Mineduc yahagaritse amwe mu mashami muri kaminuza 10, yiyemeza kugoboka abashaka kwiga ahandi

Yanditswe na Rabbi Malo Umucunguzi
Kuya 20 Werurwe 2017 saa 04:09
Yasuwe :
0 0

Minisiteri y’Uburezi yahagaritse amashami atandukanye yigishwaga muri kaminuza n’amashuri makuru 10 akorera mu Rwanda, nyuma y’igenzura ryakozwe bagasanga batujijwe ibisabwa.

Umuyobozi w’Inama Nkuru y’amashuri makuru na Kaminuza, Dr Sebasaza, yavuze ko ibi byakozwe hagamijwe gukebura amashuri ari kujya munsi y’umurongo yiyemeje.

Yagize ati “Hari amashuri yabonye inzandiko za mbere, amashuri 10, buri shuri ryagiye rihabwa amezi atandatu. Ariko byumvikane ko nta shuri ryafunzwe na rimwe. Ibyo guhagarika isomo, ikigo cyangwa porogaramu ni ibintu minisiteri y’uburezi ihabwa n’amategeko.”

Dr Sebasaza yavuze ko nta kigo mu Rwanda cyemererwa kidafite ibihagije ngo kibe cyatangira, ahubwo ikibaho nyuma yo gutangira ni ukugenzura ko ibyo bemeye babyubahiriza.

Yakomeje agira ati “Hari nk’ahaba hari abarimu runaka, amasezerano yarangira ntibayongere, bakabasimbuza abafite urwego ruciriritse. Cyangwa se ugasanga ibikoresho nk’ibiri muri za laboratwari ntibingana n’uko abanyeshuri bagenda biyongera. Ikindi ni uburyo amashuri ayoborwa hagati y’abayobozi na ba nyirayo.”

Minisitiri w’uburezi, Dr Musafiri Papias Malimba, yavuze ko mu nshingano zo kwemerera amashuri no kuyakorera ubugenzuzi ari urugendo ruhoraho.

Yakomeje agira ati “Intambwe ya mbere ni uko ishuri risaba gukora ariko ryerekana na porogaramu n’uburyo bwo bazuza ibitaranoga. Igikurikira ni ukugenzura ko ibyo twagiye twumvikana bigenda byubahirizwa. »

« Iyo intambwe ya mbere rero idatanze umusaruro mu buryo bw’ibiganiro, intambwe ya kabiri ni ukuvuga ngo ba uhagaze ubanze wuzuze ibingibi, kugira ngo tukwemerere gukomeza gukora. »

Minisitiri Dr Musafiri yavuze ko nyuma y’amezi atandatu ahabwa ishuri ngo ryikosore iyo atubahirijwe, uruhushya rwo gukora ruseswa burundu, ujya gusaba agatangira bundi bushya.

Abanyeshuri bigaga mu mashami yahagaritswe bazafashwa

Minisitiri Musafiri yavuze ko guhagarika aya mashami biri gukorwa mu buryo bwo kurengera ireme ry’uburezi, akaba ari ryo riri guhabwa umwanya uhagije mu burezi bw’u Rwanda.

Yakomeje agira ati «Abashobora kuhababarira ni abanyeshuri, ariko byakozwe mu nyungu z’abanyeshuri. Byaruta ko wategereza gatoya aho kugira kujya mu ishuri ugakuramo impamyabumenyi idafite icyo izakumarira. Ikindi ni uko abazabasha guherekeza amashuri, nibayasubiramo yongeye gufungura bazabona impinduka igaragara. »

« Ariko kandi abanyeshuri bazavuga bati ‘iri ntabwo ari kamara, twabizeza ko minisiteri y’uburezi izababa hafi ikabafasha kugira ngo babone ahandi bakomereza amasomo yabo, tukabafasha nka leta. »

Umuyobozi w’inama y’amashuri makuru na za kaminuza yavuze ko ku ikubitiro ibigo byasabwe kugaragaza ubushobozi bifite ubwabyo, nyuma Minisiteri ijya gusuzuma niba ibyo bavuze bihuye n’ukuri.

Amashuri makuru yahagarikiwe ibikorwa mu buryo bw’agateganyo ni :

- Rusizi International University ikorera i Rusizi

- Singhad Tehcnical Education Society(STES) ikorera Kicukiro

- Mahatma Ghandi University-Rwanda ikorera Gasabo

- Nile Source polythechnic of applied arts ikorera mu karere ka Huye

Amashuri yahagarikiwe by’agateganyo zimwe muri porogaramu z’amasomo yatangaga

- University of Technology and Arts of Byumba (UTAB) ikorera i Gicumbi

- Open University of Tanzania ikorera mu Karere ka Ngoma

- University of Gitwe ikorera mu Ruhango

- Jomo Ketta University of Agriculture and Technology ikorera muri Kicukiro

- Institut Catholique de Kabgayi (ICK) ikorera i Muhanga

- Institut d’Enseignement Superieur de Ruhengeri (INES-Ruhengeri) ikorera i Musanze

Umuyobozi w’Inama Nkuru y’amashuri makuru na Kaminuza, Dr Sebasaza
Minisitiri w’uburezi, Dr Musafiri Papias Malimba yavuze ko aho kugira abaganga benshi badafite ubushobozi haba bake babufite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244