorewemo.

Gusa iri tegeko ntirizareba ibyiciro bine birimo; igurishwa cyangwa ihererekanya ry’inzu iciriritse yo guturwamo itarengeje agaciro kazagenwa n’iteka rya Minisitiri ushinzwe ibikorwa remezo; igurishwa ry’inzu yo guturamo yubatswe ikanagurishwa n’ikigo gikora ubwubatsi; Ihererekanya ku buntu ry’umutungo utimukanwa w’umuntu witabye Imana ku mwana uri munsi y’imyaka 21; n’ihererekanya ku buntu ry’umutungo utimukanwa uhawe umwe mu babanaga mu gihe batakiri kumwe, umwe yapfuye cyangwa bahawe gatanya.

Komiseri Ushinzwe Imisoro y’imbere mu gihugu, mu Kigo cy’Igihugu gishinzwe Imisoro n’Amahoro, Aimable Kayigi Habiyambere, yabwiye The New Times ko gusoresha umutungo wagurishijwe cyangwa wahererekanyijwe ku buntu bizafasha gusoresha abantu bakomeza kwiyongera mu bucuruzi bwo kubaka inzu bagahita bazigurisha.
Ati “Abantu babona inyungu ariko badatanga umusoro. Ushobora gusanga umuntu yinjiza miliyoni 100 Frw nyuma yo kugurisha inzu miliyoni 300 Frw, kandi ntibishyure umusoro kuri iyo nyungu. Turashaka gukora ku buryo amafaranga yinjizwa ku igurishwa ry’ubutaka, inzu cyangwa urwuri atangirwa umusoro,’’

Iri tegeko rizareba abantu babona inyungu ikomeye mu igurishwa ry’iyi mitungo, bitareba nk’abantu bafite inzu ntoya zo guturamo, kuko Kayigi yavuze ko rishobora kuzareba nk’inzu zifite agaciro gahera kuri miliyoni 30 Frw kuzamura, ariko ibizarebwa naryo bikazasohoka mu iteka rya Minisitiri ushinzwe ibikorwa remezo, nirimara gutorwa.

Ibiganiro kuri uyu mushinga w’itegeko rigenga imisoro bizakomeza muri Komisiyo y’Ingengo y’Imari n’Umutungo mu byumweru biri imbere, harebwa niba hari ibishobora guhindurwa, bikavanwamo cyangwa bikanozwa kurushaho.

Kayigi Habiyambere, ubwo yari mu biganiro na Komisiyo Ishinzwe Ingengoy'Imari n'Umutungo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved