Kwamamaza

Madamu Claudine Talon yashimye uruhare rwa Jeannette Kagame mu guteza imbere u Rwanda

Yanditswe kuya 9-11-2016 saa 11:37' na Rabbi Malo Umucunguzi


Madamu Claudine Talon wa Benin yashimye ibikorwa Madamu Jeannette Kagame adahwema gukora by’umwihariko mu kwita ku babyeyi n’abana, asaba ko Umuryango Imbuto Foundation waba icyitegererezo ku muryango nawe yatangije muri Benin, wita ku buzima bw’ababyeyi, abana no gukwirakwiza amazi meza.

Ku mugoroba wo kuri uyu wa Kabiri, tariki ya 8 Ugushyingo 2016, nibwo Madamu Jeannette Kagame yakiriye Claudine Talon, umudamu wa Perezida Patrice Talon wa Benin, uri mu Rwanda mu ruzinduko rw’iminsi ine ruzasozwa kuwa 11 Ugushyingo 2016.

Ni igikorwa cyahuje abayobozi batandukanye, nyuma y’uko Madamu Talon yari amaze gusura urwibutso rwa Jenoside rwa Kigali aho yunamiye inzirakarengane za Jenoside yakorewe Abatutsi mu 1994 ndetse akagaragaza ko bazahora iteka ku mitima y’abasigaye.

Madamu Jeannette Kagame yavuze ko ari ishema kumwakira mu gihugu, anashimira Abanya-Benin bakorera ibikorwa bitandukanye mu Rwanda.

Ati “Ndizera ko uru ruzinduko ari intangiriro y’ubufatanye bushya hagati y’ibihugu byacu, kandi bizageza ku rundi rwego ubufatanye dusanganwe mu guhanahana ubunararibonye nk’ibihugu biri mu nzira y’amajyambere.”

Madamu Jeannette Kagame yanagaragaje ko ari umwanya wo gusangira ku mateka buri Munyarwanda yanyuzemo, hifashishijwe umukino wa Diogene Ntarindwa ‘Atome’, umenyerewe mu makinamico asetsa, wakoresheje ubwo buryo mu kugaragaza amateka y’u Rwanda kuva ku bakoloni, Repubulika, Jenoside na nyuma yayo, umukino yise ‘Carte d’Identité”.

Madamu Claudine Talon yavuze ko ari ishema kuri we kuba ari mu Rwanda, ashimira abagize Imbuto Foundation na Unity Club ku buryo yakiriwe kimwe n’itsinda bazanye, anashimira Madamu Jeannette Kagame ku butumire yahawe bwo kuza mu Rwanda.

Ati “Ndifuza kubabwira hamwe na Perezida Kagame ko mufite igihugu cyiza. Ndifuza kubashimira kubera ibikorwa mukomeza kugira mu iterambere ry’igihugu cyanyu, by’umwihariko mu kwita ku bagore n’abana. Ndanashima kandi imiyoborere yanyu binyuze muri Unity Club.’’

Madamu Talon yavuze ko uruzinduko rwe mu Rwanda aribwo rugitangira, ku munsi wa mbere akaba yanyuzwe n’ibikorwa bya Madamu Jeannette Kagame, aho umuryango Imbuto Foundation wakwigirwaho byinshi.

Ati “Nabamenye mu 2012 hamwe n’Umuryango mwatangije, ubwo nanjye nari mu bikorwa byo gutangiza umuryango. Nyuma y’ibihe bitandukanye mu gihugu cyanjye, nakomeje gutegereza kugeza ubwo amahirwe yanjye ageze. Fondation Claudine Talon nashinze yatangiye ibikorwa muri Nyakanga uyu mwaka, ikagira intego ebyiri z’ingenzi arizo kwita ku buzima bw’umubyeyi n’umwana no kugeza amazi meza mu duce bikigoranye.”

Madamu Talon yavuze ko ashima cyane ibimaze kugerwaho na Imbuto Foundation, ku buryo yifuza ko uyu muryango wagira uruhare mu iterambere ry’ibikorwa bya Fondation Claudine Talon.

Nyuma yo gusura Isange One Stop Center ifasha abahuye n’ihohoterwa, kuri uyu wa Kabiri biteganyijwe ko kuri uyu wa Gatatu asura ibikorwa bitandukanye bya Imbuto Foundation birimo urugo mbonezamikurire, n’ibindi bikorwa by’iterambere birimo umudugudu w’icyitegererezo wubatse i Kayonza mu Ntara y’u Burasirazuba.

Madamu Talon aje mu Rwanda nyuma y’uruzinduko Perezida Patrice Talon yagiriye mu Rwanda muri Kanama, aho yashimye byimazeyo imiyoborere y’u Rwanda irangajwe imbere na Perezida Kagame ndetse akagaragaza ko izatanga umusaruro kuri Afurika nzima.

Imbuto Foundation iri kwizihiza imyaka 15 ishinzwe, igira uruhare mu bikorwa bitandukanye birimo guteza imbere uburezi, ubuzima, ubukungu n’umuryango muri rusange.

Madamu Jeannette Kagame yakiriye Madamu Claudine Talon amusangiza ku mateka y'u Rwanda
Diogene Ntarindwa ‘Atome’ yakinnye umukino yise ‘Carte d’Identité”ugaragaza amateka y’u Rwanda kuva ku bakoloni, Repubulika, Jenoside na nyuma yayo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved