Kwamamaza

Madamu Jeannette Kagame yibukije abayobozi kurwanya uwabinjizamo amacakubiri

Yanditswe kuya 4-11-2016 saa 16:06' na Cyprien Niyomwungeri


Mu gutangiza umunsi wa Kabiri w’ihuriro rya cyenda ry’abayobozi bahuriye mu muryango Unity Club Intwararumuri, Madamu Jeannette Kagame yasabye abagize uwo muryango, kurwanya uwo ariwe wese washaka kubiba ikinyoma cyatuma Abanyarwanda bongera gucikamo ibice.

Umuryango Unity Club Intwararumuri washinzwe mu 1996, kugira ngo utange umusanzu mu kwimakaza ubumwe n’amahoro byo nkingi y’iterambere rirambye.Ugizwe n’abayobozi bari muri Guverinoma, abayihozemo n’abo bashakanye.

Muri uyu muhango, Madamu Jeannette Kagame ari nawe uwubereye umuyobozi mukuru, yahembye "Abarinzi b’Igihango" 17 batoranyijwe ku rwego rw’igihugu, barimo Karamaga Thadee wahishe umurambo w’uwahoze ari Minisitiri w’Intebe, Agathe Uwiringiyimana.

Mu mpanuro ze, Madamu Jeannette Kagame yagarutse ku mikorere mibi y’ubuyobozi bwabanje bwasenye ubumwe bw’Abanyarwanda, yibutsa ko igikwiye gushyirwa imbere ari uko Abanyarwanda bose ari bene Gihanga, banganya ubutoni n’ubwisanzure ku Rwanda kandi bahuje inshingano n’uburenganzira kuri iyo ngobyi ibahetse.

Yasabye abayobozi kwishimira ibimaze kugerwaho no kongera gutekereza ku mateka no kwisuzuma bigamije guharanira uko ubuzima bw’igihugu bwakomeza kumera neza, baharanira kwirinda uwasubiza Abanyarwanda mu mateka mabi yo gusenya ubumwe.

Yagize ati “Twishimire ko twabigezeho ku gipimo gishimishije, nk’uko ubushakashatsi bwakozwe bubigaragaza, maze duharanire gutuma ntawe uzongera kutumeneramo ngo abe yatwinjizamo ikinyoma cy’uko twamera neza kurushaho twemeye kongera kwicamo ibice.”

Iri huriro ryanahuriranye no kwizihiza imyaka 20 umuryango Unity Club Intwararumuri umaze ubayeho ufasha Abanyarwanda kongera kubana neza nyuma ya Jenoside yakorewe Abatutsi. Madamu Jeannette Kagame yabwiye abayobozi ko bamurikiwe na politiki nziza hakagerwaho byinshi mu bumwe n’ubwiyunge, ariko urugendo rukiri rurerure.

Yagize ati “Ukuri, ni imwe mu nkingi twubakiyeho ubumwe bwacu, ukuri kwacu nk’Abanyarwanda. Uko kuri kudutegeke kwemera no kuzirikana ko tugifite urugendo rurerure mu kubaka Ubumwe burambye mu Banyarwanda. Kubizirikana biturinda kwirara kandi uburebure n’urusobe rw’imizi y’ikibi bikigaragarira mu ngaruka z’ayo mateka.”

“Guhora dutera intambwe igana aheza twarabyiyemeje, ariko no kuzirikana aho duturuka ni inshingano kuko ni kure kandi twashoboraga no guherayo.”

Madamu Jeannette Kagame ageza ku bari bitabiriye ijambo rifungura inama rusange ya cyenda ya Unity Club

Madamu Jeannette Kagame yabwiye abayobozi ko ari inshingano yabo guharanira kuzasiga umurage w’igihugu cyiza abana bacyo batazongera gukwirakwira imishwaro bahunga ababica kandi bava inda imwe.

Ati “Bavandimwe, kuzaraga abana bacu igihugu kivugira kandi cyaciye ukubiri no kuba igikoresho cy’abahemu. Kubaraga igihugu bisanzuyemo, bakorera bagikunze, kibahesha ishema n’isheja, bakakirinda abanyarugomo, kikabaheka cyizihiwe.”

Bimwe mu bizatuma uyu murage mwiza ugerwaho ni ukuri, ubworoherane, gusenyera umugozi umwe , ukwihitiramo no kwigenera kw’abanyagihugu bibohoye n’ubumwe.

Ibyo Unity Club imaze kugeraho byishimirwa n’abanyamuryango bayo birimo kuba yarabanje guhuza abayobozi bari baturutse imihanda yose, bafite ibikomere bitandukanye ariko bafite inshingano yo kubaka igihugu, kandi bikagerwaho bikaba bigejeje aheza u Rwanda.

Hari kandi guharanira imibanire y’Abanyarwanda, irimo kwegerana, kutarondana, gahunda ya Ndi Umunyarwanda no kuzirikana abatarigeze na rimwe bibagirwa ko bambitswe Ikirezi maze bagahekera u Rwanda mu bihe byose ‘bakarinda icyo gihango’.

Umwe mu banyamuryango ba Unity Club, Prof.Jolly Mazimpaka, watangiranye na Unity Club Intwararumuri, yagarutse ku buryo uyu muryango wavutse hagamijwe guhuriza hamwe ubuyobozi bari baturutse mu bice bitandukanye, ngo bongere bunge ubumwe bubake u Rwanda.

Yagize ati “Twahuye duturutse imihanda yose, harimo abiciwe imiryango, abari mu bwoko bwakoze Jenoside n’abari batashye mu gihugu bavuye ahantu hatandukanye. Nishimira uburyo twabashije guhuzwa, duhuza ibitekerezo, twese twubaka ubumwe nk’inkingi y’iterambere ry’igihugu kandi tugeze aheza.”

Umuryango Unity Club ufite ibikorwa bigamije kuba umusemburo w’ibisubizo cyane cyane ibishingiye ku bibazo byatewe n’ingaruka zo kubura ubumwe. Hari umudugudu wa Impinganzima uri i Huye, Kayonza na Rulindo. Hari kandi umudugudu uri Nyamagabe, n’ uwa Rubavu watujwemo abana b’imfubyi muri gahunda ya Tubarerere mu muryango.

Madamu Jeannette Kagame mu muhango wo guhemba ababaye intwari bakarokora ubuzima bw’abari mu mage mu gihe cya Jenoside yakorewe Abatutsi muri Mata 1994
Abatanze ibiganiro: Uhereye ibumoso: Claudine Delucco Uwanyirigira, Prof. Jolly Mazimpaka, Dr. Monique Nsanzabaganwa, Minisitiri Séraphine Mukantabana na Depite Oda Gasinzigwa; baganira ku ruhare rwa Unity Club mu kubanisha abanyarwanda
Abitabiriye inama rusange ya cyenda ya Unity Club yahuriranye n’isabukuru yayo y’imyaka 20 mu muhango wabereye muri Kigali Convention Centre

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved