Minisante yagaye byimazeyo abari abaganga bambuye abantu ubuzima muri Jenoside

Yanditswe na Tombola Felicie
Kuya 21 Mata 2017 saa 07:25
Yasuwe :
0 0

Hari abaganga bagize uruhare muri Jenoside yakorewe Abatutsi barimo Habarugira Pascal wakoraga mu bitaro bya Kaminuza i Butare, CHUB; Nsengiyumva Jean Népomuscène nawe wakoraga muri CHUB ; Dr. Zirimwabagabo wabaye na Perefe wa Gisenyi ndetse n’umuganga w’indwara z’abagore mu bitaro bya Kaminuza bya Kigali, CHUK, akaba yarakatiwe gufungwa burundu kubera kugira uruhare mu itegurwa rya Jenoside.

Ubwo Minisiteri y’Ubuzima yibukaga ku nshuro ya 23 Jenoside yakorewe Abatutsi ndetse by’umwihariko abari abakozi bayo 37 bamaze kumenyekana ko bahitanywe nayo, hanenzwe abitwaga ko bakiza amagara y’abantu bagize uruhare mu kwambura abantu ubuzima.

Mu ijambo rye Minisitiri w’Ubuzima, Dr Gashumba Diane, yasabye abakora mu rwego rw’ubuzima gutanga ubutumwa bwo kwibuka kandi baharanira ko ibyabaye bitazasubira ukundi.

Ati “ Biragayitse kubona mu gihe cya Jenoside umuganga, umuforomo (nurse) yarafatanyije n’abandi mu kwica, akambura umuntu ubuzima yari ashinzwe kubumusubiza. Hari abaganga benshi bigishaga muri za Kaminuza n’ubu bari mu nkiko baburana, barahari rwose abaganga bishoye muri ibyo bikorwa by’ubwicanyi.”

Yakomeje asaba abaganga kurangwa n’indangagaciro, gukunda abarwayi no kugira ubumuntu. Ati “Turasaba abakora muri Minisiteri y’Ubuzima ngo barusheho kugira urukundo rw’umurimo, urukundo rw’abarwayi, dusigasire ibyagezweho ndetse tuzirikane ababuze ubuzima bwabo n’amaraso yamenetse ngo umutekano wongere uboneke.”

Kugeza ubu abazize Jenoside bakoraga muri Minisiteri y’Ubuzima n’ibigo byari biyishamikiyeho bamaze kumenyekana ni 37, ariko hari n’abataramenyekana kubera kubura amakuru.

Avuga ku kijyanye n’ingengabitekerezo ya Jenoside, Dr Gashumba yagize ati “Nk’abareberera ubuzima bw’abanyarwanda, kurwanya ingengabitekerezo ya Jenoside ni inshingano z’abanyarwanda ariko cyane umukozi wo mu ivuriro ureba ubuzima bw’abanyarwanda.”

Umunyamabanga Nshingwabikorwa wa Ibuka, Ahishakiye Naphatal, yasabye abaganga guhindura amateka kuko hari abahindanyije umwuga wabo.

Ati “ Imyanya murimo yo kuvura hari abayitesheje agaciro,ni ngombwa ngo muyibungabunge muyisubize agaciro. Kurwanya ingengabitekerezo ya Jenoside si akazi ka polisi cyangwa CNLG ,twese dufatanyije , tugashyira imbaraga hamwe, wenda tugakora itsinda tugasubira mu midugudu aho tuvuka bashobora kutwumva kurenza wa muyobozi w’umudugudu.”

Umwana w’umwe mu baganga bazize Jenoside, Iradukunda Flora, mu buhamya bwe yasobanuye uko abicanyi bakomeje kwanga kwica se ngo azakomeza abavure hanyuma bazamwice nyuma.

Ati “ Nari umwana ariko barazaga bakavuga ngo wowe Murenzi Jean Baptiste tuzakwica nyuma kuko uracyavura abantu,bagiye bamujyana kenshi akagarukira mu nzira ngo abanze avure abantu ariko byarangiye bamwishe.”

Umuhango wo kwibuka wakozwe na Minisiteri y’Ubuzima wabanjirijwe no gushyira indabo ahashyinguwe abanyepolitiki bazize Jenoside yakorewe Abatutsi i Rebero, hakurikiraho urugendo rwo kwibuka rwatangiriye kuri RDB rugera i Remera hafi ya Stade ahari ishami rya RBC.

Ni umuhango witabiriwe n’abakozi ba Minisiteri y’Ubuzima, ibigo biyishamikiyeho ndetse n’abafatanyabikorwa bayo bose mu buvuzi.

Minisitiri w'Ubuzima, Dr Gashumba Diane, acana urumuri rw'icyizere
Habayeho ijoro ryo kwibuka ryitabiriwe n'abakozi bose n'ibigo bishamikiye kuri Minisiteri y'Ubuzima
Bashyize indabo ahashyinguye abanyepolitiki bazize Jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza