Kwamamaza

Leta yahagurukiye ikibazo cy’abagwingiye,abafite inzara n’abananutse kubw’imirire mibi

Yanditswe kuya 24-03-2016 saa 18:45' na Ntakirutimana Deus


Minisitiri w’Intebe Anastase Murekezi yatangaje ko u Rwanda rwahagurukiye ikibazo cy’inzara, icy’imirire mibi ndetse no kugwingira ku buryo mu mwaka wa 2020 ibyo bibazo bizaba byaragabanutse ku buryo bugaragara.

Minisitiri Murekezi yemeza ko u Rwanda rurimo gukora ibishoboka ku buryo mu mwaka wa 2025 ruzaba ruri mu bihugu byatsiratsije inzara.

Imbere y’abayobozi baturutse mu bihugu bitandukanye byo hirya no hino ku Isi, mu nama ihuje ibihugu bihuriye kuri gahunda yiswe Compact 2025 igamije kurandura inzara n’imirire mibi, Minisitiri Murekezi yavuze ko u Rwanda rwashyizeho gahunda zigamije kurandura inzara.

Ubushakashatsi ku buzima n’ubwiyongere bw’abaturage mu Rwanda mu mwaka wa 2015, bwagaragaje ko abana 38% bari munsi y’’imyaka itanu bafite ikibazo cyo kugwingira, abantu 19% bafite ikibazo cy’inzara bashobora gukira baramutse babonye umusaruro ariko bawubura bakongera guhura nayo, ndetse na hari 2% bafite ikibazo cyo kunanuka birenze urugero kubera imirire mibi.

Minisitiri Murekezi yavuze ko leta y’u Rwanda yagiye itangiza gahunda zitandukanye muri politiki zayo zigamije kurandura inzara n’ibibazo bifitanye isano.

Muri izo gahunda harimo kugena za gahunda z’imbaturabukungu(EDPRS ya mbere n’iya kabiri), Icyerekezo 2020, Gahunda za VUP, gahunda ya Girinka imaze kugeza isizaga ibihumbi 250 ku baturage, ndetse n’inkongoro imwe ku mwana yatangijwe mu mashuri abanza.

Minisitiri Murekezi yerekanye ko izo gahunda zijyanye na Compact 2025 igamije kurandura inzara, kandi ko u Rwanda rufite ubushake bwa politiki.

Yagize ati “U Rwanda rufite impamvu nyinshi zo kurandura inzara, imirire mibi. Kwihaza mu birirwa birazwi neza ko ari iby’ibanze mu gaciro ka muntu, ...ni uburenganzira bwa muntu kubona ibimutunga....u Rwanda ruzakomeza gushyira mu bikorwa ingamba na gahunda zitandukanye zo kurandura inzara no kurwanya imirire mibi.”

Minisitiri w’Ubuhinzi n’Ubworozi, Dr Mukeshimana Geraldine yerekanye ko hari ingamba zashyizweho zo kongera umusaruro ndetse no kwirinda umusaruro utakara nyuma y’isarura, kwigisha ababyeyi itegurwa ry’amafunguro, kwita ku isuku n’ibindi.

Umuyobozi w’ikigo mpuzamahanga gishinzwe ingamba z’ubushakashatsi ku biribwa(Internatioanl Food Policy research institute) Shenggen Fan yavuze ko u Rwanda rufite gahunda nziza mu guhangana n’inzara, ariko ko rukwiye kwita ku bahinzi baciriritse bagahinga ibihingwa bifite intungamibiri na vitamini, nk’ibigori, umuceri, ibishyimbo n’imboga.

Yavuze ko ubusanzwe igituma inzara idacika ku isi ari uko hashyirwaho ingamba hakabura uzishyira mu bikorwa, kandi bishoboka kuzigeraho.

Gahunda ya Compact 2025 izafasha kurandura inzara mu bihugu birimo u Rwanda, Ethiopia, Bangladesh na Malawi.

Muri iyo nama, abayihuriyemo barasangira ibitekerezo,ubumenyi, ingamba n’ibyakorwa mu kwihutisha iyo gahunda.

Minisitiri w'Intebe Murekezi (ibumoso) ubwo yari ageze ahabereye inama

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Uru Rubuga Ruheruka Gushyirwaho Amakuru Saturday 30 July 2016
Copyright © 2009 -2014 - IGIHE Ltd - All Rights Reserved