Loni yahaye icyubahiro abasirikare b’u Rwanda baguye mu butumwa bw’amahoro mu bihe bitandukanye

Yanditswe na Ferdinand Maniraguha
Kuya 7 Gicurasi 2019 saa 12:15
Yasuwe :
0 0

Umuryango w’Abibumbye wahaye icyubahiro abasirikare ndetse n’abakozi b’ibigo byayo baguye mu butumwa butandukanye burimo ubwo kugarura amahoro hirya no hino ku Isi.

Mu bibutswe mu muhango wabereye ku cyicaro gikuru cya Loni i New York kuri uyu wa Mbere, harimo abanyarwanda bane bari mu butumwa bw’amahoro ndetse n’uwakoreraga ishami rya Loni.

Buri mwaka Loni yibuka abakozi bayo bapfuye bari mu butumwa bw’akazi.

Abibutswe kuri uyu wa Mbere ni abantu 115 abapfuye kuva mu ntangiriro z’umwaka ushize kugeza muri Werurwe uyu mwaka.

Abanyarwanda bibutswe ni Sergeant Jean Bosco Nsabimana na Major Richard Ntambara baguye mu butumwa bw’amahoro muri Cenfrafrique (MINUSCA), Staff Sergeant Félicien Rutagera waguye mu butumwa bwo kugarura amahoro muri Sudani y’Epfo (UNMISS) ndetse na Jackson Musoni wakoreraga ishami rya Loni rishinzwe impunzi waguye mu mpanuka yakozwe n’indege ya sosiyete ya Ethiopian Airlines muri Werurwe uyu mwaka.

Mu bibutswe bose higanjemo abasirikare bari baragiye mu butumwa bw’amahoro baturuka mu bihugu 43.

Umunyamabanga Mukuru wa Loni , António Guterres, yavuze ko kwibuka abo bakozi baguye mu butumwa ari ukuzirikana imiterere igoye y’akazi ko guharanira amahoro, ariko aboneraho gushimira umuhate w’abasore n’inkumi hirya no hino ku Isi badacika intege mu rugamba rwo guharanira amahoro.

Guterres yashimye by’umwihariko abanyafurika ubushake bakomeje kugaragaza mu kugarura amahoro mu duce turimo ibibazo batitaye ku kuba bishobora gushyira ubuzima bwabo mu kaga.

Yagize ati “Ubutwari bwa bagenzi bacu bo muri Afurika , bishimangira intego yacu yo kuzana amahoro n’umutekano ku isi.”

Mu mpanuka y’indege ya Ethiopian Airlines haguyemo abasirikare 21 bari bagiye mu butumwa bw’amahoro n’abakozi 19 b’amashami ya Loni. Guterres yihanganishije imiryango y’abitabye imana.

Yavuze ko Loni iri gukora ibishoboka byose ngo igabanye ibibazo bibangamira abajya mu butumwa bw’amahoro no mu bikorwa byayo kugira ngo akazi kabo babashe kugasohoza neza.

Yamaganye ibitero bigabwa ku birindiro by’Ingabo za Loni zishinzwe kugarura amahoro, avuga ko hakwiriye kuboneka ubutabera ku bakora ibyo byaha bakabibazwa.

U Rwanda ruza mu bihugu bya mbere bifite umubare munini w’abasirikare mu bikorwa byo kubungabunga amahoro hirya no hino ku Isi.

Muri Nzeri 2018 Raporo ya Loni yagaragaje ko u Rwanda rwari rufite abasirikare 7112 barimo abagabo 6 772 n’abagore 390. Rukurikira Ethiopia yari ifite abasirikare 8335.

Umunyamabanga Mukuru wa Loni , António Guterres, acana urumuri rwo kwibuka abaguye mu butumwa bw'amahoro
Hafashwe umwanya wo kwibuka abari abakozi ba Loni baguye mu butumwa butandukanye bwo kugarura amahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza