Kwamamaza

Madamu Jeannette Kagame yasabye urubyiruko kudaterwa ipfunwe no kwivuza ihungabana

Yanditswe kuya 22-10-2016 saa 20:41' na Cyprien Niyomwungeri


Madamu Jeannette Kagame yatangije ihuriro ry’urubyiruko rihuje abahungu 200 baturutse muri Kaminuza 41 zikoreramo umuryango w’abanyeshuri barokotse Jenoside yakorewe Abatutsi (AERG).

Iri huriro ryahawe insanganyamatsiko igira iti "Strong and Dignified" ugenekereje mu kinyarwanda bisobanuye “Kudadira no kwiha agaciro”.

Iri huriro kandi ryitabiriwe n’abayobozi mu nzego z’ubuyobozi zitandukanye barimo Minisitiri w’Urubyiruko n’Ikoranabuhanga, Nsengimana Philbert, Guverineri w’Intara y’Iburasirazuba Judith Kazayire, Meya w’akarere ka Rwamagana Radjab Mbonyumuvunyi, Uhagarariye AERG - umuryango w’abanyeshuri barokotse Jenoside yakorewe abatutsi muri 1994 na bakuru babo bo muri GAERG.

Iki gikorwa cyabaye kuri uyu wa Gatandatu tariki 22 Ukwakira 2016, cyanitabiriwe n’abayobozi ku nzego zitandukanye z’igihugu, kigamije gutangiza ibiganiro byo gukomeza kwiyubaka, binyuze mu kuganira ku bibazo bifitanye isano n’ingaruka za Jenoside yakorewe Abatutsi mu 1994 no kubishakira ibisubizo.

Muri iki gikorwa cyateguwe na Imbuto Foundation n’abafatanyabikorwa barimo ibitaro bya Kaminuza bya Kigali (CHUK) n’itsinda ry’abasore bake rizajya rihuzwa n’umuntu umwe (Mentor), bagakorana urugendo rugana ku ntego yo gukira ibikomere, gutera imbere mu myigire no mu yindi mibereho, kwiha icyerekezo no kukigeraho n’ibindi bikenewe mu buzima.

Mu mpanuro yahaye urubyiruko ruri mu ihuriro ry’iminsi itatu ryatangiye ejo kuwa Gatanu, Madamu Jeannette Kagame yavuze ko kuba benshi barabonye Jenoside ari bato ari ishusho mbi ihora ibagarukamo ariyo mpamvu bakeneye guhabwa ubu bufasha.

Yabasabye gutinyuka bakavuga ku ihungabana n’ihahamuka kuko aribyo bizatuma barivurwa rigakira, kandi bikaba uburyo bwiza bwo kwibuka no guha agaciro abazize Jenoside yakorewe Abatutsi.

Yagize ati “Urebye ingaruka za Jenoside n’izindi mpamvu zitandukanye mu buzima kuvuga ku ihungabana n’ihahamuka ntibikwiye gufatwa nka kirazira, ntabwo mwabyiteye nta nubwo mukwiye guheranwa nabyo. Ntimukwiye kumva ko nta musore ukwiye kwerekana ko afite ikibazo cyangwa se ko ababaye.”

Yakomeje agira ati “Kwivuza ihungabana iryo ari ryo ryose ntibikwiye kugira uwo bitera ipfunwe kuko kuribana aribyo bikomeye kurusha kuryivuza.”

Iri huriro ry’abahungu bo mu muryango AERG ribayeho nyuma y’iry’abakobwa ryamaze imyaka itatu kandi rigatanga umusaruro wanatumye abari baririmo basaba ko kubera ibyiza barikuyemo ryanagera no kuri basaza babo.

Madamu Jeannette Kagame yavuze ko agendeye ku ihuriro ry’ abakobwa riheruka, yizeye bikomeye ko iri huriro naryo rizatanga umusaruro ukomeye kandi ukemura ibibazo abahungu bafite badatinyuka kuganirira mu yandi matsinda.

Ati “Twabonye ko gutegwa amatwi n’umuntu wizeye bishobora gutuma uherekezwa, ukagera ku ntego zakugoraga kugeraho nko kongera amanota mu ishuri, kugutera inyota yo gupiganira akazi kandi ukanagatsindira, gufunguka mu mutwe ukabona amahirwe ari iruhande rwawe kandi ukanayashakisha, impinduka mu mibanire n’abandi.”

Avuga ku nsanganyamatsiko y’iri huriro, Madamu Jeannette Kagame akomeza avuga ko byerekana uguharanira kubaho nk’uko aricyo cyaranze Abanyarwanda kandi gikomeje kubahesha ishema mu ruhando rw’amahanga nubwo banyuze mu bibi byinshi.

Yakomeje asaba urubyiruko gukomeza guharanira kubungabunga igihugu baba abarinzi b’ibyagezweho, birinda inzigo kandi bagera ikirenge mu cya bakuru babo bityo bubake u Rwanda ruhamye kandi ruharanira agaciro karwo.

Umwe muri urwo rubyiruko witwa Ngombwa Christian w’imyaka 22 ubarizwa muri AERG yo muri Kaminuza yigenga ya Kigali (ULK), yabwiye itangazamakuru ko akenshi urubyiruko rwavutse mu bihe bya Jenoside rukomeje guhura n’ingaruka zayo, zirimo kuba nta miryango.

Avuga ko iyi gahunda izabafasha kubohoka barushaho gusangira ibitekerezo, bikunganira gahunda za AERG zibafasha kudaheranwa n’agahinda.

Yagize ati “Ni umwanya tubonye wo kugira ngo duhambuke tuvuge uko ibintu tubitekereza kuko usanga turaho abo wita ababyeyi bawe rimwe na rimwe ugasanga si bo, ukibaza impamvu bibaho bikakurenga, hari bamwe mu bo nzi bitera guhitamo kwiyahuza ibiyobyabwenge.”

Umuyobozi wa UNDP mu Rwanda, Stephen Rodriques, wari uhagarariye amashami y’Umuryango w’Abibumbye akorera mu Rwanda, yashimye ibikorwa Madamu Jeannette Kagame akora abinyujije mu muryango Imbuto Foundation, haba mu burezi, ubuzima n’ibindi bikorwa biteza imbere abaturage.

Yibukije urubyiruko ko nubwo u Rwanda rwanyuze mu bihe bikomeye ubu ari igihugu cyiza gifite ubuyobozi bwiza, bityo bakwiye kubyaza umusaruro ayo mahirwe kandi bagaharanira kugera ku ntego.

Ati “Mukomere kandi mwiheshe agaciro muri ahazaza h’uyu mugabane.”

Urubyiruko rwigishijwe ubutwari no kurenga amateka

Mu kiganiro kirambuye ku nsanganyamatsiko y’umunsi cyari kiyobowe na Soeur Immaculee Uwamariya, Denyse Umunyana na Lt.Col Janvier Mujalibu, babifashijwemo na Sibylle Ugirase bibukije urubyiruko ko rwabonye inabi n’ibyago bikabije ariko rudakwiye gukomeza kwiyumva nk’abanyabyago.

Soeur Uwamariya yasabye urubyiruko kwitoza kubana n’ingaruka za Jenoside bakarenga amateka baharanira gukora cyane ntibakunde inzira zoroshye.

Yagize ati “Tugomba kwitoza kubana n’ingaruka za Jenoside nubwo yadutwaye ababyeyi, inshuti, abavandimwe ntibiduherane kuko kubaho birayiruta, nta cyasumba ubuzima kuko busumba urupfu kandi tukabikora tudasuzuguye ibyatubayeho.”

Ku munsi w’ejo urubyiruko rwitabiriye iri huriro ruzakomeza ruganirizwa uko rukwiye kwitwara mu gihe ruhuye n’ibibazo biterwa n’ihungabana rituruka kuri Jenoside yakorewe abatutsi muri 1994.

Kuva mu mwaka wa 2007, umuryango ‘Imbuto Foundation’ utegura amahuriro anyuranye y’urubyiruko harimo ay’umwihariko agenewe urubyiruko rwarokotse Jenoside yakorewe Abatutsi agamije kubaganiriza, kubavura ibikomere, kubigisha no kubategura nk’abagore n’abagabo b’ejo hazaza.

Madamu Jeannette Kagame n'abandi bayobozi mu nzego za leta na bamwe mu bitabiriye itangizwa ry'ihuriro ry'urubyiruko rwo muri AERG mu Karere ka Rwamagana
Madamu Jeannette Kagame ageza impanuro ku bitabiriye iki gikorwa
Minisitiri w'Urubyiruko n'Ikoranabuhanga Jean Philbert Nsengimana, Madamu Jeannette Kagame na Meya wa Rwamagana Mbonyumuvunyi, hatangizwa ihuriro ry’urubyiruko i Rwamagana
Umuyobozi wa UNDP mu Rwanda, Stephen Rodriques, wari uhagarariye amashami y’Umuryango w’Abibumbye akorera mu Rwanda
Lt. Col Janvier Mujaribu(ibumoso), Denise Umunyana, Sr. Immaculée Uwamariya, Sibylle Ugirase mu kiganiro

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved