Minisitiri Shyaka yaburiye abacyumva ko bazarya ruswa bagatoroka

Yanditswe na Prudence Kwizera
Kuya 17 Gicurasi 2019 saa 11:43
Yasuwe :
0 0

Minisitiri w’Ubutegetsi bw’Igihugu, Prof Shyaka Anastase, yibukije abaturage n’abayobozi ko gutanga ruswa cyangwa kuyakira byabaye icyaha kidasaza abasaba kuyirinda kuko imunga ubukungu bw’igihugu.

Yabivugiye mu Karere ka Huye kuri uyu wa Kane mu bakangurambaga bwo gukangurira abaturage kwirinda ibyaha, ruswa no guharanira guhabwa ndetse no gutanga serivisi nziza bwateguwe n’urwego rw’igihugu rw’Ubugenzacyaha, RIB.

Muri ubwo bukangurambaga abaturage basabwe kwirinda ibyaha by’umwihariko ruswa bakayigendera kure.

Minisitiri Shyaka yaboneyeho umwanya wo kuburira abakibwira ko bazabonera amaronko muri ruswa kuko ari icyaha gifite ubukana n’uburemere.

Ati “Icyaha cya ruswa ubu mu Rwanda gisigaye ari icyaha kidasaza; kuba kidasaza ni bishya. Kuba ari icyaha byari bisanzweho ariko ubu ntibizongera kuba ko umuntu azajya ayaka cyangwa ayitanga ngo nahunga akamara hanze imyaka itanu ajijisha akagaruka ngo cya cyaha cyarashaje.”

Yakomeje agira ati “Ndagira ngo mwumve ubukana n’uburemere icyaha cya ruswa gifite n’imbaraga igihugu cyacu gishyize mu kugihana.”

Bamwe mu baturage bari bitabiriye ubwo bukangurambaga bavuze ko ruswa ikigaragara ahantu hatandukanye harimo no mu nzego z’ibanze.

Kalisa Justin yagize ati “Urugero natanga ni kuri kanyanga, niba bavuga ngo umutu wese uyifatiwemo akatirwa igifungo kiri hejuru y’imyaka itatu; ariko n’ubu hari abo ubona bayifatanywe ariko ukabona ejo mu gitondo barabarekuye.”

Umunyamabanga Mukuru wa RIB, Col Ruhunga Jeannot yavuze ko Intara y’Amajyepfo iri hasi mu gutanga amakuru kuri ruswa asaba ko bikosorwa.

Ati “Amajyepfo ari hasi mu Ntara zigaragaramo icyo cyaha bitavuze ko ari uko kidakorwa ahubwo bidutera impungenge ko abantu baba batagitangaho amakuru bihagije.”

Urukiko rw’ikirenga rugaragaza ko hagati ya 2017 na 2018 haburanishijwe abantu 561 bakekwaho icyaha cya ruswa, muri bo 265 bahamwa n’icyaha burundu, 95 bagirwa abere naho 192 barajurira.

Hakozwe urugendo rukangurira abantu kwirinda gutanga ruswa cyangwa kuyakira
Guverineri w'Intara y'Amajyepfo, CG Gasana Emmanuel
Minisitiri w’Ubutegetsi bw’Igihugu, Prof Shyaka Anastase yaburiye abaka ruswa n'abayitanga
Bamwe mu baturage bo mu Karere ka Huye bitabiriye ubukangurambaga ku kurwanya ruswa no gukumira ibyaha
Umunyamabanga Mukuru wa RIB, Col Ruhunga Jeannot, yavuze ko Intara y’Amajyepfo iri hasi mu gutanga amakuru kuri ruswa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza