Leta mu kwesa umuhigo wo guhanga imirimo idashingiye ku buhinzi 2000 buri mwaka

Yanditswe na Ishimwe Israel
Kuya 19 Ugushyingo 2016 saa 03:34
Yasuwe :
0 0

Kuva mu mwaka wa 2011 kugeza muri 2014, hamaze gushingwa imirimo ibihumbi 530 idashingiye ku buhinzi bikaba bigaragaza ko buri mwaka hashingwa nibura imirimo isaga ibihumbi 176 mu gihe Leta y’u Rwanda yihaye gahunda yo guhanga imirimo ibihumbi 200 buri mwaka.

Ubwo yasozaga ku mugaragaro ubukangurambaga ku kwihangira imirimo (NEP Kora wigire) bwari bumaze ukwezi bukorerwa hirya no hino mu gihugu, Minisitiri w’Intebe, Anastase Murekezi, yagarutse ku mibare y’ubushomeri agaragaza ko hari akazi kanini ko gukorwa na buri wese dore ko mu Banyarwanda basaga miliyoni eshanu bafite ubushobozi bwo gukora, Leta ibasha guha akazi abangana na 3%.

Ati “Kuva muri 2011 kugeza muri 2014 imirimo idashingiye ku buhinzi yiyongereyeho ibihumbi 530, ubwo ni ukuvuga ko ari ikigereranyo cy’imirimo ibihumbi 176 buri mwaka ihangwa mu bucuruzi, ubukorikori n’ibindi.

Nkuko bikubiye mu cyererekezo 2020 na EDPRS ya Kabiri, guhanga imirimo mishya ni umusingi wo kwiteza imbere no kurwanya ubukene mu buryo bugaragara aho hari gahunda yo guhanga imirimo nibura ibihumbi 200 buri mwaka idashingiye ku buhinzi.

Nubwo iyo mirimo ibihumbi 146 ihangwa buri mwaka , Minisitiri w’Intebe Murekezi yavuze ko idahagije kuko imibare y’ubushomeri cyane mu rubyiruko rwarangije Kaminuza igiteye inkeke

Ati “Ubushakashatsi buheruka bwerekana ko ubushomeri mu Rwanda buri kuri 2%, nubwo bisa nkaho bidakanganye ariko ubushomeri mu rubyiruko muri rusange buri kuri 4%, ubushomeri mu mijyi buri ku 9% mu gihe mu barangije kaminuza buri ku kigero cya 14%.”

Minisitiri w’Intebe, Anastase Murekezi, yavuze ko impamvu ubushomeri burushaho kwiyongera mu barangiza za Kaminuza, ari uko usanga barize amasomo atajyanye n’ibikenewe ku isoko ry’umurimo, bityo hakaba haragiyeho ingamba zo guhindura integanyanyigisho.

Ati “Zimwe mu mpamvu zitera ubushomeri mu Rwanda no muri Afurika ni rusange ni uko bamwe mu barangiza kwiga za kaminuza usanga barize ibitajyanye n’ibikenewe ku isoko ry’umurimo,akaba ariyo mpamvu amasomo agenda avugururwa ngo higwe ibikenewe, amasomo ahuzwe n’ibikenewe ku isoko ry’umurimo. Mu mwaka wa 2018 abiga mu mashuri y’Uburezi bwibanze bw’imyaka cumi n’ibiri bazaba ari 60% bazaba barize imyuga birumvikana ko bazaba barize gukora imirimo yo gutuma bihangira akazi bakikorera.”

Kuri ubu Leta y’u Rwanda ikangurira abantu b’ingeri zose kwihangira imirimo ibabeshaho bitewe n’uko yo itanga imirimo ku kigero cya 3% mu gihe 97% by’isigaye itangwa n’abikorera ku giti cyabo ndetse indi igahangwa.

Yibukije kandi uturere tumwe na tumwe tutarashinga udukiriro kubikora vuba kugira ngo abaturage cyane urubyiruko babone aho bahangira imirimo.

Muri uyu muhango hahembwe abantu bagize uruhare mu gufasha abantu b’ingeri zose kwihangira imirimo, abafashije urubyiruko kubona inguzanyo, ibigo bitandukanye byagize uruhare mu gutanga akazi ku rubyiruko nk’Uruganda rukora imyenda, C&H Garment, uturere twabashije gukora ubukangurambaga muri uku kwezi kwa NEP Kora wigire ku buryo bushimishije, nka Gicumbi, Musanze na Burera.

Gahunda ya NEP Kora wigire yatangijwe mu 2014, aho kuri ubu abantu 80,672 babashije guhanga imirimo idashingiye ku buhinzi babikesha iyi gahunda.

Abantu 7,438 babashije guhabwa ingwate zibafasha gukora imishinga ku bufatanye bw’iyi gahunda n’Ikigega gitera inkunga imishinga iciriritse, BDF. Abajyanama mu by’ubucuruzi bafashije abantu 24,702 kubona inguzanyo zo gukora imishinga ibateza imbere.

Minisitiri w'Intebe, Anastase Murekezi, uw'Umurimo, Judith Uwizeye, n'uw’Ubucuruzi n’Inganda n’Umuryango w’Ibihugu bya Afurika y’Iburasirazuba, Kanimba François berekwa bimwe mu bikoresho byakozwe n'abihangiye imirimo
Urubyiruko rwitabiriye umuhango wo gusoza ubukangurambaga ku kwihangira imirimo (NEP Kora wigire)
Minisitiri Murekezi Anastase ashyikiriza umwe mu bagize uruhare mu guhanga imirimo ishimwe
Uhereye iburyo mu bicaye ( Meya w’Umujyi wa Kigali, Mukaruliza Monique, Umunyamabanga wa Leta muri MINALOC ushinzwe imibereho myiza no kurengera abaturage, Dr Mukabaramba Alvera, Minisitiri wa MINEACOM, Kanimba François, Umunyamabanga wa Leta muri MINEDUC ushinzwe amashuri y’imyuga n’ubumenyi ngiro, Rwamukwaya Olivier, Minisitiri w’Intebe, Anastase Murekezi, uw’Umurimo, Judith Uwizeye, na Guverineri w’Intara y’Iburasirazuba, Kazayire Judith

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza