Maj Karemera wahoze muri FDLR asanga abakiri mu mashyamba bagikora ibyaha bikomeye

Yanditswe na Philbert Girinema
Kuya 11 Ugushyingo 2016 saa 05:00
Yasuwe : XX
0

Maj Karemera Innocent wahoze mu mutwe urwanya Leta y’u Rwanda, FDLR, asanga abagikomeje kuwutsimbararaho barimo gukora ibyaha bikomeye bazabazwa niba badatashye ku neza.

Abahoze muri uwo mutwe 54 basoje ingando ibategurira gusubira mu buzima busanzwe, yari imaze amezi atatu ibera i Mutobo, ku nshuro ya 58.

Icyo bahurizagaho ngo ni uko bataye igihe baguma muri ayo mashyamba bakima abana babo amahirwe atandukanye arimo no kwiga nkuko babitangarije RBA.

Maj Karemera Innocent bakundaga kwita Kamere Innocentus yasabye abayobozi b’Umutwe wa FDLR kureka abashaka gutaha mu Rwanda bakabikora. Ati “Abo bayobozi ndagira ngo rwose bashyire umutima impembero, boye gukomeza gushuka abana b’Abanyarwanda. Bagombye kureka abana b’Abanyarwanda bakitahira.”

Yakomeje avuga ko abo bayobozi niba bumva umutimanama wabo ubacira urubanza ku makosa baba barakoze ko bitagomba kugira ingaruka kuri abo bana kuko ari abamalayika bakomeje kugirwa ingwate.

Yavuze ko kandi ibyaha barimo gukora bazabibazwa mu gihe cyose batagize umutima wo gutaha ku bushake.

Ati “Ibyaha bari gukora bumve ko ari ibyibasiye inyokomuntu n’ibyaha by’intambara byo gufata umuntu ukamugira ingwate ku nyungu zawe.”

Caporali Nikuze Chantal asanga igihe bamaze muri ayo mashyamba barahombye byinshi ku buryo agize amahiwe yo gusubirayo yakwereka abo yasizeyo ukuri.

Ati “Njyewe ni uko bitanashoboka ahari numva no kuba bananjyana nkahajya nkababwira nti baratubeshye. Abo bahejejeyo ni benshi, badusubije inyuma abana ntibize birirwa babinjiza mu mashyamba. Nabashishikariza gutaha kuko mu Rwanda ari amahoro.”

Umuyobozi wa Komisiyo ishinzwe gusubiza mu buzima busanzwe abahoze ari Ingabo,Sayinzoga Jean, yavuze ko bazakomeza gukora ibishoboka ngo abakiri muri ayo mashyamba bayavemo batahe mu Rwanda. Kuri ubu ngo bakaba babibashishikariza bifashishije uburyo bw’ikoranabuhanga bwo kuvugana barebana (skype).

Guverineri w’Intara y’Amajyaruguru, Musabyimana Jean Claude, yabasabye kwirinda gutakaza umwanya nk’uwo batakaje ahubwo bagaharanira kwibumbira mu makoperative bakiteza imbere.

Abatashye barimo aba Majoro batatu, Kapiteni umwe, Lieutenant umwe n’aba sous-lieutenant batatu ndetse n’abagore batanu.

Abari muri uwo mutwe ngo babayeho mu buzima bwo gusahura ibya rubanda, mu ntambara no mu bindi bikorwa by’ihohotera bakora byiyongeraho kuvutsa abana babo amahirwe no kubacengezamo ingengabitekerezo ya Jenoside.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza