Kwamamaza

Miliyari 16 zigiye gushorwa mu bikorwa birimo kugurira ibikoresho ibitaro

Yanditswe kuya 13-10-2016 saa 18:26' na Jean Louis Uwishyaka


U Rwanda n’u Bubiligi byashyize umukono ku masezerano y’inkunga ya Miliyoni 18 z’Amayero (miliyari 16 z’amanyarwanda) zizifashishwa mu bikorwa binyuranye by’ubuzima hirya no hino mu Rwanda.

Ayo masezerano yashyizweho umukono na Ambasaderi Claver Gatete, Minisitiri w’Imari n’Igenamigambi na Ambasaderi w’u Bubiligi mu Rwanda, Arnout Pauwels, kuri uyu wa 13 Ukwakira 2016, agamije gufasha inzego z’ubuzima mu Rwanda cyane hitawe ku buzima bw’umwana n’umubyeyi.

Iyi nkunga izongerwa mu ngengo y’imari igenerwa Minisiteri y’Ubuzima mu gihe cy’imyaka ibiri, aho biteganyijwe ko mu ngengo y’imari y’umwaka wa 2016/2017, u Bubiligi buzongeramo miliyoni 12 z’amayero naho iy’umwaka wa 2017/2018, buzongeremo miliyoni esheshatu z’amayero.

Umunyamabanga wa Leta muri Minisiteri y’Ubuzima, Dr Ndimubanzi Patrick, yavuze ko iyi nkunga izafasha u Rwanda muri gahunda zayo z’ubuzima zirimo kubungabunga ubuzima bw’umwana n’umubyeyi no kugura ibikoresho byo mu mavuriro.

Ati "Iyi nkunga tubonye izajya mu ngengo y’imari (budget) yacu, izadufasha rero mu bikorwa by’ubuvuzi byose dukora ariko cyane mu buzima bw’umwana n’umubyeyi. Nkuko mubizi gahunda zacu z’ubuzima niho ziba zishingiye. Iyi nkunga izanadufasha kugura ibikoresho byo kwa muganga rimwe na rimwe no kubifata neza tukabibungabunga."

Minisitiri w’Imari n’Igenamigambi, Ambasaderi Claver Gatete washyize umukono kuri aya masezerano ku ruhande rw’u Rwanda, yavuze ko igihugu cyishimiye iyi nkunga u Bubiligi butanze, avuga ko n’ubundi iki gihugu gisanzwe ari umufatanyabikorwa mwiza mu mishinga y’u Rwanda.

Yavuze kandi ko mu cyerecyezo u Rwanda rwihaye harimo kwita ku baturage barwo, cyane bazamura urwego rw’ubuvuzi harimo gufata neza ibitaro n’ibindi.

Ambasaderi w’u Bubiligi mu Rwanda, Arnout Pauwels, yavuze ko iruhande rw’iyi nkunga batanze, bazagenera u Rwanda inkunga y’ibitekerezo y’uburyo rushobora kugera ku ntego rwiyemeje cyane mu rwego rw’ubuzima.

Yavuze kandi ko ahandi bazagira uruhare ari uguteza imbere ihame ry’uburinganire n’ubwuzuzanye u Rwanda rwashyize imbere, barushaho gutuma abanyarwanda bagerwaho mu buryo bworoshye na gahunda yo kuboneza urubyaro.

Iyi nkunga ije yiyongera ku bindi bikorwa by’ubuzima iki gihugu cyatanzemo miliyoni 52 z’amayero, uyashyize mu manyarwanda, asaga miliyari 46.

U Bubiligi busanzwe bufasha u Rwanda mu rwego rw’ubuzima kuva mu 2008, aho 25% by’inkunga yose iki gihugu kigenera u Rwanda inyuzwa mu ngengo y’imari.

Uretse ibikorwa by’ubuvuzi, u Bubiligi bufasha u Rwanda muri gahunda zinyuranye nk’izijyanye n’ingufu, kwegereza ubuyobozi abaturage ndetse bunafasha mu gushyira mu bikorwa gahunda ya Leta y’imbaturabukungu (EDPRS).

U Bubiligi busanzwe bufasha u Rwanda mu bikorwa bitandukanye by'iterambere

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 23 Ugushyingo 2016
Copyright © 2009 -2014 - IGIHE Ltd - All Rights Reserved