Kwamamaza

Madamu Jeannette Kagame na Claudine Talon basuye Isange One Stop Center ya Kacyiru

Yanditswe kuya 9-11-2016 saa 12:53' na Cyprien Niyomwungeri


Madamu Jeannette Kagame na mugenzi we wa Perezida wa Benin, Claudine Talon, basuye ibitaro bya Kacyiru basobanurirwa imikorere ya serivisi zitandukanye zirimo; Isange One Stop Center na gahunda y’ubufasha bugenerwa umuryango ‘Family Package’.

Uru rugendo rwabaye kuri uyu wa Kabiri tariki 8 Ugushyingo 2016, ni rumwe mu ziri kuri gahunda ya Madamu Claudine Talon uri mu ruzinduko rw’iminsi ine mu Rwanda. Rwari rugamije kureba no kwigira ku bikorwa Madamu Jeannette Kagame yagejeje ku bitaro bya Kacyiru no mu Rwanda hose.

Madamu Jeannette Kagame na Claudine Talon basuye ahatangirwa serivisi z’ubufasha ku bahohotewe banasobanurirwa uko zitangwa, bakomereza mu ishyirahamwe ry’abagore babana n’ubwandu bwa Sida ryashinzwe mu rwego rwo kubafasha gusobanukirwa ubwandu bwa Sida no kwiyakira ubwabo.

Nyuma yo gusura, Komiseri wa Polisi Dr. Daniel Nyamwasa uyobora Laboratwari ishinzwe gushakisha ibimenyetso bifasha ubutabera, ari nawe wasobanuriye abashyitsi, yabwiye itangazamakuru ko ibitaro bya Kacyiru bigizwe n’uruhererekane rw’ibikorwa bya Madamu Jeannette Kagame bigamije kwita ku babana n’ubwandu bwa Sida.

Muri 2003 Madamu Jeannette Kagame yatangije mu bitaro bya Kacyiru ikigo gitanga serivisi zifasha ababyeyi banduye kubyara abana batanduye, kugeza ubu abagera 2245 nibo bamaze guhabwa imiti n’iki kigo.

Muri 2009 yahatangije ibitaro bibyariramo ababyeyi bafite agakoko gatera Sida, byiyongera kuri gahunda yitwa Family Package yatangiye muri 2002 ifasha abafite agakoko ka Sida kwiyakira no kwiteza imbere.

Imwe muri Koperative yasuwe, yahawe inkunga ituma badoda imipira, ibiseke ku buryo bageze aho babyohereza muri Leta Zunze Ubumwe za Amerika. Ibi byiyongera kuri butike [Boutique] yabo ibaha miliyoni 1.2 buri kwezi bakabasha kwiteza imbere.

Umwe muri abo bagore witwa Nyiramboniyeze Monique w’imyaka 41 n’abana bane yagize ati “Namenye ko nanduye mbyara umwana wa gatatu na we yanduye, nyuma namenye Family Package ndayigana ngirwa inama mbyara umwana muzima ari we wa kane. Nafashijwe kwiga kuboha mbasha kwiteza imbere.”

Dr.Nyamwasa wayoboyeho ibitaro bya Kacyiru bikiri ibya Polisi, yemeza ko ziriya gahunda za Madamu Jeannette Kagame zabafashije cyane kugabanya ubwandu bw’abana banduzwa n’ababyeyi bavuka.

Yagize ati “Byaradufashije ku buryo nta mwana ukivuka yanduye virusi itera Sida, kuva 2009 dufite abana bane gusa bayivukanye mu bana barenga 1300 bavukiye hano.”

Madamu Claudine Talon yanyuzwe na Isange One Stop Center

Ku bitaro bya Kacyiru Madamu Jeannette Kagame na Talon basuye bihagije ikigo Isange One Stop Center cyakira abahohotewe kikabafasha mu buryo bunyuranye.

Isange One Stop Center yatangiriye mu bitaro bya Kacyiru mu 2010 ariko imaze gukwira mu gihugu hose, kuri ubu iri muri 28. Iya Kacyiru ku munsi yakira abantu 10.

Ihohoterwa rijyanye n’igitsina niryo rigaragara cyane mu ryakirwa na Isange One Stop Center ya Kacyiru, aho 72% bakirwa baba bakorewe ihohoterwa ry’igitsina naho 18% baba bakorewe ihohoterwa ryo mu ngo.

Mu bahohoterwa bijyanye n’igitsina, 18% bari munsi y’imyaka itanu mu gihe 82% bafite hagati y’imyaka itanu na 18.

Kuri Isange One Stop Center, uwahohotewe arakirwa akoherezwa ku mugenzacyaha agatanga ikirego, agasaba muganga ko asuzuma uwo muntu akamuha raporo kugira ngo haboneke ibimenyetso bifasha ubutabera.

Umugenzacyaha agira uruhare mu ifatwa ry’uwahohoteye byaba ngombwa nawe agapimwa hirindwa ko yanduza cyangwa ngo yandure Virusi itera Sida.

Umuganga arasuzuma akanavura, nyuma agatanga raporo ku mupolisi w’umugenzacyaha nawe akayohereza mu bushinjacyaha bugafasha uwahohotewe. Izo serivisi zose zitangwa ku buntu ndetse uwahohotewe agahabwa itike agataha ndetse byaba ngombwa agahabwa umufasha myumvire umuherekeza kugera mu muryango.

Dr. Nyamwasa avuga ko batangira bakiraga abantu bane ariko biyongereye bakagera ku 10 bitewe n’uko abantu bigishijwe bakikuramo ibyo bitaga kirazira byatumaga bahohoterwa bagaceceka.

Ati “Abantu batangiye kumva icyo kibazo ndetse barakivuga ni mu gihe cyera nta musirimu wavugaga ko yahohotewe n’umugabo, yafashwe ku ngufu n’uwo mu muryango. Ubwiyongera bw’abo twakira ni uko abantu batinyutse kubivuga.”

Kuva muri Nyakanga 2009, Isange One Stop Center ya Kacyiru imaze kwakira abantu 14350 harimo 10% b’abanyabyaha.

Madamu Jeannette Kagame na Madamu Claudine Talon
Madamu Jeannette Kagame hamwe na Clusine Talon ubwo basuraga ibikorwa bya Imbuto Foundation

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved