Minisitiri Busingye yasobanuye ibyagendeweho mu gufungura abagororwa 788

Yanditswe na HABIMANA James
Kuya 12 Kamena 2019 saa 10:59
Yasuwe :
0 0

Mu myanzuro y’Inama y’Abaminisitiri yateranye tariki 7 Kamena, hasohotse Iteka rya Minisitiri ryemeza ifungurwa ry’agateganyo ry’abagororwa 788 bahamwe n’ibyaha binyuranye barimo abagore 48.

Mu bafunguwe harimo abari bafungiwe ibyaha birimo ubujura bukoresheje intwaro, gukwirakwiza no gukora amafaranga y’amiganano, gucuruza ibiyobyabwenge, kwica abana, gukubita no gukomeretsa, gucuruza abantu, kunyereza umutungo wa leta, icyaha cya ruswa, kunyereza imisoro, ibyaha bikoresheje ikoranabuhanga n’ubujura.

Bimwe mu bigenderwaho ngo aba bantu bahabwe imbabazi harimo kuba bamaze bitatu bya kane by’igifungo kandi baragaragaje imyitwarire myiza.

Minisitiri w’Ubutabera, akaba n’Intumwa Nkuru ya Leta, Johnston Busingye, yabwiye The New Times ko ibyatumye aba bantu bahabwa imbabazi ari uko bari bujuje ibi bisabwa.

Yagaragaje ko Urwego rw’Igihugu rw’Imfungwa n’Abagororwa (RCS) rukorana umunsi ku munsi n’aba bantu kugira ngo bahinduke babe abantu beza.

Yagize ati “Icyo bivuze ku butabera bw’u Rwanda, ni uko umumaro w’ubutabera unaha amahirwe aba bantu kongera kwitekerezaho bakaba abantu beza.”

Hagendewe ku iteka rya Minisitiri, aba bantu bakimara kurekurwa bagomba kujya bitaba Umushinjacyaha ku rwego rw’ibanze aho batuye kandi bagatanga imyirondoro yabo mu gihe cy’iminsi 15 bamaze kurekurwa.

Bagomba kandi kwitaba Umushinjacyaha byibuze rimwe mu kwezi bitewe n’umunsi yashyizeho, mu gihe bashaka kujya hanze y’igihugu bisaba ko babona uburenganzira buvuye kwa Minisitiri ufite ubutabera mu nshingano ze.

Minisitiri ufite ubutabera mu nshingano ze abisabwe n’Umushinjacyaha wa leta, ashobora guhagarika izi mbabazi kubera impamvu zitandukanye nk’imyitwarire mibi cyangwa se mu gihe uwahawe imbabazi yishe rimwe mu babwiriza yahawe kubahiriza.

Uwavaniweho izi mbabazi yongera gufungwa igihe yari asigaje ngo asoje igifungo cye, guhera umunsi yahereweho imbabazi.

Bamwe mu bahawe imbabazi bo muri gereza ya Muhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza