Kwamamaza

Leta yiyemeje gufasha abashyingiranywe badafite ibyangombwa

Yanditswe kuya 24-11-2016 saa 19:37' na Ntakirutimana Deus


Leta y’u Rwanda iratangaza ko igiye gufasha abaturage bavuga ko basezeranye mu buryo bwemewe n’amategeko, ariko bakaba nta cyemezo kibihamya gihari, iborohereza kubibona.

Ibi Minisitiri w’Ubutegetsi bw’Igihugu, Francis Kaboneka, yabitangaje mu kiganiro aheruka kugirana n’abanyamakuru ku itangizwa ry’ukwezi kwahariwe irangamimerere.

Mu Rwanda ngo hari ingo zitandukanye zashyingiranwe imbere y’amategeko ariko ugasanga nta kibigaragaza kubera ko ibitabo by’irangamimerere banditswemo byagiye bitwikwa mu turere nka Muhanga kigeze kwibasirwa n’abacengezi, ibyangijwe mu ntambara n’aho byabuze mu gihe cyo kwimura ibitabo byari mu makomini bijyanwa mu turere dushya mu gihe cy’ivugururwa ry’inzego z’igihugu.

Abadafite icyo cyemezo cyo gushyingiranwa bishobora kubagiraho ingaruka zirimo nko kuba babura inguzanyo muri banki cyangwa abifuza izindi serivisi zibanzirizwa no kwerekana icyo cyangombwa ntibazibone.

Kaboneka ati “Gushyingiranwa, kubihagararaho biba bisaba ko hari ikimenyetso simusiga kigaragaza ko mwashyingiranwe.”

Yavuze kandi ko hari ibyiciro bitandukanye by’abafite ibibazo bakeneye icyo cyangomwa. Aba mbere ni abasezeranye igihe babikangurirwaga mu kivunge bakandikwa mu bitabo bagasinya ariko ugasanga habayemo ikosa wenda uwashyingiye ntasinye.

Icyiciro cya kabiri kirimo abasezeranye ariko ntibyandikwe ndetse ntibanasinye. Gusa abo bose Minisitiri Kaboneka abizeza ko ibibazo byabo bigomba gukemuka kandi bidatinze.

Ati “ Ntaho basinye, ntaho bigaragara, uyu munsi kubihagararaho ukavuga uti ‘aba bantu barasezeranye birakomeye’. Hari abiyandikaga ntibasinye, abo ngabo turimo gushaka uko twabafasha, ariko birasubira mu rukiko.”

Yakomeje agira ati “Turashaka kubafasha kugira ngo bishobore kwihuta. Ubuyobozi bubigire ibyabwo, buherekeze abo baturage bajye mu rukiko urwo rugendo rurangire rutavunnye abaturage kandi mu gihe gito babe babonye ibyangombwa.”

Kaboneka kandi yavuze ko bifuza ko ibyo bibazo byarangira mu kwezi kwahariwe Irangamimerere kwatangiye ku wa Gatatu, tariki ya 23 Ugushyingo 2016, abanyarwanda bakaba bazakomeza kubisobanurirwa kugira ngo birangire.

Minisitiri Kaboneka avuga ko abasezeranye bakaba badafite ibyangombwa bagiye gufashwa kubibona

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved