Minisitiri Kanimba yagize icyo avuga ku bashoramari bafata nabi abakozi

Yanditswe na Kanamugire Emmanuel
Kuya 9 Ugushyingo 2016 saa 12:55
Yasuwe : XX
0

Minisitiri w’Ubucuruzi n’Inganda n’Ibikorwa by’Umuryango wa Afurika y’Uburasirazuba, François Kanimba, yavuze ko atazi niba abashoramari b’abanyamahanga bafata nabi abakozi nk’uko bivugwa, ariko ngo niba biriho bakaba batabihanirwa cyaba ari ikibazo.

Sendika y’abakozi, COTRAF, ivuga ko abashoramari b’abanyamahanga by’umwihariko abubaka imihanda n’abafite inganda batubahiriza amategeko agenga umurimo mu Rwanda, bakagaragaza ko hari ibibazo bikomeje kwibasira abakozi birimo gukubitwa, kwicishwa inzara, guhembwa intica ntikize no kudahemberwa amasaha y’ikirenga.

Mu kiganiro n’abanyamakuru gikurikira isohorwa rya Raporo ya Banki y’Isi ku buryo ibihugu byoroshya ishoramari, cyabaye tariki ya 7 Ugushyingo, Minisitiri Kabimba yabajijwe ku bashoramari b’abanyamahanga bafata nabi abakozi b’abanyarwanda.

Yasubije agira ati “Mu by’ukuri sinzi neza niba iki kibazo uko kivuzwe kiriho koko[…]Niba hari ikigo iki n’iki kitubahiriza amategeko agenga umurimo mu Rwanda ntigifatirwe ibihano, amakosa ni ayacu kuko dufite inzego za Leta zishinzwe igenzura ry’umurimo zigomba kureba koko niba abacuruzi, abanyenganda n’abandi bubahiriza amategeko agenga umurimo, kandi ufashwe atayubahiriza ibihano birahari.”

Yakomeje avuga ko abashoramari baturuka hanze, abenshi bagirana amasezerano y’ishoramari na RDB, icya mbere baba bagomba kubahiriza ari ukwitwararika no kubahiriza amategeko agenga umurimo mu Rwanda.

Hari abashoramari bahaniwe kutubahiriza amategeko

Minisitiri Kanimba yakomeje agira ati “Njyewe nzi na bamwe Minisiteri ibishizwe, Mifotra yagenzuye igasanga hari ibibazo bagahanwa ndetse bamwe na bamwe bagafatirwa ibyemezo byo gufungirwa inganda kugeza igihe bazikosorera.”

Yakomeje avuga ko ikibazo cyo gufata nabi abakozi kitari ku bashoramari b’abanyamahanga gusa. Ati “Ndatekerezo ko n’abashoramari b’abanyarwanda haraho ushobora gusanga batubahiriza amategeko agenga umurimo, ibyo biriho ariko n’amategeko agomba kubikosora arahari.”

Yasabye Minisiteri ifite umurimo mu nshingano n’izindi nzego, kujya zitunga agatoki aho abashoramari bafata nabi abakozi bagakurikiranwa.

Indi nkuru wasoma : Ihohoterwa rikorerwa abakozi ritumye hasabwa Urukiko rw’umurimo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza