Mineduc yasubukuye igenzura riheruka gutuma amashuri amwe ahagarikwa n’abarimu bagahanwa

Yanditswe na Evariste Nsengimana
Kuya 27 Gicurasi 2019 saa 09:52
Yasuwe :
0 0

Minisiteri y’Uburezi (Mineduc) n’abafatanyabikorwa bayo batangije icyiciro cya gatanu cy’ubukangurambaga bugamije guteza imbere ireme ry’uburezi, aho buzakorerwa mu mashuri 900 aherereye mu Turere twose (30) tw’igihugu.

Iki cyiciro cyatangijwe kuri uyu wa 27 Gicurasi kizasozwa ku wa 7 Kamena gifite insanganyamatsiko igira iti ‘Umwarimu witabira umurimo, ufite imyigishirize inoze ni ipfundo ry’uburezi bufite ireme’.

Itangazo Mineduc yageneye abanyamakuru risobanuro ko iki cyiciro gifite intego yo kugira inama abayobozi b’ibigo by’amashuri ngo barusheho gukurikirana ibikorwa by’imyigire n’imyigishirize mu mashuri.

Abarimu bazagirwa inama y’uburyo bwo gutegura amasomo no kuyigisha hakurikijwe integanyanyigisho nshya ishingiye ku bushobozi kandi bagafata ingamba zo gukumira impamvu zose zatuma abana basiba cyangwa bava mu ishuri.

Rivuga ko ‘Buzarangwa no gusura amashuri, gukoramo ubugenzuzi ku myigire n’imyigishirize nyuma habeho kujya inama ku bikwiye kunozwa mu kigo cy’ishuri n’inagamba zafatwa’.

Bwitezweho kandi kuzamura uruhare rw’ubuyobozi bw’ishuri na mwarimu mu myigire n’imyigishirize inoze, ubwitabire no kudakererwa ku murimo kwa mwarimu birushijeho buganisha myigishirize inoze, kunoza ibijyanye n’isuzumabumenyi ku banyeshuri no kunoza imikoranire y’ikigo n’ababyeyi hagamijwe kuzamura ireme ry’imyigire n’imyigishrize.
Iki cyiciro cy’ubukangurambaga kije gikurikira ibindi byagiye bikorerwa mu bigo bitandukanye bigasiga hakozwe impinduka zirimo guhagarika abarimu n’ibigo by’amashuri bifite amakosa ashobora kubangamira ireme ry’uburezi no gushyira mu kaga abaharererwa.

Icyiciro cya III cy’ubukangutambaga nk’ubu cyabaye hagati ya tariki 10-21 Nzeri 2018, mu mashuri 899 yagenzuwe mu gihugu, havuyemo ko abarimu 118 basabirwa ibihano, amashuri 108 akabuzwa gutangira umwaka wakurikiyeho aramutse adakosora ibyanenzwe.

Harebwaga umubare w’abana bata ishuri, umubare w’abasibira, imiyoborere n’imicungire by’amashuri, isuzumwa ry’imyigire n’imyigishirize, isuku mu mashuri n’ikoranabuhanga mu myigire n’imyigishirize.

Mineduc yavuze ko uturere twasanzwemo ibibazo byinshi twari Kayonza yari ifite amashuri icyenda mu yahanwe; Kirehe atandatu; Rubavu ni arindwi, Rulindo ni atandatu na Kamonyi ifite atandatu kimwe na Nyagatare.

Icyo gihe hari amashuri amwe yasanzwe acumbikira abanyeshuri nta byangombwa afite, ubwogero bw’abahungu n’abakobwa budatandukanye, nta mazi afite kuyageraho bisaba gukora urugendo rurerure.

Hari kandi ayanenzwe kugira umwanda ukabije, abarimu basiba uko bishakiye, amashuri afite amadeni akabije, ubucuruzi butemewe aho nko mu Ishuri ribanza rya Nemba I mu karere ka Burera basanze hakorerwamo ubucuruzi burimo ubw’Ikigage n’ibindi bibazo byinshi.

Muri Kanama 2018, Amashuri yisumbuye 57 arimo Urwunge rw’Amashuri rwa Butare, Iseminari Nto yo ku Nyundo, Urwunge rw’Amashuri Indangaburezi rwo mu Karere ka Ruhango, College St André Nyamirambo yabujijwe gutangira igihembwe cya gatatu rimwe n’andi, nyuma y’aho agenzuwe, agasanganwa amakosa ashobora gushyira uburezi bw’abana mu kaga.

Mineduc yasubukuye igenzura riheruka gutuma amashuri amwe ahagarikwa n'abarimu bagahanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza