Kwamamaza

Mahama:Impunzi z’Abarundi ntizikozwa ibyo guhabwa amafaranga ngo zigurire ibiribwa

Yanditswe kuya 27-10-2016 saa 11:34' na Mukaneza M.Ange


Mu gihe Minisiteri ishinzwe imicungire y’Ibiza no kwita ku mpunzi (MIDIMAR) ikomeje gahunda yo guha impunzi ziri mu Rwanda amafaranga aho guhabwa ibyo kurya, Abarundi bari mu nkambi ya Mahama bo ntibabikozwa kuko bahamya ko byateza amakimbirane mu miryango yabo.

Gahunda yo guha amafaranga impunzi zikihitiramo ibyo zihaha yamaze gutangizwa mu zindi nkambi zirimo nk’iya Nyabiheke ibarizwamo abanye-Congo aho bahabwa 6300 by’amanyarwanda ku kwezi, kuri buri muntu.

Bamwe mu Barundi bari mu nkambi ya Mahama baganiriye na IGIHE ariko bagaragaje impungenge z’ibibazo bikomeye byavuka, birimo n’amakimbirane mu ngo igihe iyi gahunda yaba itangijwe.

Mbazumutima André yavuze ko kubaha amafaranga batabyifuza kuko hari bamwe bahindukira bakajya kwigurira inzoga cyangwa bakayapfusha ubusa mu bindi.

Ati” Amafaranga arakenewe ni byo, nkanjye ndayashaka ariko benshi ntibabyifuza kuko hari uwo bayaha akayakoresha nabi, aho kujya kugura ibiryo, akajya kwinywera inzoga.”

Bigirimana Noella na we yamaganiye kure ibyo guhabwa amafaranga avuga ko hari abasanzwe bagirana amakimbirane bapfa ko umwe mu bagize umuryango yagiye kugurisha ibigori n’ibishyimbo bahawe kugira ngo ajye mu kabari.

Yanagaragaje kandi ko byatuma abashoramari bazana ibiribwa babahenda kuko baba bazi neza ko babikeneye nta yandi mahitamo bafite.

Minisitiri ufite mu nshingano imicungire y’ibiza no kwita ku mpunzi, Mukantabana Seraphine we avuga ko gutanga amafaranga ku mpunzi bigamije gutuma ibibazo byo guhindurirwa indyo bakunze kugaragaza bikemuka.

Ati” Turashaka kugira ngo impunzi nk’abantu nkawe nanjye na bo bashobore kwigenera uko ubuzima bwabo bwagenda. Ni muri urwo rwego mubona ko mu nkambi zimwe twatangiye kubaha amafaranga kugira ngo bashobore kwigenera ifunguro ryabo, biriya bibazo bafite byo kuvuga ngo muduhindurire indyo na byo bizakemuka kuko bazashobora kwigurira icyo bashaka.”

Uretse kubaha amafaranga yo kugura ibiribwa kandi, Mukantabana yavuze ko bari no kureba uburyo babaha n’andi yabafasha gukora imirimo ibabyarira inyungu bakabasha kwibonera n’ibindi bakeneye.

Yongeyeho ko abagore bari mu nkambi ya Mahama bakora ibijyanye n’ubugeni bazafashwa kubona abantu babahugura kugira babashe kunoza ibihangano byabo ndetse bashakirwe amasoko binyuze muri gahunda ya “Made in Rwanda”.

Mu Rwanda habarizwa impunzi z’Abarundi ibihumbi 85, zatangiye kwinjira mu gihugu ku bwinshi muri Mata 2015, nyuma y’imvururu zadutse ubwo Perezida Petero Nkurunziza yatangazaga ko aziyamamariza kongera kuyobora u Burundi, ndetse aza gutorwa.

Bamwe mu Barundi baba mu nkambi ya Mahama

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved