Minisitiri Kaboneka yageze i Burera yakirizwa ibibazo by’amakimbirane ashingiye ku butaka

Yanditswe na Claude Bazatsinda
Kuya 18 Werurwe 2017 saa 06:48
Yasuwe :
0 0

Akarere ka Burera ni kamwe mu tugaragaramo amakimbirane ashingiye ku butaka na yo afite imizi ku buharike buhiganje, ibifatwa nk’inzitizi y’iterambere.

Ubwo Minisitiri w’Ubutegetsi bw’igihugu, Francis Kaboneka yasuraga aka karere ku wa Gatatu w’iki cyumweru yagiranye ibiganiro n’abaturage abasaba guhagurukira kurandura ingeso y’ubuharike nk’imwe muri nyirabayazana w’amakimbirane.

Ibi yabivuze ashingiye ku kuba mu bibazo abaturage bamugejejeho bikibangamiye imibereho yabo byinshi byagarutse ku makimbirane y’ubutaka ashingiye ku buharike.

Kuba hari abana benshi bavuka ku bagore basangiye umugabo umwe ari benshi bituma habaho ubwumvikane buke mu gihe cyo kugabana amasambu bamwe bashaka gufata manini bigakurura amahane ashobora no kubyara ubundi bugizi bwa nabi.

Yagize ati « Guharika ni uguhamagara amakimbirane kandi namwe murabibona mu bibazo byinshi byabajijwe ni cyo bishingiyeho ; turasaba ababyeyi by’umwihariko ba mutima w’urugo guhagurukira kurandura iyi ngeso kandi natwe ntituzabyihanganira.»

Akomeza avuga ko hari aho byashobotse kuko hari aho ababyeyi bishize hamwe bakajya bajya gukura mu ngo abakobwa baba bishyingiye ku bagabo basanzwe bafite izindi ngo kandi bitanga umusaruro.

Minisitiri Kaboneka asanga nta terambere rirambye ryagerwaho hakigaragara amakimbirane icyo yaba ashingiyeho cyose.

Yasabye abaturage guhuza imbaraga bakarwanya ibiyobyabwenge, guta amashuri kw’abana n’ikindi kibi cyose aho kiva kikagera.

Ati « Ntabwo twavuga amahoteli, amavuriro, imihanda ndetse n’ibindi byiza mumaze kugeraho ngo ni iterambere rirambye hakiriho ibibazo nk’ibi by’abantu bagikoresha ibiyobyabwenge cyangwa abana bata amashuli kuko ejo babisenya, ntimukwiye kubirebera ahubwo buri wese abe ijisho rya mugenzi we dufatanye mu kurwanya ikibi. »

Nta mibare ifatika igaragara imiterere y’ubuharike muri aka karere ariko iyi ngeso yakunze kuhagaragara aho na n’ubu hari abagabo bata ingo zabo bakajya gushakira abandi bagore no muri Uganda.

bazatsinda@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza