Kwamamaza

Mineduc yasabye abayobozi b’ibigo kuvanaho igihano cyo kwirukana abanyeshuri

Yanditswe kuya 19-10-2016 saa 12:39' na Ntakirutimana Deus


Umunyamabanga wa Leta muri Minisiteri y’Uburezi (Mineduc) ushinzwe amashuri abanza n’ayisumbuye, Munyakazi Isaac, yasabye abayobozi b’ibigo by’amashuri gukuraho ibihano bihabwa abanyeshuri mu gihe bakoze amakosa bizwi nka (weekend) kuko bishobora kugira ingaruka ku myigire yabo.

Ibi yabitangaje mu ijambo yagejeje ku bayobozi b’ibigo by’amashuri Gatolika byo mu Rwanda, mu nama yabereye kuri Stade Nto ya Remera kuri uyu wa Gatatu, tariki ya 19 Ukwakira 2016.

Yagize ati “Ntabwo twemera na gato igihano kibuza umwana kwiga. Ari abize uburezi ntaho bigishijwe ko nujya mu ishuri umwana agakosa uzamuhanisha kumwirukana. Ni ibintu bishya rero tunibaza ababikora aho babivanye, ari na yo mpamvu tutabijenjekera gusaba ibigo by’amashuri ko nta muyobozi n’umwe wemerewe kwirukana umwana akamubuza kwiga.”

Munyakazi yasabye ko ibi bihano bihabwa abanyeshuri bakoze amakosa bishobora gusimbuzwa ibindi bitababuza gukurikirana amasomo.

Ati “Kera ndibuka tukiga hari igihe wakosaga bakaduhanisha kuvuga ngo abandi nibajya mu kiruhuko wowe urasigara ukoropa ishuri. Kimwe ukemuye ikibazo cy’isuku nke yari mu ishuri, icya kabiri bigufasha kumva ko ubwo uri kubikora wenyine ari igihano uhawe utazongera kubisubira. Ibyo byadufashaga kudakora amakosa.”

Yakomeje avuga ko abashobora kuzarenga kuri uyu murongo bashobora kuzabihanirwa.

Ati “Bivuze ngo ni byiza ko abantu babirebaho kandi twe nka Minisiteri y’Uburezi rwose ntabwo tuzabyihanganira, nibiba ngomba tuzatanga amahugurwa, ariko ndumva bitanakenewe, kuko ndizera ko abantu bahabwa kurera bakabaye nabo bazi ko uburezi butandukanye cyane n’ibyo bibuza abana kwiga.”

Yongeyeho ati “ Erega, umwarimu cyangwa umurezi ni Umunyarwanda. Dufite amategeko agena uko Umunyarwanda witwaye nabi cyangwa se utubahirije ibyo agomba gukora ahanwa. Kuba umuntu urera byo ni umwihariko mu gihe udatanze uburezi bwiza, uriya mwana hari abandi babyita ko uri kumuroga, byagaragaye rero ko ubifitemo uruhare kandi rugaragara neza, amategeko yagukurikirana nk’umuntu utandukiriye n’icyemezo cy’igihugu n’amabwiriza akureba ku buryo wabihanirwa.”

Yasabye abayobozi b’ibigo by’amashuri Gatolika kwereka abandi ko kurera bitandukanye no kugira umwana inzererezi.

Ati “Mudufashe mu bigo by’amashuri gatolika twereke abandi ko kurera umwana atari ukumwirukana ngo umwohereze mu muhanda rimwe rimwe ntunabwire umubyeyi ko umwana atakibarizwa mu maboko yawe.Mwibaze hagati aho aho umwana ari, icyo arimo gukora. Ku ishuri bamwirukanye, umubyeyi ntabizi, ntaje kumufata, rimwe na rimwe uwo mwana yirukaniwe ikosa ryakabaye riryozwa umubyeyi ariko hari abakibikora.”

Perezida w’Inama Nkuru y’Abepisikopi Gatolika mu Rwanda, Musenyeri Philippe Rukamba yavuze ko ibyo bihano bidakwiriye mu mashuri yo mu Rwanda kuko ibihano bikabije atari byiza.

Yagize ati “Kenshi mu mashuri gatolika haravugwa ikibazo cyo guhana abana bigize indakoreka, kurera ni ukuba umubyeyi, ukamenya no kubahana ukurikije imyumvire y’igihugu, iy’abana n’iy’ababyeyi.”

Yongeyeho ati “ Kugira ngo urere si ngombwa gufata umwana ngo umukubite umubabaze, inkoni ivuna igufa ntikiza ingeso. Hari n’ubundi buryo bwinshi bwo guhana usaba umwana gukora umurimo runaka[…] Na ‘Weekend’ na zo tugomba kuzireba neza ntibibe ikintu gitesha umwana igihe cyo kwiga. Ndabizi ni ibintu bikomeye ariko nagira ngo muzige ku ishuri ryanyu ibijyanye no guhana abana, habe ikintu cyagaragarira bose yewe ndetse n’ababyeyi cyatuma ibihano dutanga byumvikana.”

Musenyeri Rukamba yavuze ko mu gihe cyabo uwakosaga yahanishwaga gusoma ibitabo agafata mu mutwe amagambo akomeye(bitaga ‘temps Primitif’ mu Kilatini, ngo byatumaga uwakosaga cyane ahinduka umuhanga mu kumenya ayo magambo.

Ati “Guhana umwana ngo bigomba kujyana no kumwereka ko yakosheje,yabihanirwa ariko akumva ko ahanwe nk’umwana ukundwa.”

Inzego zitandukanye muri Kiliziya Gatolika iza leta n'izindi zari zitabiriye iyi nama
Minisitiri w'Umuco na Siporo, Uwacu Julienne mu bitabiriye iyi nama
Umuyobozi mukuru wa REB, Gasana Janvier(ibumoso)
Umuyobozi w'Inama Nkuru y'Abepisikopi Gatolika, Musenyeri Philippe Rukamba
Minisitiri w'Umuco na Siporo, Uwacu Julienne ageza ubutumwa ku bitabiriye iyi nama
Umunyamabanga wa Leta ushinzwe amashuri abanza n'ayisumbuye, Munyakazi Isaac, yasabye abayobozi b'amashuri guhagarika ibihano birimo kwirukana abanyeshuri
Gasana Janvier, Umuyobozi Mukuru wa REB

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved