Minagri yasabwe kugaragaza ingamba ifitiye RAB ihora yirukana abayobozi

Yanditswe na Evariste Nsengimana
Kuya 19 Gashyantare 2018 saa 03:56
Yasuwe :
1 0

Minisiteri y’Ubuhinzi n’Ubworozi (Minagri) yasabwe kugaragaza ingamba zihamye ifite zo gukemura ibibazo biri mu rwego rw’ubuhinzi n’ubworozi, by’umwihariko ibiri mu kigo kiyishamikiyeho, RAB, gihora kivugwamo kwirukana no guhindaguranya abayobozi bya hato na hato.

Hashize igihe humvikana amakuru yo kwirukana bya hato na hato abayobozi n’abakozi ba RAB. Mu birukanywe harimo Dr. Cyubahiro Bagabe Marc wirukanywe n’Inama y’Abaminisitiri yo ku wa gatanu tariki ya 19 Mutarama 2018.

Mu Ugushyingo umwaka ushize, Minisitiri w’Intebe, Dr Edourad Ngirente, yahagaritse by’agateganyo Dr. Gahakwa Daphrose wari Umuyobozi wungirije hamwe n’abandi bakozi batatu ba RAB.

Hari n’abandi baherukaga guhagarikwa barimo Ushinzwe imicungire y’ubutaka no kuhira, Innocent Nzeyimana, Ushinzwe ishami ryo guhuza inzego Violette Nyirasangwa n’ushinzwe Imari, Bimenya Théogène, aho Minagri yavugaga ko basimbujwe by’agategenyo.

Kuri uyu wa 19 Gashyantare 2018, ubwo Umutwe w’abadepite wakiraga ibisobanuro mu magambo bya Minisitiri w’Ubuhinzi n’Ubworozi n’uw’Inganda kuri Raporo zakozwe na Komisiyo zitandukanye; Abadepite bagaragaje ko muri Minagri harimo ibibazo bikomeye, basaba ko igaragaza ingamba zihamye zo kubikemura.

Bimwe muri ibyo bibazo, harimo iby’imashini zuhiri u Rwanda rwaguze ariko basanze umusaruro zitanga utangana n’ibyazitanzweho, ibibazo by’amakusanyirizo y’umusaruro w’ibikomoka ku buhinzi, gutunganya umusaruro wabwo n’ibindi.

Depite Kankera Marie Josée yavuze ko guhinduranya abakozi bya hato na hato bikunze kugaragara muri RAB, bishobora kuba mu ntandaro z’ibibazo bidindiza urwego rw’ubuhinzi.

Yagize ati “Guhindura Umuyobozi utuzuza inshingano ni ibintu bisanzwe rwose ndetse tunashimira ubuyobozi bw’igihugu cyacu, gukurikirana abayobozi badashyira mu bikorwa inshingano baba bahawe bagahindurwa ariko ndashaka kugaruka ku guhinduka kw’abayobozi hato na hato muri RAB. Ntekereza ko bishobora kuba bigira n’ingaruka ku musaruro tubona ndetse n’ibi bibazo byinshi tubona mu buhinzi.”

Depite Kankera yasobanuye ko buri muyobozi ugeze mu kigo afata umwanya wo kwiga ibibazo birimo, akanashaka n’ingamba yashyira mu bikorwa kugira ngo atange umusanzu mu kubikemura.

Depite Kankera yongeye ati “Muri RAB, abadogiteri benshi bashyirwa mu kuyobora kiriya kigo ntibamara igihe kinini, ese aho ntibyaba bifite ingaruka ku bibazo tubona mu buhinzi n’ubworozi kiriya kigo gishinzwe? Nagira ngo mbaze niba hari ingamba runaka zadufasha gushyira umutuzo mu buyobozi bwa kiriya kigo kuko ntekereza ko ubuyobozi iyo bukoze neza n’ibintu byose bigenda neza. Nkagira ngo mbaze niba hari uburyo muri kiriya kigo haba umutuzo.”

Minisitiri w’Ubuhinzi n’Ubworozi, Mukeshimana Geraldine, yagerageje kugaragaza ingamba zihari mu gukemura ibibazo byagaragajwe mu buhinzi n’ubworozi, gusa Inteko Ishinga Amateko yasubitse imirimo yayo nta ngamba agaragaza ku kibazo cy’abayobozi ba RAB bahora birukanwa.

Mu mwaka ushize ubwo ubuyobozi bwa RAB bwitabaga Komisiyo y’Inteko Ishinga Amategeko ikurikirana ikoreshwa ry’umutungo wa Leta (PAC) ngo bwisobanure ku mikoreshereze mibi y’umutungo yagaragajwe n’Umugenzuzi w’Imari ya Leta, abadepite bagaragaje kutanyurwa ahanini bishingiye ku kuba Dr. Gahakwa atari yitabye Komisiyo.

Icyo gihe uwari Umuyobozi Mukuru wa RAB, Dr Bagabe yavuze ko kutitaba kwa Gahakwa ari ugusuzugura ubuyobozi bwa RAB n’izindi nzego kuko yari yabimenyeshejwe.

Nyuma Dr Gahakwa yaje gutangaza ko impamvu atitabye PAC yari arwaye kandi ngo yari yabimenyesheje Umunyamabanga we.

Mu bibazo PAC yasabiraga ibisobanuro harimo nko kuba bimwe mu bikorwa RAB ishinzwe gutunganya itabikora uko bikwiye birimo kuba ifumbire itagera ku bahinzi ku gihe, kuba nta bushakashatsi bukorwa, kuba nta raporo ku mikorere ihabwa inzego zisumbuye n’ibindi.

Mu kiganiro n’abanyamakuru cyabaye ku wa 24 Mutarama 2018, Dr Mukeshimana Geraldine yabwiye abanyamakuru ko ‘abayobozi barahinduka ntabwo ari RAB yonyine ihindura abayobozi’.

Minisitiri w’Ubuhinzi n’Ubworozi, Mukeshimana Geraldine, ubwo yari yitabye Inteko Ishinga Amategeko umutwe w'Abadepite kuri uyu wa Mbere
Abadepite babajije Minisitiri w'Ubuhinzi amaherezo yo kuba RAB ihora ihinduranya ubuyobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza