Mineduc yakuyeho ibyo gufatira ku inota ritandukanye hagati y’abahungu n’abakobwa

Yanditswe na
Kuya 9 Mutarama 2017 saa 03:26
Yasuwe :
0 0

Minisiteri y’Uburezi yatangaje ko muri uyu mwaka hatakoreshejwe uburyo bwo gufatira ku inota ritandukanye hagati y’abahungu n’abakobwa mu gihe bahabwa imyanya mu mashuri ya leta, ibintu byakunze kutumvikana kimwe mu myaka ishize.

Kuri uyu wa Mbere tariki 9 Mutarama 2017 nibwo Minisiteri y’Uburezi yatangaje amanota yavuye mu bizamini bisoza amashuri abanza n’icyiciro rusange mu 2016, aho mu mashuri abanza batsinze kuri 85.4% mu mashuri yisumbuye batsinda kuri 89%.

Umunyamabanga wa Leta ushinzwe amashuri abanza n’ayisumbuye, Isaac Munyakazi, yavuze ko imibare ihari yerekana ko abakobwa bagenda bazamura imitsindire, cyane ko uyu mwaka ijanisha ryabo ryakozwe hatabayeho kubaha amahirwe yihariye.

Ati “Kuba abakobwa baratsinze cyane ni ibintu numva njye twakwishimira cyane kuko mu myaka yashize bafatirwaga ku inota rito kugira ngo habemo guherekeza umwana w’umukobwa, ariko ubu siko bimeze.”

Yavuze ko muri uyu mwaka hatabayeho gutoranya abana b’abahungu n’abakobwa ngo hagire abafatirwa ku inota runaka ryihariye mu kubaha imyanya mu bigo bitandukanye.

Yakomeje agira ati “Amanota yafatiweho ni amwe yaba ku muhungu cyangwa ku mukobwa. Abana b’abakobwa rero kuba baratsinze neza twe ni ikintu twishimira kigaragaza ko politiki y’igihugu yo guha umwana w’umukobwa ubushobozi itangira kugaragarira no mu manota nk’aya, aho usanga n’umwana w’umukobwa akora neza kurenza umuhungu.”

Umuyobozi Mukuru Wungirije ushinzwe ibizami mu mu Kigo cy’Igihugu cy’Uburezi, REB, Emmanuel Muvunyi, yavuze ko ubusanzwe mu gutanga ibigo ku banyeshuri batsinze byajyaga bikorwa mu byiciro bibiri, hagatangirirwa ku bazajya mu bigo bigamo bacumbikiwe cyangwa bataha, hakaba n’icyiciro cy’ibigo bicumbikira abakobwa byatumaga himurwa inota bafatiyeho.

Ati “Uyu mwaka uko bigiye gukorwa ni uko nta byiciro bibiri bizakorwa, abana bose ari abaziga mu bigo bibacumbikira, ari abaziga bataha byose bizakorerwa hamwe. Iryo nota rero numva ritazanabaho kuko abana bose bazashyirwa mu myanya.”

Habonetse amakosa mu ikorwa ry’ikizamini cya leta

Munyakazi yavuze ko hari aho basangaga abanyeshuri bagiye kwinjira mu kizamini bafite ibyo gukopereraho ahandi mu gihe cyo gukosora bagasanga abantu bari begeranye basubije ibisa, bakaba barahanwe ku buryo mu gihe bamwe babona amanota yabo, uwagaragayeho ibibazo we ntayo azabona.

Ati “Amakosa yarabonetse ariko ntabwo biteye impungenge, nk’abana bagiye bandika amazina, nimero inyuma y’ikayi kandi kizira. Iyo kayi ntabwo ikosorwa kuko niba amabwiriza avuga ko nta hantu hagomba kuba hagaragara izina cyangwa nimero z’umwana, we akabyandikaho, twe tubifata nk’uburyo bwo gutega uzamukosora.”

Abashaka kureba amanota baraza kuyabona mu buryo burimo ubutumwa bugufi kuri telefoni aho wandika P6 cyangwa S3, ugasiga umwanya, nimero umunyeshuri yakoreyeho ikizamini, ukohereza kuri kuri 489. Hari no kunyura ku rubuga rwa REB, ukajya ahandite ‘View exams results’, ugashyiramo icyiciro wigagamo na nimero wakoreyeho.

Abanyeshuri 10 ba mbere mu mashuri abanza barimo abahungu batanu n’abakobwa batanu.

Batanu baza imbere ni Rubayiza Ngutete Christa wo mu Gatenga muri Kicukiro, Manzi Aimé Praise w’i Runda mu karere ka Kamonyi, Rugwiza Jean Luc wo mu Gatenga muri Kicukiro, Habakubana Souvenir w’I Shyogwe mu karere ka Muhanga na Bwiza Cyndy Nina w’i Ndera mu karere ka Gasabo.

Mu cyiciro rusange ho mu 10 ba mbere nta mukobwa n’umwe urimo, batanu ba mbere akaba ari Mico Sother wo ku Kimisagara mu karere ka Nyarugenge, Mugishawayo Aimé Cesaire wo mu Nyakabanda muri Nyarugenge, Mucyo Aimé Christian w’i Kinyinya mu karere ka Gasabo, Ishimwe Pacifique w’i Murama muri Kayonza na Igiraneza Shyaka Arnaud wa Kimironko mu karere ka Gasabo.

Mu mwaka ushize abanyeshuri 8251 ntibakoze ikizamini, kuko mu mashuri abanza hiyandikishije 194 052 hakora 187 139, mu gihe mu cyiciro rusange hiyandikishije 90 759 hagakora 89 421. Mu bakandida bakoze, hombi abakobwa bari hejuru ya 53%.

Umunyamabanga wa Leta ushinzwe amashuri abanza n'ayisumbuye, Isaac Munyakazi
Umuyobozi w'Ikigo cy'Igihugu gishinzwe guteza imbere uburezi, Gasana Janvier
Gasana Janvier na Munyakazi mu itangazwa ry'amanota y'abarangije amashuri abanza n'icyiciro cya mbere cy'ayisumbuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza