Leta yagiriwe inama yo gushyira ku mipaka imbwa zihura ibiyobyabwenge

Yanditswe na Evariste Nsengimana
Kuya 13 Kamena 2018 saa 06:05
Yasuwe :
1 0

Ikoreshwa n’icuruzwa ry’ibiyobyabwenge ni ikibazo gihangayikishije u Rwanda n’Isi muri rusange kandi inzego z’umutekano zigaragaza ko bimwe mu bikoreshwa mu gihugu birimo urumogi, kanyanga n’ibindi byinjira biturutse mu bihugu biri mu Karere u Rwanda ruherereyemo ku buryo hakenewe ingamba zihamye mu kubikumira.

Minisiteri y’Ubuzima mu Rwanda igaragaza ko ababikoresha barushaho kwiyongera kuko mu 2016 hafashwe ababinywa n’ababicuruza 4818, hafatwa ibiro by’urumogi bisaga toni 4.5, litiro za kanyanga 18,238.1, ibiro 4,1 bya Heroine (mugo) kandi ko mu babifatiwemo harimo 35 batarageza imyaka 18 naho mu mezi ane abanza ya 2017, hafashwe ibiro 1,887 by’urumogi, litiro 3,299 za kanyanga, ibiro bine bya mugo n’ibindi.

Mu nama nyunguranabitekerezo ku ikoreshwa ryabyo yabaye ku wa 12 Kamena 2018, Umushinjacyaha Mukuru w’u Rwanda, Mutangana Jean Bosco, yagaragaje ko ibyinshi bituruka mu bihugu byo mu Karere u Rwanda ruherereyemo.

Ati “Icyaha cy’ibiyobyabwenge ni icyaha cyambuka imbibi. Ni ibyaha bigoye cyane ko ababa babikora baba bari mu bucuruzi bugamije inyungu akaba ariyo mpamvu bidacika mu buryo bworoshye. Hari ibifite agaciro kanini, nka heroine, cocaine n’urumogi. Abarunywa ntabwo rubahenda cyane. Amafaranga avamo niyo atuma bikomeza gukoreshwa kuko byambuka imbibi kandi dufite ibihugu bifite imipaka igoye kugenzura.”

Yatanze urugero ku mupaka wa Kagitumba kugera Ruhengeri ko mu minsi ishize hatahuwe ahantu hacishwa ibiyobyabwenge harenga 80 hatemewe, avuga ko nubwo inzego z’umutekano zigerageza kubikumira ariko ko hatabura abazica mu rihumye.

Aho niho Umuyobozi w’Ibitaro bya Gisenyi, Maj. Dr. Kanyankore William, yahereye agaragaza ko hakwiye gukazwa umutekano ku mipaka, hakanifashishwa imbwa zihura ibiyobyabwenge.

Ati “Twabonye urugero rwiza ubushize tujya gusura ikibuga cy’indege. Kuva bahashyira ziriya mbwa zihumuriza abantu, byagabanyije cyane, umuntu wese utekereza kuba yakwambutsa ibiyobyabwenge. Tukibaza, ‘ku yindi mipaka ni iki cyakorwa kugira ngo habeho imbwa n’ibindi bikoresho bifite ubushobozi buhambaye bwo gutahura ibiyobyabwenge.”

Yavuze ko usanga abantu benshi babyambukana cyane, atanga urugero nko ku mupaka wa Congo n’u Rwanda i Rubavu ko bisa n’ibyananiranye gukumira ababyinjiza kuko uburyo bakoresha butazwi, atanga inama y’uko ku mipaka hakoreshejwe izo mbwa byagabanya ababihanyuza.

Umuvugizi wa Polisi y’u Rwanda, CP Theos Badege, yavuze ko ziriya mbwa mu Rwanda zihari ariko zidahagije ku buryo haboneka izishyirwa ku mipaka.

Ati “Nemeranya nawe ko tutaragera aho twifuza mu bijyanye no gukumira ziriya mbwa mubona ku mipaka, ku kibuga cy’indege turanazifite zikora n’ibindi bikorwa ndetse zijya no gukora imikwabu hirya no hino ariko ntituragira imbwa zo gushyira ku mipaka. Tugomba kuzongera.”

Yunzemo ati “Ziriya mbwa rero mubona zirahenze, zikenera ingengo y’imari yazo ariko gahunda yazo iri mu igenamigambi.”

Gusa yagaragaje ko hakenewe ubufatanye bw’inzego zose kuko bitabaye ibyo, usanga ingamba zifatirwa ku cyambu kimwe hanyuma bikanyuzwa mu zindi nzira zitemewe.

Minisiteri y’Ubuzima ivuga ko gukoresha ibiyobyabwenge bigira ingaruka zikomeye zirimo n’uburwayi bwo mu mutwe. umwihariko mu bitaro bivura indwara zo mu mutwe bya Ndera, hakiriwe abarwayi 994 mu 2010, mu 2015 hakirwa 1,432 mu wa 2016, hakirwa 2804, naho mu mu mu 2017 hakirwa 1960.

Si byo gusa kuko mu kigo ngororamuco cya Huye mu 2017 hakiriwe abagera kuri 209 bafite ibibazo bituruka ku ikoreshwa ry’ibiyobyabwenge naho mu bitaro by’uturere hakirwa abagera kuri 448.

Minisiteri y’Urubyiruko iheruka gutangaza ko mu Rwanda urubyiruko rusaga ibihumbi 16 n’abakuze basaga 5000 bakoresha ibiyobyabwenge.

Polisi yasabye gushyira ku mipaka imbwa zigenzura niba nta biyobyabwenge byinjiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza