Kwamamaza

Minisitiri Nyirasafari yanenze abiyita ko bazi Imana kandi bareresha umuhanda

Yanditswe kuya 8-11-2016 saa 11:09' na Prudence Kwizera


Minisitiri w’Uburinganire n’Iterambere ry’Umuryango, Esperance Nyirasafari, yanenze bamwe mu babyeyi biyita ko ari abakirisitu, kandi batita ku nshingano zabo zo kurera, ugasanga abana babo barabaye inzererezi mu mihanda, abasaba kwisubiraho bakagira umutima wa kibyeyi.

Yabigarutseho kuri uyu wa mbere taliki ya 07 Ugushyingo 2016, ubwo yari mu Karere ka Ruhango, aho yitabiriye igikorwa cyo gutangiza icyumweru ngarukamwaka cyahariwe umuryango mu Itorero rya Pentekote mu Rwanda, ADEPR.

Bimwe mu bikorwa bizibandwaho muri iki cyumweru birimo kwigisha abagize umuryango kwirinda amakimbirane, kubakira ubushobozi abakene, kubatoza isuku, kurwanya ubuharike n’ibindi.

Mu gutangiza iki cyumweru, Minisitiri Nyirasafari yashimye umusanzu wa ADEPR, mu kubaka umuryango nyarwanda no guteza imbere igihugu, ariko avuga ko hari bamwe mu babyeyi bateshutse ku nshingano zabo zo gutanga uburere.

Yabwiye imbaga y’abantu b’ingeri zitandukanye yari iteraniye mu busitani bw’Akarere ka Ruhango ko biteye isoni kubona umwana w’umukirisitu azerera mu muhanda.

Yagize ati “Iyo tubona abana mu mihanda, abata amashuri,…ubu ugiye kubabaza wasanga abenshi ari abana b’abakirisitu. Biragayitse kumva ngo turi abakirisitu cyangwa ngo twemera Imana ariko tukareresha umuhanda”.

Minisitiri Nyirasafari yavuze ko Leta y’u Rwanda ihangayikishijwe n’ubuzima bw’abana bo mu mihanda, kandi yafashe ingamba zo kubakuramo bose, ariko yibutsa ko uruhare runini ari urw’ababyeyi.

Ati “Tuzabakura mu muhanda kuko nta mwana wakagombye kuba ahari uyu munsi, ariko birasaba ko ababyeyi badufasha, navuga ko ababyeyi bakomeje kwinangira ubu twashyizeho gahunda yo gutangira kubahana”.

Umuvugizi wa ADEPR mu Rwanda, Bishop Jean Sibomana, yavuze ko iyi ari inshuro ya gatandatu batangije ibikorwa by’icyumweru cy’umuryango muri ADEPR, agaragaza ko bimaze gutanga umusaruro mwiza ari na yo mpamvu bibatera imbaraga zo kubikomeza.

Yagaragaje ko mu Rwanda ADEPR ifite abayoboke barenga miliyoni ebyiri (2 000 000), kandi bashyizeho inzego zibafasha gushyira mu bikorwa gahunda zigamije kubaka umuryango nyarwanda mwiza ubereye umwana kandi uzira amakimbirane.

Ati “Itorero ryashyizeho inyigisho z’abasore n’inkumi zibategura kubaka umuryango muzima, kuko dusanga ari ngombwa kugira ngo bahabwe inyigisho zibereye. Izo nyigisho turazitanga kandi tubona zigenda zitanga umusaruro”.

Bishop Sibomana yavuze ko kandi bakora n’ibokorwa byo kurwanya ubuharike mu ngo z’abashakanye, gushishikariza ababana mu buryo butemewe n’amategeko gusezerana bakongeraho no gutera inkunga imiryango itishoboye.

Bamwe mu babyeyi baganiriye na IGIHE, bavuze ko nyuma yo kumva impanuro bahawe na Minisitiri ndetse n’Umuvugizi wa ADEPR hari byinshi bagiye gukosora mu ngo zabo, cyane cyane kwirinda amakimbirane no kuganiriza abana babo.

Faibe Bamwizeye wo mu murenge wa Ruhango ati “Ni byo koko amakimbirane yo miryango ndetse n’abashakanye badahuza nibyo bituma abana bakura nabi nta burere bafite ugasanga hari n’abo biviriyemo kuba inzererezi. Ubu njyewe ngiye kurushaho kuganiriza abana banjye mfatanyije n’umutware wanjye, kuko ubusanzwe twasaga n’abatabiha umwanya wabyo”.

Abana na bo bahwituwe ku myitwarire

Munisitiri w’Uburinganire n’Iterambere ry’Umuryango Esperance Nyirasafari yavuze ko hari bamwe mu bana bagaragaza imyitwarire mibi bakishora mu buraya n’ibiyobyabwenge, avuga ko bidakwiriye umwana w’u Rwanda.

Yabasabye kwirinda ibishuko bakumvira ababyeyi, kuko aribwo bazagira ejo hazaza heza.

Yagize ati “Ndasaba ngo mwirinde ibishuko by’ubusambanyi, mwitabire ibikorwa byiza byashyizweho, mwumvire ababyeyi”.

Mu gutangiza iki cyumweru, ADEPR yahise itanga inkunga ya mituweri ku bantu 300 batishoboye bo mu Karere ka Ruhango.

Ibikorwa bigamije kubaka umuryango Nyarwanda bikaba bigiye gukomereza mu turere twose tw’igihugu.

Esperance Nyirasafari, Minisitiri w'Uburinganire n'Iterambere ry'Umuryango
Umuvugizi wa ADEPR mu Rwanda, Bishop Sibomana Jean
Ababyeyi basabwe gutanga uburere no kuzuza inshingano zabo ku bana babo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved