Kwamamaza

Minisitiri Gatete ntiyijeje abadepite impinduka za vuba ku nyungu banki zaka ku nguzanyo

Yanditswe kuya 16-11-2016 saa 08:25' na IGIHE


Inteko Ishinga Amategeko kuri uyu wa Kabiri yatangiye kuganira ku ivugururwa ry’itegeko rigena imitunganyirize y’imirimo y’amabanki, gusa abadepite baza kwibaza impamvu uyu mushinga wateguwe na Minisiteri y’Imari ntacyo uvuga ku ijanisha ntarengwa ry’inyungu amabanki agomba kwaka ku nguzanyo.

Abadepite bashimangiraga ko amabanki y’ubucuruzi yaka inguzanyo iri hejuru uko abishaka kandi itegeko ntirigire icyo ribivugaho, bituma basaba ko guverinoma yagira uruhare mu kuba inyungu ku nguzanyo yagabanywa.

Depite Bamporiki Edouard yagize ati “Turacyasigara inyuma iyo urebye ku kijyanye n’inyungu ku nguzanyo. Ese ntitwakoresha iri vugurura ry’itegeko ryacu rigena imitunganyirize y’imirimo y’amabanki tukagira icyo dukora ku nyungu zakwa ku nguzanyo zacu zikomeza kuba hejuru?’’

Depite Mukayuhi Rwaka Constance, yashyigikiye icyo gitekerezo asaba Minisitiri w’Imari, Amb. Gatete Claver kongereramo igipimo ntarengwa cy’inyungu yakwa ku nguzanyo, ku buryo nayo cyarebwaho mu biganiro ku ivugururwa ry’iri tegeko.

Ati “Turifuza izo mpinduka kugira ngo bidufashe mu kugabanya inyungu zakwa n’amabanki ku nguzanyo.’’

Nk’uko The New Times yabitangaje Minisitiri Gatete ntiyahise yizeza abadepite ko hahita hagibwa impaka ku igabanywa ry’inyungu ku nguzanyo muri uwo mushinga w’itegeko, asobanura ko amabanki yaka inyungu bitewe n’igiciro nayo afatiraho amafaranga acuruza, biza byiyongera ku kuba amabanki mu Rwanda aba atabitse amafaranga menshi y’abakiliya yashyizwemo by’igihe kirekire.

Iri tegeko rigena imitunganyirize y’imirimo y’amabanki riri kuvugururwa ni iryo kuwa 08 Mata 2008, guverinoma ikaba ishaka kurijyanisha n’urwego amabanki agezeho ku Isi, Umuryango wa Afurika y’Iburasirazuba n’Itegeko rishya ry’igihugu rigenga ubucuruzi.

Mu biganiro nyunguranabitekerezo byabereye mu Nteko Ishinga Amategeko muri Gashyantare, kuri politiki y’igihugu y’ifaranga, Guverineri wa Banki Nkuru y’Igihugu, John Rwangombwa, yasobanuye ko amabanki atabona inyungu nyinshi bitewe n’igiciro cyo gukora ubucuruzi mu rwego rw’imari.

Icyo gihe kandi yabwiye abadepite ko Banki Nkuru y’u Rwanda iramutse yinjiye mu kugena inyungu ku nguzanyo bishobora gusenya urwego rw’imari.

Ati “Banki ishyiraho inyungu ishingiye ku hantu yakuye amafaranga n’inyungu yasabwe. Icya mbere dushinzwe nka BNR ni uko banki zubaka imiyoboro, abantu bose bafite amafaranga bakayazana muri banki. Dufite ibigo bike bishobora gutanga amafaranga y’igihe kirekire muri banki. Nk’ubu ni RSSB, ni ibigo by’ubwishingizi.”

Rwangombwa yavuze ko abantu bashobora gutanga amafaranga ku mabanki ari bake mu gihe abayashaka ari benshi, ku buryo hari ubwo banki ziyahabwa zatswe inyungu ya 10%, ahato hakaba nk’umunani ku ijana.

Mu kongeraho igiciro cyo gukora ubucuruzi, banki zaka inyungu iri kuri 15% na 16%, ariko ngo hari ubwo umukiliya yakwa hejuru yaho bitewe n’uburyo umushinga we utanga icyizere, ku buryo impuzandengo ari 17%.

Icyo gihe kandi yavuze ko bari gukorana n’amabanki ku bwiza bw’inguzanyo batanga kugira ngo bagabanye ingano y’inguzanyo zitishyurwa. Yavuze ko harimo no kuvugana n’ibigo bitanga amafaranga mu mabanki nka RSSB, kugira ngo bigabanye inyungu biyatangiraho kuko ukuguma hejuru kwayo byangiza urwego rw’amabanki muri rusange.

Ati “Kuvuga ko bahenda abantu bo bakunguka ibya Mirenge ntabwo aribyo. Ahubwo urwunguko rw’amabanki yacu ruracyari hasi cyane. Ubu bari kuri 13% mu gihe ahandi mu karere bageze kuri 20%. Uko urwunguko rwabo rukiri hasi ntabwo bidushimishije kandi bagomba kuzamuka kugira ngo turusheho kureshya abashoramari mu rwego rw’imari rwacu.”

Abadepite kandi bavuze ko gukomeza kuba hejuru kw’inyungu yakwa ku nguzanyo mu mabanki y’ubucuruzi bituma zitakwa mu buryo bukwiye, ku buryo bigira ingaruka ku iterambere ry’igihugu.

Minisitiri w'Imari n'Igenamigambi, Amb. Claver Gatete

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved