Minisitiri Shyaka Anastase yasabiye ibigo ngororamuco kongerwamo inyigisho z’itorero ry’igihugu

Yanditswe na Evariste Nsengimana
Kuya 29 Gicurasi 2019 saa 06:40
Yasuwe :
0 0

Minisitiri w’Ubutegetsi bw’Igihugu, Prof. Shyaka Anastase, yasabye Ikigo gishinzwe igororamuco (NRS) na Komisiyo y’Itorero ry’Igihugu, gushyiraho icyiciro cyihariye cyo gutoza umuco n’indangagaciro bya Kinyarwanda, abagororerwa mu bigo ngororamuco ngo bajye barangiza hizewe ko bazagaragaza impinduka.

Mu nshingano NRS ifite harimo kugorora abagaragaye mu bikorwa bibangamira ituze ry’abanyarwanda nko gukoresha ibiyobyabwenge, uburaya, ubuzererezi, ubujura, urugomo n’ibindi ariko banigishwa imyuga itandukanye mu kubategura kuzasubira mu buzima busanzwe.

Kuri uyu wa 29 Gicurasi ubwo NRS yatangizaga umwiherero n’abafatanyabikorwa bayo muri gahunda yo gukumira ubuzererezi n’ibindi bibangamira ituze ry’abandi, hagaragajwe ko hakiri ikibazo cy’abarangiza kugororwa ntibagaragaze impinduka bagasubira mu bikorwa bibi.

Minisitiri Shyaka yavuze ko muri serivisi z’igororamuco hakirimo ibibazo ariko hafi ya byose bifitiwe ibisubizo kandi ko bizakemuka ku bufatanye bw’inzego zose.

Muri ibyo bibazo yavuze ko ‘Iyo urubyiruko rugororerwayo rutashye, tubona abongera bagasubiramo inshuro imwe, ebyiri, eshatu’.

Ati “Ubundi iyo arangije, yagakwiye kuba ajya muri sosiyete agakomeza ubuzima ariko ararangiza akongera agatangira. Ubwo ni ukuvuga ngo haba hakiri icyuho mu bushobozi bw’inzego.”

Minisitiri Shyaka yavuze ko hakenewe gutekerezwa ku ngamba zafasha umuryango nyarwanda kugira ngo impamba bahawe bayikoreshe mu buryo burambye, abasabira kunyuzwa mu itorero.

Ati “Turaza gusaba ubufatanye bwihuse kandi bushingiye ku bikorwa ku buryo NRS n’Itorero ry’Igihugu, bagiye gufatanya ngo ahabera igororamuco habe n’igicumbi cy’itorero.”

Prof Shyaka yavuze ko ‘Itorero naryo ryubaka ubunyarwanda bushya, umunyarwanda ushoboye, uburyo bwo kwishakamo ibisubizo tubwuzuze kugira ngo tubone ibisubizo birambye’.

Ati “Ahahuriye abana bari mu igororamuco dushake uburyo ikigo cy’igororamuco bahuza imbaraga ariko aho hantu naho hakaba igicumbi cy’itorero kugira ngo ritange uburyo bwo kwivugurura no kwiyubaka bushya.”

Minisitiri Shyaka yavuze ko by’umwihariko ibigo ngoramuco bikwiye kwigisha no kwita byihariye ku ihame ry’uburinganire n’iterambere ry’umugore ku buryo bitabangamira ibibareba.

Umuyobozi wa NRS, Bosenibamwe Aimé, yavuze ko ‘Guhuza itorero na gahunda z’igororamuco ari igitekerezo cyafasha gukumira ubuzererezi kuko ubuzererezi ari itakara n’iyononekara ry’indangagaciro z’umuco nyarwanda’.

NRS igaragaza ko kuva ikigo cya Iwawa cyashingwa cyanyuzemo urubyiruko rusaga ibihumbi 18 ariko 80% arirwo rwasubiye mu buzima busanzwe.

Uyu munsi Iwawa no mu bindi bigo byakira inzererezi hari abarenga ibihumbi 10

Minisitiri Shyaka Anastase yasabiye ibigo ngororamuco nyarwanda icyiciro cyihariye cy’itorero
umuyobozi wa NRS, Bosenibamwe Aimé yavuze ko guhuza itorero n'ibigo ngoromuco byafasha mu gukumira ubuzererezi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza